9
Psiaḻ Jesúz to mpyquie ni guhl ngaḻ
1 Ru gadedy Jesúz, bwieꞌ me to mpyquie ni guhl ngaḻ.
2 Were ra xmeññ me leeme:
―Muextr, ¿bia nacu guhl mpyquie-rieꞌ ngaḻ lo me? ¿Por xguîlquie xtad me o xmam me la, o por xguîlquie gahcme?
3 Ra Jesúz leeyâme:
―Dac‑e por xguîlquie me leeu, ni dac‑e por xguîlquie xtad me ni xmam me leeu; mazyg guhl me ze lehdy güieꞌ meññ ni beeiy ctzoo Dioz no leeme.
4 Leegâ nun neꞌ, rapaꞌ de ni ctzon xtziiñ Dioz ni pshahl naa, porni zdzihñ dzé ba ndruhty nehx beeiy ctzoo dziiñ.
5 Leegâ nun lo guiedzylie, naa zidguiahcaꞌ beeiy byniꞌ par meññ-nu lo guiedzylie.
6 Byluxz günii Jesúz ze, byxîbyshieñ me lo yu, no ptzoo meu bann no güxo meu ruꞌ lo mpyquie ni ngaḻ.
7 No ra me lee:
―Güya bictiiby loꞌy ru rdohp nzeꞌ ru le Siloé ―ni rnii ne: Ni pshahl sto lee.
Were güya mpyquie-caḻ ni ngaḻ, bictiiby lo; no glo gubyguiat me, ba rwieꞌ me.
8 Meññ-nu yahc gahsh de ru nu mpyquie-rieꞌ, no zrieñ meññ ni nann yahc ngaḻ lo me, ne yâme:
―¿Dac‑e leeme ni rbia rnab gun la?
9 Nu yâme ne:
―Leeme we.
Zrieñ yâme ne:
―Yac, dac‑e leeme, per rluu beeiy leeme.
Per leegahcme ne:
―Naa we.
10 Were ra yâme leeme:
―¿Bia mód‑e byxal loꞌy?
11 Ra me meññ-wé yahc:
―To mpyquie ni le Jesúz‑e ptzoo bann, no güxo meu ruꞌ dloꞌn, no ra me naa: “Güya ruꞌ nzeꞌ ni le Siloé, bictiiby loꞌy.” Were güyan, no scâsy güdiibyaꞌ dloꞌn, bwie gahcaꞌ byniꞌ.
12 Were ra yâme leeme:
―¿Óz me naꞌ?
Ra me leeyâme:
―Nehx nannaꞌ.
Günabdiidz meññ-nac fariseu mpyquie-byxal lo
13 Luxu güiyno yâme mpyquie-guhc ngaḻ lo meññ-nac yahc fariseu.
14 Guhcu to dze-risladzy meññ ni ptzoo Jesúz bann no psiaḻ me lo mpyquie-rieꞌ,
15 leewe günabdiidz meññ-nac yahc fariseu mpyquie-rieꞌ bia mód byxal lo me no ba rwieꞌ me. Ra me leeyâme:
―Güxo Jesúz bann ruꞌ dloꞌn, no luxu güdiibyaꞌ leeu, no bwie gahcaꞌ.
16 Lahd gahc meññ-nac yahc fariseu, ne yâme:
―Mpyquie-wé ni le Jesúz, nehx ziaad me de Dioz, porni nehx rlaby me dze-risladzy meññ.
Zrieñ yâme ne:
―¿Bia mód beeiy ctzoo me xtahl ni ngann zâ nirieꞌ bâḻ ñahc me meññ-guîlquie?
No to to yâme gydze ni rnii, no nehx güdahp yâme tohzy guîlriehñ.
17 Were gyzac günabdiidz yâme mpyquie ni guhc ngaḻ, ra yâme leeme:
―Sca-ze pshal me loꞌy no rwieꞌy, ¿bia neꞌy de leeme?
Ra me:
―Naa la, ren profet‑e leeme.
18 Per meññ-Isṟael ni nac guxtisy nehx bylíladzy yâme bâḻ mpyquie-rieꞌ guhc ngaḻ no naꞌ ba rwieꞌ. Were pshalcaꞌ yâme xtad me no xmam me,
19 no günabdiidz yâme leeyahc:
―¿Mpyquie-rieꞌ we xiiñ laꞌd, ni ne laꞌd guhl ngaḻ la? ¿Bia mód‑e ba rwieꞌ me?
