2
Diidz par xmeññ Dioz ni nu Éfeso
1 ’Bzaa nirieꞌ lo guehtzy par ángel ni nuno xmeññ Dioz ni nu Éfeso: “Ni caꞌ gahdzy mbial lo ña-drech no ni rdedyria glaꞌy ru zu gahdzy candeler-or, nirieꞌ we ni ne me:
2 Naa nannaꞌ gyre ni rtzoo laꞌd, no modni rtzoo laꞌd xtziiñ Dioz no nehx rxiññladzy laꞌdu, no nehx riuꞌladzy laꞌd tzu meññ lahd laꞌd ni rtzoo gyrehzy ni nahcsy. No gax bwieꞌ laꞌd bâḻ uli ni rnii meññ-ne lee nac apóstl, per nehx uliu apóstl leeyâme, no bzaclo laꞌd meññ-risquiee we leeyâme.
3 No nannaꞌ gadedy laꞌd gyrehzy ni nadz porni nac laꞌd dmeññaꞌ, no nehx rxiññladzy laꞌd, no nehx rrugan laꞌd.
4 Per naa nun contr laꞌd por to ni gatzoo laꞌd ni nehx riuꞌdadzyaꞌ: ba nehx rzacbeeiy laꞌd naa mod-bzacbeeiy laꞌd naa tzcaḻ, dze-guzlo galíladzy laꞌd naa.
5 Leewe, lâ guitsêlou laꞌd bá glo günahzy laꞌd gydze guîlriehñ, lâ csaan ni nahcsy ni gatzoo laꞌd, no lâ ctzoo mod-ptzoo laꞌd dze-leer guzlo rlíladzy laꞌd naa. Bâḻ di csaan laꞌd ni nahcsy ni gatzoo laꞌd la, siaḻaꞌ ngueeḻy gahc, guidloon xcandeler laꞌd.
6 Per nu ni gatzoo laꞌd mos de ni néladzy laꞌd ni nahcsy ni rtzoo meññ-nac yahc nicolaítas, ni zegahc nédadzyaꞌ ni rtzoo.
7 Dxu racladzy gann, yquee ihqy ni gaya Spirt-Sant xmeññ Dioz. Meññ-rtibladzy ni nadz xtâ ctzoo gan, wé we gdedyaꞌ ñahz gahgü de lo yahg ni rdee guîlmbahñ, ni nu gybaa ru nu Dioz.”
Diidz par xmeññ Dioz ni nu Esmirna
8 ’Bzaa nirieꞌ lo guehtzy par ángel ni nuno xmeññ Dioz ni nu Esmirna: “Naa ba gahc nun xtâ ba xtze diaa no nehx zdibylgaa de ni nun, no guhtyaꞌ per gübahñaꞌ gyzac, no nirieꞌ we ni ganin:
9 Naa nannaꞌ gyre ni rtzoo laꞌd, no de ni gadedy laꞌd xtahl ni nadz, no nannaꞌ xguîlpobr laꞌd, per rahp laꞌd to guîlṟicü leññ xguîlmbahñ laꞌd. No nannaꞌ lguia didz-nahcsy contr laꞌd ni rnii to cuib meññ ni ne leeyahc nac meññ-Isṟael, per lidxi xmeññ bêndzab leeyâme.
10 Di gydzie laꞌd ni nadz ni dzictedy laꞌd; porni bêndzab zguꞌ me lahd laꞌd lidzyguiib par güieꞌ me bâḻ ulihbu stibladzy laꞌd, no modé gzacno laꞌd leññ tzii dzé. Per di csaꞌn de ni rlíladzy laꞌd naa xtâ glo gaty laꞌd, no naa zdedyaꞌ laꞌd guîlmbahñ ni nehx zluhx ni zidguiahc beeiy coron ni rdee diidz ba ptzoo laꞌd gan.
11 Dxu racladzy gann, yquee ihqy ni gaya Spirt-Sant xmeññ Dioz. Meññ-rtibladzy ni nadz xtâ ctzoo gan la, ni rrohp guîlguhty nehx stzoo leeyâme mbehty.”
Diidz par xmeññ Dioz ni nu Pérgamo
12 ’Bzaa nirieꞌ lo guehtzy par ángel ni nuno xmeññ Dioz ni nu Pérgamo: “Nirieꞌ we ne ni caꞌ to spad ni ndush gyrop ruꞌ:
13 Naa nannaꞌ gyre ni rtzoo laꞌd, no de ni nu laꞌd leññ to guiedzy ru rtzoo bêndzab mdad. Per nîcze ze leeu, nehx rrusytzu laꞌd de naa; no nîcze leññ guiedzy-rieꞌ ru nu bêndzab biꞌdy yâme to dmeññaꞌ ni le Antipas, ni nehx psaꞌn de ni bdee diidz de naa, per nehx por niwé nsaꞌn laꞌd de ni rlíladzy laꞌd naa.
