17
Bwieꞌ xmeññ Jesúz bydzee mod-nac lo me
(Mr. 9:2-13; Lc. 9:28-36)
1 Güdedy shoꞌb dzé, güiyno Jesúz Pedr, Jacob, no Juaṉ behtzy Jacob, no za yâme nunzy leeyâme ihqy to dañ-suu.
2 Uga bwieꞌ yâme bydzee mod-nac lo Jesúz, rcampytzeꞌ lo me beeiy lo ncübidz, no shab me gucnquitzybou lé rguꞌu byniꞌ.
3 Lohg hor-wé bwieꞌ yâme Moiséz no Elíaz ni güyuꞌ yahc ba xtze, gayu yâme diidz no Jesúz.
4 Were ra Pedr Jesúz:
―Señor, ¡lehgxu zuu nó neꞌ! Bâḻ neꞌy la, gzaa noꞌ tzonn ṟamad: tohbyu par lii, stohbyu par Moiséz, no stohbyu par Elíaz.
5 Ganii ziaꞌ Pedr ze, tohzydzi bihtz to zá leeyâme lé rguꞌu byniꞌ; no lo za-wé bieññ yâme to riedz, ni ne:
―Nirieꞌ we dShiñaꞌ ni ndzin lee, no ni rxilynon lee; lâ guieññ ni ga me laꞌd.
6 Hor-bieññ xmeññ Jesúz nirieꞌ, bisshiby yâme no ba di nlesy lo yâme nwieꞌ yâme, no modni gadzie yâme.
7 Were gübigy Jesúz ru nisshiby yâme, no pshob ña chehsh yâme, no ra leeyâme:
―Lâ guiahs; di gydzie laꞌd.
8 No bwieꞌ yâme, ba ndruhty dgueññ, ba nunzy Jesúz bwieꞌ yâme.
9 Lóni gayaht yâme dahñ, ra Jesúz leeyâme:
―Na di gu laꞌd diidz lo ndruhty ni bwieꞌ laꞌd, xtâ glo naa, Mpyquie-Pshahl Dioz Lee, ba gübahñaꞌ de lahd mînguty.
10 Luxu günabdiidz xmeññ me leeme:
―¿Bia nacu ne muextr-ruuḻ yahc xleiy Moiséz nier Elíaz‑e guiaad?
11 Ra Jesúz leeyâme:
―Ni uli we leeu nier Elíaz guiaad, no leeme guistziaawy gyreu.
12 Per naa gapyaꞌ laꞌd, Elíaz ba biahd me, no nehx bzaclo meññ leeme, mazyg ptzoo yâme leeme nitisy gucladzy yâme; no mod-wé gahc‑e ctzoo csahc yâme naa, Mpyquie-Pshahl Dioz Lee.
13 No were gunn xmeññ me de Juaṉ ni rchôbnihs‑e ganii me.
Psiaḻ Jesúz to ñobywiñ ni nu mbenahcsy lee
(Mr. 9:14-29; Lc. 9:37-43)
14 Ru bydzihñ yâme ru dxie meññ-xtahl‑e naꞌ, gübigy to mpyquie no bisshiby me lo Jesúz, ra me lee:
15 ―Señor, bioob dñoobyaꞌ, porni rnahzy mbeꞌ leeme, no rtzoo rsahcu leeme; xtahl vuelt riahb me lo gue o lo nzeꞌ.
16 Bidnon leeme lo xmeññiꞌ, per di ñaḻ nsiaḻ yâme leeme.
17 Hor-bieññ Jesúz nirieꞌ, ra me:
―¡Laꞌd ni nu ni naꞌ, nehx rlíladzy laꞌd naa no meññ-dirquihñ laꞌd! ¿Xtâ buc rapaꞌ de ni tzun lahd laꞌd? ¿Xtâ buc beeiy ctibdadzyaꞌ laꞌd? Lâ guidno leeme neꞌ.
18 Were güdeḻy Jesúz mbenahcsy, no güloo meu ñobywiñ, no glohdy dze-caḻ biaꞌn me nzaꞌg.
19 Luxu, ba diby lad no ru ba lehzy yâme, günabdiidz xmeññ Jesúz leeme, ra yâme:
―¿Bia nacu noꞌ di ñaḻ mboo noꞌ mbenahcsy?
20 Ra Jesúz leeyâme:
―Porni uxiee rlíladzy laꞌd; gapyaꞌ laꞌd ni uli, bâḻ nlíladzy laꞌd nîcze doozy, beeiy ña laꞌd dañ-wé: “Byruu de neꞌ, bicchie sto lad”, no dahñ nruuw; no mbehty nehx ñacngann par laꞌd.
21 Per zâ mbenacsy-wé nehx beeiy nruuw sinn gnab meññ lo Dioz no sinn ctzoo meññ ayun.
Ni byrohp vuelt ganii Jesúz de ni gaty me
(Mr. 9:30-32; Lc. 9:43-45)
22 Hor-nu Jesúz no xmeññ me lo ṟegioṉ-Galilea, ra me leeyahc:
―Naa Mpyquie-Pshahl Dioz Lee; zdee dxuhch naa lo ña meññ-rdziadzyno naa,
23 no zgaꞌdy yâme naa; per lo tzonn dzé zbahñaꞌ gyzac.
Hor-bieññ yâme ni günii me, güyuꞌ yâme trixd.
Ni riax mpuezd par idoró
24 Hor-bydzihñ Jesúz no xmeññ me Capernaum, güya meññ-rcuquix ximpuezd idoró, ra yâme Pedr:
―¿Xmuextriꞌ nehx rguix me mpuezd par idoró la?
25 Ra Pedr leeyâme:
―Rguix me.
Luxu, güyuꞌ Pedr leññ yuꞌ no dgueññ ziaꞌ gynii me, nier Jesúz ra leeme:
―¿Sca nac lii, Simóṉ? Meññ ni rtzoo mdad neꞌ lo guiedzylie, ¿dxu rcuquix yâme mpuezd lee? ¿Xmeññ yâme la, o meññ-zrieñ lad?
26 Ra Pedr leeme:
―Meññ-zrieñ lad.
Ra Jesúz leeme:
―Xmeññ yâme we ba riaꞌn di rguix.
27 Per lehdy di gydziaꞌdzy ndruhty, güya coo nisdoo no bráḻ guiatz-mbaḻ leññ nzeꞌ, no mbaḻ ni gbooy nier lee la, leññ ruꞌ maꞌ gydzialiꞌ medy ni ziygahl par quixiꞌ mpuezd; tziynoyu no quixiꞌ xchieñ gyrop nó.