20
Ni gübahñ Jesúz
(Mt. 28:1-10; Mr. 16:1-8; Lc. 24:1-12)
1 Primer xdzé seman, güya Maríe-Magdalen ruꞌ baa hor-dzictzu byniꞌ, ncawy ziaꞌ; bydzihñ me, bwieꞌ me ba byruu guie-ro ni nyagü ruꞌ baa.
2 Rxuunn me, za me ru nu Simoṉ-Pedr, no wé gahc nu sto mpyquie ni ndzi Jesúz lee no xmeññ me lee zegahc, ra me leeyahc:
―¡Güloo yâme Señor leññ baa, no nehx nann noꞌ bá biycaꞌdzy yâme leeme!
3 Byruu Pedr no sto mpyquie ni xmeññ Jesúz lee, za yâme ruꞌ baa.
4 Gaxuunn gyrop yâme; per sto me ma byxuunn que Pedr, no ma nier lee bydzihñ ruꞌ baa.
5 Byruꞌñ me no bwieꞌ me leññ baa, wé nash lar-byraḻ Jesúz, per di ñuꞌ me leññ baa.
6 Bylux de ni bydzihñ me, bydzihñ gahc Simoṉ-Pedr no güyuꞌ gahc leññ baa; no bwieꞌ me zegahc lar-byraḻ xcuerp Jesúz;
7 no luxu bwieꞌ me lahr ni byraḻ ihqy Jesúz, ndoobyu nashu gydze lad, no gydze gahc lad nash lahr ni byraḻ xcuerp Jesúz.
8 Luxu güyuꞌ sto xmeññ Jesúz ni bydzihñ nier lee, no bwieꞌ me gyreu no bylíladzy me gübahñ Jesúz gyzac,
9 porni dgueññ ziaꞌ guieññ yâme ni rnii lo Guehtzy ru queꞌ xtiidz Dioz, ru neu, leeme zbahñ me gyzac de lahd mînguty.
10 Luxu, gubyguiat xmeññ Jesúz ruꞌ yuꞌ ni güya ruꞌ baa.
Maríe-Magdalen bwieꞌ me Jesúz
(Mr. 16:9-11)
11 Per Maríe biaꞌn ruꞌ baa gayuun. No lóni gayuun me, byruꞌñ me lehdy güieꞌ me leññ baa,
12 no modé bwieꞌ me chohp ángel, nutz lar-quitzy dxie ru guht xcuerp Jesúz. To me dxie ñaz-ihqy baa no sto me dxie ñaz-nieꞌu.
13 Ra ángel yahc leeme:
―¿Ngünaa, bia nacu ruuniꞌ?
Were ra me leeyâme:
―Porni ziyno yâme xcuerp Señor ni nacaꞌ xmeññ, no nehx nannaꞌ bá glo ziyno yâme leeme.
14 Naabz günii me ze, bidzguiat lo me, bwieꞌ me Jesúz, per nehx bzaclo me bâḻ Jesúz‑e ni gawieꞌ me lee.
15 Ra Jesúz leeme:
―Ngünaa, ¿bia nacu ruuniꞌ? ¿Dxu ryohbyiꞌ?
Nlâdzy Maríe meññ-rahp lyu-wé ganii no leeme, were ra me lee:
―Señor, bâḻ lii ziyno leeme, gu naa bá glo bictishiꞌ leeme, lehdy dziycan leeme.
16 Were ra Jesúz leeme:
―¡Maríe!
Bidzguiat lo Maríe no günii me didz-hebreu, ra me Jesúz:
―¡Raboni! ―ni rnii neu, Muextr.
17 Ra Jesúz leeme:
―Di caniꞌ naa, porni dgueññ ziaꞌ tzan ru nu dTadaꞌ. Per güya, no gu dmeññ yahcaꞌ: Tzan ru nu dTadaꞌ ni zegahc xTad laꞌd lee, no tDiozaꞌ ni zegahc xDioz laꞌd lee.
18 Were za Maríe-Magdalen, zigyne me xmeññ Jesúz de ni bwieꞌ me Señor, no ra Maríe leeyâme ni ra Jesúz leeme.
Bydzihñ Jesúz lahd xmeññ
(Mt. 28:16-20; Mr. 16:14-18; Lc. 24:36-49)
19 Ru güyuꞌ guiaal de dze-wé gahc, primer xdzé seman, nyagü yuꞌ dxie xmeññ Jesúz porni rdzie yâme meññ-Isṟael. Jesúz gaññ bydzihñ glaꞌy ru dxie yâme leññ yuꞌ, no günii me diux, ra me:
―Tzu xguîlmbahñ laꞌd dzie tziaawy.
20 Bylux günii me ze, bluu me ru güyaaz clav ña me, no bluu coo leññ me bwieꞌ xmeññ me, no rxihly yâme gawieꞌ yâme leeme.
21 Luxu ra Jesúz leeyâme gyzac:
―Tzu xguîlmbahñ laꞌd dzie tziaawy. Mod-pshahl dTadaꞌ naa, modé gahc cshaalaꞌ laꞌd.
22 No luxu, blo me mbeꞌ leeyâme, no ra me lee:
―Lâ ycaꞌ Spirt-Sant.
23 Dxu guioob laꞌd lee no xguîlquie, zidguiahc yâme beeiy ni nehx ptzoo guîlquie; no dxu di guioob laꞌd lee de xguîlquie, ba biaꞌn gahc yâme we no xguîlquie yâme.
Bwieꞌ Tomáz ba gübahñ Jesúz
24 De lo gydiby tzipychop xmeññ Jesúz, to lahd yâme ni le Tomáz, ni ra yâme lee Dídimo, dgueññ me ru biahd Jesúz.
25 Per zrieñ yâme ni bwieꞌ Jesúz ra yâme Tomáz:
―Bwieꞌ noꞌ Señor.
Per Tomáz ra leeyâme:
―Bâḻ nehx nwien xseñ clav ña me no nlezy ihqy dñan ru güyaaz clav, no nlezy dñan zegahc coo leññ me ru güyaaz lanz, nehx nlídadzyaꞌ.
26 Güdahpu shun dzé, no gyzac bydohp xmeññ Jesúz leññ yuꞌ, were ba nu Tomáz lahd yâme, no nyagü gahc yuꞌ, Jesúz gaññ bydzihñ glaꞌy ru dxie yâme leññ yuꞌ, no ra leeyâme:
―Tzu xguîlmbahñ laꞌd dzie tziaawy.
27 Luxu, ra me Tomáz:
―Bwieꞌ dñan no güdan ru güyaaz clav; no güdan coo dleññaꞌ ru güyaaz lanz. Ba di yqueꞌladzyiꞌ, mazyg bylíladzy.
28 Were ra Tomáz leeme:
―¡Señor, lii we rtzoo mdad naa, no lii we tDiozaꞌ!
29 Ra Jesúz leeme:
―¿Bwieꞌriꞌ naa, were bylíladzyiꞌ la? ¡Dxu ñahc beeiy meññ ni rlíladzy naa sinn güieꞌ!
Nu bia nacu güyaa guetzy-rieꞌ
30 Ptzoo Jesúz xtahl ni ngann ni bwieꞌ xmeññ me ni nehx güyaa lo libr-rieꞌ.
31 Per ni ganii lo guetzy-rieꞌ güyaau lehdy gylíladzy laꞌd Jesúz, leeme nac Crist, Xiiñ Dioz, no lehdy hor-gylíladzy laꞌd leeme, gap laꞌd guîlmbahñ ni nehx zluhx.