14 Per naa nun contr laꞌd por zrieñ ni gatzoo laꞌd ni nehx riuꞌdadzyaꞌ: lahd xmeññ laꞌd nu meññ-di ne yahc csaꞌn mod-bluu to mpyquie ni güyuꞌ ba xtze ni le Balam. Leeme bluu Balac xnahc gletyrxan me meññ-Isṟael, lehdy gahgü yâme ni ba guhc gun par cuentz figur, no seno yâme ni nehx tziahl yâme.
15 No nu zrieñ xmeññ laꞌd ni zegahc di ne csaꞌn mod-bluu sto cuib meññ ni le nicolaítas.
16 No leewe, lâ csaan ni nahcsy ni gatzoo laꞌd; o bâḻ yac la, naa siaḻaꞌ ngueeḻy gahc contr laꞌd, no teḻynon leeyâme no spad ni rruu drun.
17 Dxu racladzy gann, yquee ihqy ni gaya Spirt-Sant xmeññ Dioz. Meññ-rtibladzy ni nadz xtâ ctzoo gan, wé we zdedyaꞌ maná gahgü ni nungaꞌdzy; no zdedyaꞌ lee to guie ni nquitzy ni queꞌ to le-coby lo, ni ndruhty nehx rzaclo, nunzy meññ-rcaꞌ leeu.”
Diidz par xmeññ Dioz ni nu Tiatira
18 ’Bzaa nirieꞌ lo guehtzy par ángel ni nuno xmeññ Dioz ni nu Tiatira: “Nirieꞌ we ni ne Xiiñ Dioz ni zidguiahc byzalo beeiy bial, no ni rzaagy nieꞌ beeiy bronz ni byruu lo gue:
19 Naa nannaꞌ gyre ni rtzoo laꞌd, no blaty mdid xguîlndzi laꞌd, no blaty mdid rlíladzy laꞌd naa, no blaty rtzoo laꞌd dziiñ no de ni nehx rxiññladzy laꞌd; no nannaꞌ ma gatzoo laꞌd dziiñ ngâstoo que dze-leer guzlo laꞌd.
20 Per naa nun contr laꞌd por to ni gatzoo laꞌd ni nehx riuꞌdadzyaꞌ: gadee laꞌd ñahz to ngünaa ni le Jezabel, ni ne nac profet gayisquiee me dmeññ yahcaꞌ, no galuu me leeyâme seno yâme ni nehx tziahl yâme, no de ni gahgü yâme ni ba guhc gun par cuentz figur.
21 Naa ba bdedyaꞌ tiémp leeme par csaan me ni nahcsy ni gatzoo me, per di ne me, no di ne me csaꞌn de ni rzeno me ni nehx tziahl me lee.
22 No leewe cshaalaꞌ to guîlguihdz par leeme, no cshaalaꞌ gyrehzy ni nadz par meññ ni rzeno leeme, bâḻ di csaan yâme ni nahcsy mod-gatzoo ngüna-wé,
23 no zgatyaꞌ xmeññ me togahcs. Ctzon ze lehdy gann gyre xmeññ Dioz naa rzacloꞌn xtâ leññ xguîlmbahñ meññ, no nannaꞌ bia rnii leññ ihqy yâme; no naa zguixaꞌ to to meññ no mod-rtzoo.
24 No zrieñ laꞌd ni nu leññ guiedzy-rieꞌ, ni nehx gatzoo mod-galuu ngüna-wé, no nehx byzeedy laꞌd ni ne yâme guîlnann ni nungaꞌdzy xchieñ bêndzab, gapyaꞌ laꞌd: Naa nehx stzon mdad ctzoo laꞌd zrieñ ni zidguiahc beeiy yuu;
25 per di csaꞌn laꞌd de ni rlíladzy laꞌd naa xtâ glo dzé ni guiaḻaꞌ.
26 Meññ-rtibladzy ni nadz xtâ ctzoo gan no nehx csaꞌn de ni ctzoo mod-racdadzyaꞌ glo gylux guiedzylie, wé we zacnon lee lehdy ctzoo mdad zaꞌgndzi meññ-gyre nacióṉ,
27 scâsy mod-gucno dTadaꞌ naa; no stzoo yâme mdad zaꞌgndzi meññ-gyre nacióṉ no beeiy to var-guiib, no modé stzudé yâme nacióṉ lé beeiy rlaꞌy to guius-yu.
28 No zegahc zdedyaꞌ to guîlbyniꞌ leeyâme, beeiy to mbial-ro ni rlahñ nchuulr.
29 Dxu racladzy gann, yquee ihqy ni gaya Spirt-Sant xmeññ Dioz.”