17
Mén ne rlag ste mén lo dol
(Mt. 18:6-7, 21-22; Mr. 9:42)
1 Re Jesus lo yra xpén Ne:
―Syemper zuu ne ysegyee lextoo mén ne gyab men lo dol; per ¡prob mén ne ysegyee lextoo semén ne gyab men lo dol!
2 Mazre wendee por laa men yliib mén te gyenzhoo ne rkyiinen molin lenyen men, lex ytxoon mén men lo nisdoo, ke ne ysegyee men lextoo te men ne gyed wzelondxee rlaleedx noo ne ye men dol.
3 Gugap kwent.
’Belne nuu pe dol rlaa xkompanyer de de, gugakndux lo men; belne ysaan meno, gugun men perdon.
4 No belne nuu pe rlaa men de guedx tir te dxe, belne rberee men guedx tir nan men lo de: “Ybereedetre noo ylaa noo we”, rap de degne gun de men perdon.
Men ne rlaan ne ylaleedxre Dëdyuzh
5 Re yra xpoxter Jesus lo Ne:
―Gulaa ne ylaleedxre noo Dëdyuzh.
6 Lex re Ne lo men yra men:
―Belne rlaleedx de Dëdyuzh mase medid landxel te medx lyagwlizh, zun de gan gue de lo yagree: “Gulaaz nee, gutsa sob de lo nisdoo”, no zono xdiiz de.
Logne rap te mos degne ylaa men
7 ’¿Txu laa de yra de ne rap te mos ne ragaan yuz o ne rapkwent yuz, zegne rberee men, nangue de lo men: “Gutee sob de lo mezh chen gu de”?
8 Lel nan de lo men: “Guzhexkwaa xsëë. Gukaa xmandil de lo xab de, gugaa nesyaa guxsëë noo, axtegue ne luzh gu gootee noo; lex gu de, goo de.”
9 Axtegue ni dexkyizhtee rdeedet de lo men por ne wlaa men yra ne rkyeen de.
10 Zenga ke laa de yra de, chene che wlaa de yra ne rkyeen Dëdyuzh, rap de degne gue de: “Mos ne bat rkyiindet nak be, porke nonchee ne rap be degne ylaa be, neguin wlaa be.”
Wneseyaken Jesus chii mén ne rzak gyiz ne la lepra
11 Ne za Jesus Jerusalén, wdee Ne yra gyëz ne nak lo lyu ne la Samaria no le lo lyu ne la Galilea.
12 Ne wdxiin Ne te gyëzwin, wa chii mén ne rzak gyiz ne la lepra watsëlo men Ne, per wbigdet men axtegue lo Ne.
13 Lex wkarëz men, re men:
―¡Jesus, Maxter, gules lextoo de noo yra noo!
14 Chene wii Ne men, re Ne lo men:
―Gutsa lo fxuz gutsaluu led de.
Nëzgue za men, wyaken led men.
15 Ne wii te mén guin ne wyaken men, wberee men, lex ndípse wnii men wzaknon men Dëdyuzh.
16 Wzuzhib men lo Jesus, wlitlo men axtegue wtee lo men lyu, wdee men dexkyizhtee lo Ne. Men-Samaria nak men.
17 Orguin re Ne lo men:
―¿Pe let chiidet nak de yra de ne wyaken? ¿Gozh men sgaa men?
18 ¿Pe nonchee menzitree nak ne wberee ne saknon Dëdyuzh?
19 Orguin re Ne lo mén guin:
―Gusuli, gugya; por ne wlaleedx de noo, wyaken de.
Gan pa or gak ne rkyeen Dëdyuzh
(Mt. 24:23-28, 36-41)
20 Wnabdiiz yra men ne nak farisew lo Jesus gan pa or gak ne rkyeen Dëdyuzh, lex wke Ne re Ne:
―Ne rkyeen Dëdyuzh nakdeto ne gak kwii mén.
21 Guedet mén: “Le we nee”, o “Le we wa”; porke le ne rkyeen Dëdyuzh che kayak lad de yra de.
22 Zhich guin re Ne lo yra xpén Ne:
―Sdxiin dxe ne ylaan de kwii de Men ne wdxiid wak Mén mase tendxee dxe, per kwiidet de men.
23 No zuu mén ne yna lo de: “Le men zu nee”, o “Le men zu wa.” Per tsadet de, ni tsanaldet de men.
24 Porke zegne raknyoo rkabtsa ne reep nis gyeybaa rnëëzo nesree nesrotee, zenga gak chene ydxiin dxe ne chiid Men ne wdxiid wak Mén.
25 Per primer rap men degne kesentyent gak men sufrir, no ylaandet mén ne nuu naaree men.
26 Zegne wak tyemp ne wuu Noé, zenga ke gak chene chiid Men ne wdxiid wak Mén.
27 Porke cheguin ru mén, roo mén, rtsëlnya mén, rdee zhinzaap mén rtsëlnya, axtegue ne le Noé wdee lenbark; wyab gyoroo gyoduxtee, wketo men yrandxee men.
28 Zenga ke wak tyemp ne wuu Lot: ru mén, roo mén, rzii mén, rtoo mén, rguu mén bni, rzaa xyuu mén;
29 per chene le Lot wruu Sodoma, wlen gyi gyeybaa no le ne la azufre, wketo yrandxee mén.
30 Zenga ke gak chene ydxiin dxe ne chiid Men ne wdxiid wak Mén.
31 ’Chene ydxiin dxe guin, men ne zob xtoo xyuu rap men degne yzhoon men, koodet men ne nuu lenxyuu men; men ne zu den ybereedet men gya men ruxyuu men.
32 Gukanzaleedx ne wzak xewnaa Lot.
33 Men ne rkaa xgyelembán lextoo, zako perdid; per le men ne rboleedx xgyelembán, zap men gyelembán ne nunk luzhdet.
34 ’Yna noo lo de yra de ne gyëël guin ne chiid Men ne wdxiid wak Mén, ledne nex txup mén te lo loon, te men gya, te men gyan.
35 Zenga ke ledne kayuut txup wnaa, te men gya, te men gyan.
36 No ledne zu txup mgyeey den, te men gya, te men gyan.
37 Lex wnabdiiz men lo Ne, re men:
―¿Pazh gak negwa, Dechey?
Wke Ne re Ne:
―Zaknyoogoo zegne raknyoo ledne nex mawet, rdop ngolo.