5
Xiily no guehtzy ni ndooby
1 No bwien lo ña-drech ni dxie ru rtzoo mdad caꞌ to guehtzy ni ndooby; no gyrop ladu güyaa letr, no ndaagü dziꞌdzy no gahdzy sell.
2 No bwien to ángel ni beeiyu lee, ganii me ndip, ne me:
―¿Dxu rsahc par cchuꞌ sell ni queꞌ guetzy-wé ni ndooby no nshal leeu?
3 Per ni gybaa, ni lo guiedzylie, ni leññ yu, nehx nu dxu beeiy nshal guetzy-wé no guuḻ lou.
4 Guzlo modni binaꞌ, porni nehx rdzial ndruhty ni rsahc par cshal guetzy-wé no guuḻ lou.
5 Were to de lahd mînguhl ni rahc ni rnii ra naa:
―Di guuniꞌ mazy. To ni ra meññ lee Leóṉ xchieñ meññ-Judá, ni ziaad de lo xfamily ṟeiy-Davit, leeme we ni ptzoo gan, no leeme we beeiy cchuꞌ gydiby gahdzy sell ni queꞌ guetzy-wé no cshal meu.
6 Luxu bwien glawy ru rbia ni rtzoo mdad no glawy de ru dxie gydap ni mbahñ yahc no gydiby veinticuatr mînguhl ni rahc ni rnii, zu to Xiily, rluu maꞌ beeiy ni guhty par guhc to gun. Rahp maꞌ gahdzy cach no rahp gahdzy byzalo maꞌ ni zidguiahc beeiy gahdzy spirt xchieñ Dioz ni pshahl me gydo lo guiedzylie.
7 Were gübigy Xiily no cuaꞌ guetzy-wé de lo ña-drech ni dxie ru rtzoo mdad.
8 Lóni cuaꞌ Xiily guetzy-wé, gydap ni mbahñ no gydiby veinticuatr mînguhl ni rahc ni rnii bisshiby yâme lo Xiily. No gyre yâme caꞌ ni rsehdzy yâme ni le arp, no caꞌ yâme cop de or, leññu nu yahl ni zidguiahc beeiy gyre ni rnab meññ lo Dioz, meññ ni nu no Dioz.
9 No gayuuḻ yâme to himn-coby, ne yâme:
Lii we rsahc par ycaꞌ guetzy-wé, no cchuꞌy gyre sell ni queꞌ leeu;
porni lii guhtyiꞌ par guhquiꞌ to gun, no pshieꞌ xrieñiꞌ par güxiiy meññ par Dioz,
de lo gyre ṟaz meññ, no de lo gyre clasy xtiidz meññ, no de meññ-gyre guiedzy, no de meññ-gyre nacióṉ.
10 Ptzooy leeyâme meññ ni rtzoo mdad tohzy no lii,
no ptzooy leeyâme bahl par ctzoo xtziiñ tDioz nó,
no stzoo yâme mdad lo guiedzylie.
11 Luxu bwien, no bieññaꞌ xriedz xtahl ángel, millóṉ no millóṉ yâme ni nu gybi ru rbia ni rtzoo mdad, no gydap ni mbahñ, no gahc mînguhl yahc ni nac guxtisy.
12 No ángel yahc ganii yâme ndip, ne yâme:
Xiily ni guhty par guhc to gun,
wé we rsahc de ni tzu gyreu lo ña, no lo ña me nu gyre guîlṟicü,
no nu guîlnann, no ndruhty nehx stzoo gan lee,
no rsahc ni nac, no rahp guîlbyniꞌ, no ni tzuguia.
13 No bieññaꞌ zegahc, gyre ni mbahñ ni nu gybaa, no ni nu lo guiedzylie, no ni nu leññ yu, no ni nu lo nisdoo, ne yahc:
¡Ni dxie ru rtzoo mdad, no zegahcu Xiily,
wé we ni tzuguia, no ni rsahc ni nac, no ni rahp guîlbyniꞌ, no ni beeiyu lee,
no di tzu dzé gydibylgaa de ni tzuguia!
14 No gydap ni mbahñ ne:
―¡Modé gacu!
No gydiby veinticuatr mînguhl ni rahc ni rnii, bisshiby yâme no bzacbeeiy yâme ni dxie ru rtzoo mdad, no zegahc bzacbeeiy yâme xiily.