20 Xtad me no xmam me ra yâme:
―Leeme we dshiiñ noꞌ, no ngaḻ lo me dze-guhl me;
21 per nehx nann noꞌ bia mód‑e ba rwieꞌ me, ni nehx nann noꞌ dxu psiaḻ lo me. Lâ gnabdiidz leeme; ba xchoꞌ me we, beeiy ga me laꞌd xnahc biaḻ lo me.
22 Xtad me no xmam me bydzie yâme, leewe günii yâme ze; porni meññ-Isṟael ni rtzoo mdad, ba ptzoo yâme diidz bâḻ dxuhch gynii Jesúz, leeme we nac Mesíaz, ba gahc gboo yâme lee idoo tohgzy.
23 Leewe günii xtad me no xmam me, ne yâme: “Lâ gnabdiidz leeme; ba xchoꞌ me we.”
24 Gyzac meññ-Isṟael ni rtzoo mdad, pshalcaꞌ yâme mpyquie ni gucngaḻ, no ra yâme leeme:
―Güluguia Dioz, gu noꞌ ni uli. Noꞌ nann noꞌ mpyquie-wé ni le Jesúz meññ-guîlquie we leeme.
25 Ra me leeyâme:
―Nehx nannaꞌ bâḻ meññ-guîlquie leeme o yac, mazyg ni nannaꞌ, ngaḻ‑e guhcaꞌ, per naꞌ ba rwien.
26 Gyzac ra yâme leeme:
―¿Bia ptzoo me lii? ¿Bia mód psiaḻ me loꞌy?
27 Ra me leeyâme:
―Dâs‑e ba ren laꞌd, no di rieññ laꞌd. ¿Bia nacu riñlo laꞌd gyninu gyzac? ¿Racladzy laꞌd gac laꞌd xmeññ me zegahc la?
28 Luxu güdeḻy yâme leeme ru günii me ze, no ra yâme leeme:
―Lii we xmeññ mpyquie-wé, per noꞌ xmeññ Moiséz‑e noꞌ.
29 Noꞌ nann noꞌ Dioz günii me no Moiséz; per mpyquie-wé, ni nehx nann noꞌ bá byruu me.
30 Ra mpyquie-rieꞌ leeyâme:
―Rtzunadzaꞌ we nehx nann laꞌd bá byruu me, no naa naꞌ, psiaḻ me dloꞌn.
31 No nann nó Dioz nehx rieññ me ni rnab meññ-guîlquie; per dxu rzacbeeiy leeme no rtzoo ni ne me, wé we rieññ me lee bia rnab.
32 Glo ba xtze diaa dgueññ guieññ tzu dxuhch nsiaḻ lo meññ ni guhl ngaḻ.
33 Bâḻ mpyquie-wé nehx ziaad de Dioz la, zegahc‑e nehx beeiy ntzoo me mbehty ni ngann.
34 Ra yâme leeme:
―Lii ni nac to meññ-guîlquie glo guhliꞌ, ¿riñloꞌy gluuy noꞌ la?
No güloo yâme leeme idoo tohgzy.
Nîcze nxal lo, per nehx rwieꞌ
35 Gunn Jesúz ba güloo yâme mpyquie-rieꞌ idoo tohgzy; no hor-bwieꞌ Jesúz leeme, ra leeme:
―¿Rlíladzyiꞌ Mpyquie-Pshahl Dioz Lee la?
36 Ra me Jesúz:
―Señor, gu naa dxu we leeme, lehdy gylídadzyaꞌ leeme.
37 Ra Jesúz leeme:
―Ba bwieꞌy leeme, no naa we leeme, ni ganino lii.
38 Were ra me Jesúz:
―Rlídadzyaꞌ, Señor.
No bisshiby me lo Jesúz.
39 Luxu ne Jesúz:
―Naa biaḻaꞌ lo guiedzylie-rieꞌ lehdy gynin ni nac meññ; dxu zidguiahc beeiy ngaḻ la, güieꞌ yâme porni rlíladzy yâme naa; no dxu ne rwieꞌ per nehx rlíladzy naa, gac beeiy ngaḻ.
40 Lahd meññ-nac yahc fariseu ni zu gahsh ru zu Jesúz, ru bieññ yâme ni günii me, ra yâme leeme:
―¿Neꞌy la, noꞌ we ngaḻ zegahc?
41 Ra Jesúz leeyâme:
―Bâḻ ñahc ngaḻ laꞌd, nehx ñahp laꞌd guîlquie; per naꞌ, gumm ne laꞌd nxal lo laꞌd la, rahp laꞌd guîlquie.