14
Gayo yâme xnahc igaꞌdy yâme Jesúz
(Mt. 26:1-5; Lc. 22:1-2; Jn. 11:45-53)
1 Gayaadz chohp dzé ni gac lni-Pascü, dze-rahgü meññ paṉ ni nehx rahp levadur. Xjefy yahc bahl naꞌ no zrieñ muextr ni ruuḻ yahc xleiy Moiséz, gayo yâme xnahc gynahzy yâme Jesúz ngaꞌdzy gá, lehdy igaꞌdy yâme leeme.
2 Per ne yâme:
―Nehx znahzy nó leeme lo lni, lehdy di gybiiñ meññ-guiedzy.
To ngünaa güluꞌ ceitnixye ihqy Jesúz
(Mt. 26:6-13; Jn. 12:1-8)
3 Güya Jesúz guiedzy-Betania, xiryuꞌ to mpyquie ni le Simóṉ ni biudz lady. Lóni dxie Jesúz ruꞌ miax, bydzihñ to ngünaa no to frascü ni güyaa no guie ni le alabastro, no nu to ceitnixye leññu ni güyaa no ni le nardo ni nehx nutz mbehty no ni modni xguiaꞌ. Gülaꞌy ngüna-rieꞌ ruꞌ frascü no güluꞌ me ceihd ni nu leññu ihqy Jesúz.
4 Lahd meññ-dxie uga bydziaꞌdzy yâme, no ra saꞌ yâme:
―¿Bia nacu bynihty ceit-rieꞌ xleꞌzy?
5 Beeiy ndoꞌu sahc xchieñ tzonn gayuu xdzé dziiñ, lehdy ñacnou meññ-pobr.
No gyrehzy ganii yâme de ngüna-rieꞌ.
6 Per Jesúz ra me:
―Lâ gdee ñahz ngüna-rieꞌ. ¿Bia nacu gatziaꞌdzy laꞌd leeme? Mos‑e nirieꞌ ni gatzoo me naa.
7 Meññ-pobr, tirgahc‑e nu yâme lahd laꞌd, no beeiy gacno laꞌd leeyâme hortisy gacladzy laꞌd; per naa nehx ziunon laꞌd tirgahc.
8 Ngüna-rieꞌ ptzoo me ni beeiy leeme. Ba güluꞌ me nirieꞌ ni nixye dladyaꞌ antzy ni igaꞌdzyaꞌ.
9 Gapyaꞌ laꞌd ni uli, rutisy gu meññ dtiidzaꞌ lo guiedzylie lehdy gylaa meññ de lo guîlnadz ni ziaad la, zegahc zu yâme diidz ni ptzoo ngüna-rieꞌ, lehdy guitsêlou meññ leeme.
Jud-Iscariot gdee Jesúz lo ña meññ
(Mt. 26:14-16; Lc. 22:3-6)
10 No Jud-Iscariot naꞌ, to lahd gydiby tzipychop xmeññ Jesúz, güya me lo xjefy yahc bahl lehdy gdee me Jesúz lo ña yâme.
11 Ru bieññ xjefy bahl nirieꞌ naꞌ, rxihly yâme, no ptzoo yâme diidz gdee yâme medy ycaꞌ Jud; no xtâ glo dze-caḻ ba guzlo gayo Jud to mód lehdy gdee me Jesúz.
Güetzie Jesúz no xmeññ me ni nac lni-Pascü
(Mt. 26:17-29; Lc. 22:7-23; Jn. 13:21-30; 1Co. 11:23-26)
12 Primer dzé ni nac lni-Pascü, leeu we dze-rahgü meññ paṉ ni nehx rahp levadur, dze-rgaꞌdy yâme xiily ni rdee yâme gun Dioz, ra xmeññ Jesúz leeme:
―¿Bá glo racladzyiꞌ tzo noꞌ dziguistziaawy noꞌ gyreu lehdy gotziey ni rahc lo lni-Pascü?
13 Were pshahl Jesúz chohp xmeññ me, no ra me lee:
―Lâ tza ciuda, no uga güieꞌ laꞌd to mpyquie ni ziyno to rieꞌ nzeꞌ. Ba náḻ laꞌd leeme,
14 no ru tzu me, ga laꞌd xbixwaan yuꞌ mod-rieꞌ: “Ze ne Muextr: ¿Bia leññ yuꞌ we ru gotzien no dmeññaꞌ ni rahc lo lni-Pascü?”
15 Uga gluu me laꞌd to leññ yu-ro sto pis guia ni ba nu puexd. Uga lâ guistziaawy gyreu lehdy gotzie nó.
16 Were byruu xmeññ Jesúz za yâme leññ guiedzy, no guhc gyre mod-ra Jesúz leeyâme. No uga bistziaawy yâme gyre ni rahc lo lni-Pascü.
17 Hor-güyuꞌ guiaal‑e naꞌ, bydzihñ Jesúz no gydiby tzipychop xmeññ me.
18 Lóni dxie yâme ruꞌ miax‑e naꞌ gayahgü yâme, ra Jesúz leeyâme:
―Gapyaꞌ laꞌd ni uli, to lahd laꞌd ni gayahgü no naa gdee me naa lo ña meññ-rdziadzyno naa.
19 Güyuꞌ yâme trixd, no guzlo ganabdiidz yâme leeme, to por to yâme ra:
―¿Dac naa la?
No sto me ra:
―¿Dac naa la?
20 Ra Jesúz leeyâme:
―Leeme we to de lahd gydiby tzipychop laꞌd ni gagunihs xpaṉ no naa tohzy leññ blad.
21 Naa, Mpyquie-Pshahl Dioz Lee, rapaꞌ de ni tedyaꞌ gyre ni ganii lo Guehtzy ru queꞌ xtiidz Dioz de naa. Per ¡baazy dzii de mpyquie-gdee naa lo ña meññ-rdziadzyno naa! Ma mos‑e di ñahl me.
22 Lóni gayahgü yâme naꞌ, cuaꞌ Jesúz paṉ lo ña me no bdee me xquix Dioz. Luxu, ptzulaꞌy meu, no bdee meu cuaꞌ xmeññ me, no ra me leeyâme:
―Lâ ycaꞌ nirieꞌ, dcuerpaꞌ we leeu.
23 Luxu cuaꞌ me to cop lo ña me, no bylux bdee me xquix Dioz, bdee meu xmeññ me, no güee gyre yâme ni nu leññu.
24 No ra me leeyâme:
―Nirieꞌ we drieñaꞌ ni no lee rdee Dioz diidz nu sto mod-coby par tzu meññ tohzy no leeme, no gyxieꞌu par xtahl meññ hor-gatyaꞌ.
25 Gapyaꞌ laꞌd ni uli, ba nehx zibyguiat gooraꞌ nirieꞌ ni riaa no blatzy xtâ dze-ba diaa nun ru rtzoo Dioz mdad, were goon nicoby.
Günii Jesúz gynii Pedr nehx rzaclo leeme
(Mt. 26:30-35; Lc. 22:31-34; Jn. 13:36-38)
26 Bylux biiḻy yâme himn, byruu yâme, za yâme dañ-Oliv.
27 Hor-ba bydzihñ yâme, ra Jesúz leeyâme:
―Gyre laꞌd csaꞌn naa guial-rieꞌ, porni lo Guehtzy ru queꞌ xtiidz Dioz neu: “Igatyaꞌ mpyquie-gayahp xiily, no gyre xiily gyraꞌdz.”
28 Per lux gybahñaꞌ, sunieeraꞌ lo laꞌd tzan lo ṟegioṉ-Galilea.
29 Were ra Pedr leeme:
―Nîcze gyre yâme csaꞌn lii, per naa nehx ssanaꞌ lii.
30 Ra Jesúz leeme:
―Gapyaꞌ lii ni uli, guial-rieꞌ gahc‑e, dgueññ ziaꞌ cuiadz rig ni gyropu, lii ba tzonn vuelt güniiy nehx rzacloꞌy naa.
31 Per Pedr naꞌ ma gaya leeme:
―Nîcze gatyaꞌ no lii, per nehx zapyaꞌ di rzacloꞌn lii.
No gyre yâme günii mod-ne gahc Pedr.
Günab Jesúz lo Dioz Getsemaní
(Mt. 26:36-46; Lc. 22:39-46)
32 Luxu, za yâme to lgar ru le Getsemaní, no ra Jesúz xmeññ me:
―Lâ cuia neꞌ gahc, eguiid naa gnabaꞌ lo Dioz.
33 No ziyno me Pedr no Jacob no Juaṉ, no guzlo gayuꞌ me trixd no gazacno me.
34 No ra me meññ-rieꞌ yahc ni ziyno me:
―Leññ dguîlmbahñaꞌ nu to xroꞌ guîltrixd, lé rluuw gatyaꞌ. Lâ guiaꞌn neꞌ, no lâ cuianáꞌ.
35 Luxu, za Jesúz stoozy zit-yaañ no bisshiby lé güdihsh ihqy me lo yu, no günab me lo Dioz bâḻ ñahcu ni ñaḻ nehx ndzihñ hor-wé ni dzictedy me ni nadz.
36 No ra me:
―DTad-mosaꞌ, gyreu we beeiy no lii. Bislaa naa de lo ni nadz ni gabiahz naa; per dac‑e gac ni gynin, mazyg ni gyniiy‑e.
37 Luxu, gubyguiat me ru biaꞌn guionn xmeññ me, no bwieꞌ me nishcahsy yâme. Ra me Pedr:
―Simóṉ, ¿gagahsyiꞌ la? ¿Di ñaḻ dxi mbianáꞌy no naa ni diby hór la?
38 Lâ cuianáꞌ no lâ gnab lo Dioz, lehdy di ctzoo laꞌd ni racladzy bêndzab. Xguîlmbahñ laꞌd racladzy ctzoo ni nac xñahzû, per xcuerp laꞌd nehx rtibladzy.
39 No gyzac za me, zignab me lo Dioz, no günii me ni günii gahc me primer.
40 Ru gubyguiat me, gyzac bwieꞌ me nishcahsy xmeññ me, porni bydzeꞌ mpcaaḻ lo yâme. No dgann yâme bia ga yâme leeme.
41 Ni bionn ni gubyguiat me ru biaꞌn xmeññ me, ra me leeyâme:
―¿Gagahsy ziaꞌr laꞌd no gayisladzy ziaꞌr laꞌd la? Ba wé gâsy, ba bydzihñ hór ni ba nac diidz gdee meññ Mpyquie-Pshahl Dioz Lee lo ña meññ-guîlquie.
42 Lâ guiahs, tzoꞌ. Lâ güieꞌ, ba gadziñgahsh mpyquie ni gdee naa.
Günahzy yâme Jesúz
(Mt. 26:47-56; Lc. 22:47-53; Jn. 18:2-11)
43 Ganii ziaꞌ Jesúz ze, tohzy bydzihñ Jud, ni lee nac to lahd gydiby tzipychop xmeññ Jesúz, bydziñno me xtahl meññ ni zidno yahc spad no garrot, ni pshahl xjefy yahc bahl no muextr ni ruuḻ yahc xleiy Moiséz no zrieñ mînguhl yahc ni nac guxtisy.
44 Jud naꞌ, ni gdee Jesúz lo ña meññ, ba bdee me to señ, ra me meññ-ziyno me lee:
―Dxu ycurun lee, wé we leeme; wé lâ gynahzy lee, no lâ tziyno leeme di gylaa me.
45 No scâsy bydzihñ me, gübigy gahc me, ra me Jesúz:
―¡Muextr!
No pcuruꞌ me lee.
46 Were günahzy yâme Jesúz lehdy tziyno yâme lee.
47 Per to lahd meññ-zu uga güloo xispad me, no güloo me rid to xmós xjefy gyre bahl, pchug me to gydiag.
48 Ra Jesúz meññ-günahzy leeme:
―¿Zidnot spad no garrot lehdy gynahzy laꞌd naa beeiy to meññ-gübaan la?
49 Gyre dzé güyun ruꞌ idoró no laꞌd, blun meññ, no nehx günahzy laꞌd naa. Per nirieꞌ gayahcu ze, lehdy gac ni ganii lo Guehtzy ru queꞌ xtiidz Dioz.
50 Lo hor-wé byxuunn gyre xmeññ Jesúz, no psaꞌn yâme leeme lehzyme.
To ñobyxtohby ni byxuunn
51 Nunzy to ñobyxtohby náḻ ru ziyno yâme leeme, no nuud me tohzy lahr. No günahzy yâme leeme,
52 per byruu me leññ lahr, no byxuunn me gaꞌy lady me.
Güiyno yâme Jesúz lo guxtisy
(Mt. 26:57-68; Lc. 22:54-55, 63-71; Jn. 18:12-14, 19-24)
53 Güiyno yâme Jesúz lo xjefy gyre bahl; no bydohp zrieñ xjefy yahc bahl, no mînguhl yahc ni nac guxtisy no muextr ni ruuḻ yahc xleiy Moiséz.
54 No náḻt Pedr ziht gá glo güyuꞌ me lo xpaty xiryuꞌ xjefy gyre bahl, no gürie me lahd meññ-rahp ruꞌ idoró, gatzeꞌladzy yâme coo gue.
55 Xjefy yahc bahl no gyre meññ-nac guxtisy gayo yâme dxu gynii contr Jesúz lehdy tzu mód gaty me; per nehx bydzial yâmeu.
56 No xtahl meññ ganii ni nehx uli contr leeme, per nehx cue-saꞌ ni günii yâme.
57 No lahd gahc meññ-rieꞌ guzli yahc, gayisquiee, ne:
58 ―Noꞌ, bieññ noꞌ günii me: “Naa iguiñguien idoro-rieꞌ ni bzaa meññ lee, no lo tzonn dzé gzan stohbyu, no ba dac‑e meññ gacno tzaau.”
59 Per nîcze günii meññ-rieꞌ ze, nehx cue-saꞌ ni günii yâme.
60 Were guzli xjefy gyre bahl lahd yâme, no günabdiidz me Jesúz, ra me:
―¿Nehx neꞌy mbehty la? ¿Bia leeu nirieꞌ ni rnii yâme chehshiꞌ?
61 Mazyg Jesúz biandzie me, no nehx günii me mbehty. Per xjefy gyre bahl naꞌ gyzac günabdiidz leeme, ra:
―¿Lii we nac Crist, Xiiñ Dioz-nu laꞌy la?
62 Ra Jesúz leeme:
―Naa. No zwieꞌ laꞌd naa, Mpyquie-Pshahl Dioz Lee, dxien xlad-drech Dioz ni beeiyu lee gyreu. No güieꞌ laꞌd guiaḻaꞌ lo zá ni gyruu gybaa.
63 Were güdiix shab xjefy gyre bahl porni gadziaꞌdzy me, no ra me:
―¿Bia mazy racdadzy nó tzu dxu gynii?
64 Ba bieññ laꞌd günii me didz-nahcsy contr Dioz. ¿Bia ne laꞌd naꞌ?
No gyre yâme günii rahp me doḻ no rahp me de ni gaty me.
65 Lahd yâme guzlo gaxîbyshieñ leeme. Ptahgü yâme lo me no güdihñ yâme leeme, no ra yâme leeme:
―¡Günii dxu güdihñ lii!
No meññ-rahp yahc ruꞌ idoo güdahp lo me.
Günii Pedr nehx rzaclo me Jesúz
(Mt. 26:69-75; Lc. 22:56-62; Jn. 18:15-18, 25-29)
66 Pedr naꞌ dxie me lo paty, tohzy bydzihñ to xicriad xjefy gyre bahl.
67 No ru bwieꞌ me Pedr gatzeꞌladzy coo gue, bwiedzie me lee, no ra me lee:
―Lii zegahc güyuꞌy tohzy no Jesúz ni nac meññ-Nasaret.
68 Per Pedr naꞌ, günii me “yac”, no ra me ngüna-rieꞌ:
―Nehx rzacloꞌn leeme, no nehx nannaꞌ de bia ganiiy.
No byruu me stziuꞌ ruꞌ ru riuꞌ yâme. No güriedz gahc rig.
69 Bwieꞌ criad Pedr uga, no gyzac guzlo gaya me zrieñ meññ yahc uga:
―Mpyquie-rieꞌ, to lahd xmeññ Jesúz‑e leeme.
70 Per gyzac günii Pedr “yac”, ne me nehx rzaclo me Jesúz. No stoozy hór meññ-nu yahc uga gyzac ra yâme Pedr:
―Ulihbu we to lahd xmeññ mpyquie-rieꞌ lii; porni meññ‑Galilea lii, no rniiy beeiy gahc rnii yâme.
71 Aaḻ guzlo Pedr ganiwaty me, no bzaꞌd me le Dioz, no ne me:
―¡Nehx rzacloꞌn mpyquie-rieꞌ ni ganii laꞌd de lee!
72 Tohzydzi güriedz rig ni byrohpu. No bitsêlou Pedr ni ra Jesúz leeme: “Dgueññ ziaꞌ cuiadz rig ni gyropu, lii ba tzonn vuelt güniiy nehx rzacloꞌy naa.” No por mod-wé, guzlo biin me.