Bedichiaꞌ nzeꞌcaꞌ Jesucristo nú uquieꞌe San Marcos
1
Chenu uzeteꞌ Juan Bautista bee bene Stichiaꞌ Diose
(Mt. 3:1-12; Lc. 3:1-9, 15-17; Jn. 1:19-28)
Singuie uquixie bedichiaꞌ nzeꞌcaꞌ Jesucristo, Lliꞌñi Diose. Huaꞌtu uhuañi tucu profeta enu lee Isaías enu uquieꞌe lunú uni Diose, nu uni Diose:
Xeꞌlaa tucu benea cha rluti lulu,
para nú tsu tsiñialla bee bene nú zucuꞌ bee bene stichiaꞌlu.
Lu tucu dañi achi elu la nucuaꞌa bee bene
yeneꞌ bee bene chi benequieꞌ nú nilla:
“Utsu tsiñahua arquiꞌhua xne nzeꞌta liꞌinu enu neca Dioseꞌahua.
Utsanaꞌ arquiꞌhua stulahua para nú yucu arquiꞌhua stichiaꞌnu.”
Uzaꞌ bee bedichiaꞌ quieꞌ chenu ubeꞌta Juan urinzalla bee bene unga nucuaꞌ lu tucu dañi achi elu la nucuaꞌa bee bene, nu unilla:
―Ucheꞌehua arquiꞌhua lu stulahua nu uzuꞌcuꞌhua nú rni Diose, para nú riꞌi Diose perdona liꞌihua che rinzahua.
Chequie uchiuꞌu huaxi bee bene lubee iliu Judea cuna bee bene eyeche llene Jerusalén uriñabeei lu Juan para nú yeneꞌbeei nú rnilla. Che uxucuꞌdulabeei stulabeei nu urinza Juan liꞌibeei reꞌcu Jordán.
Xucu Juan necacheꞌ ichiatsuꞌ camello nu sinchiu nú riuꞌu xlaꞌculla necacheꞌ iti, nu elubacu nú udaculla neca xeꞌchiu cuna lliña dañi. Udixiuleꞌella lubee bene zeꞌe nú unilla:
―La leꞌe nú nzeꞌta tucu bene enu chiquiꞌ nibiyaꞌ luquela liꞌá, niꞌ nú hua lucunu la yala xne neca equielánu lua. Liꞌá rrinza liꞌihua cuna inza, pero liꞌinu rinzanu liꞌihua cuna Espíritu Santo.
Chenu urinza Juan Bautista Jesuse
(Mt. 3:13-17; Lc. 3:21-22)
Bee bichia zeꞌe uchiuꞌu Jesuse eyeche Nazaret nú nchiucuꞌ lu iliu Galilea. Che uriñanu lu Juan nu urinza Juan liꞌinu reꞌcu Jordán. 10 Chenu uchiuꞌu Jesuse lu inza, ulañiꞌnu nú uyaꞌla liñibe nu nzeꞌta laca Espíritu Santo equienu. Xi neca tucu paloma. 11 Nu uyene tucu chii enza liñibe nu uni chii zeꞌe:
―Liꞌilu necalu lliꞌñia nu chiquiꞌ seꞌca liꞌilu nu ñia nzu arquia lulu.
Chenu uriꞌi bezeꞌlu preu Jesuse
(Mt. 4:1-11; Lc. 4:1-13)
12 Cheelá uriꞌi Espíritu Santo nú nza Jesuse lu tucu dañi achi elu la nucuaꞌa bee bene. 13 Zeꞌe uyaꞌnanu chiuꞌa bichia si rulaꞌ elu nucuaꞌa bee nañi dañi, che uriꞌi bezeꞌlu preu liꞌinu para nú la zucuꞌnu nú rni Diose. Pero né riꞌi bezeꞌlu ana lunu cheelá uriña bee ángeleꞌ Diose lunu nu uzibiꞌ bee ángele zeꞌe lunu.
Chenu uquixie Jesuse nú uzeteꞌnu bee bene
(Mt. 4:12-17; Lc. 4:14-15)
14 Chenu netse Juan niꞌcuꞌ uya Jesuse lubee eyeche lu iliu Galilea, nu udixiuleꞌenu bedichiaꞌ nzeꞌca lubee bene nú xa neca lunú rnibiyaꞌ Diose. 15 Singuie uninu lubee bene zeꞌe:
―Uriñala bichia nú ucuaqui uꞌna Diose huaꞌtu. La acaxeaꞌ nú enta nú nibiyaꞌ Diose lu iliulabe quieꞌ. Enzeꞌe utsanaꞌ arquiꞌhua stulahua nu uchili arquiꞌhua bedichiaꞌ nzeꞌcaꞌ Diose.
Ubixia Jesuse tacu bee bene enu rucu bee bela para nú aca beella bee beneꞌnu
(Mt. 4:18-22; Lc. 5:1-11)
16 Chenu udete Jesuse ruꞌu inzatuꞌ Galilea ulañiꞌnu Simón cuna bichii Andrés nú siꞌqui beei ixiu nú rucu bela lu inzatuꞌ zeꞌe xne neca beei enu rucu bela. 17 Chequie uninu lubeei:
―Utequiehua liꞌá para nú zeteahua nú nihua lubee bene para nú aca beei benea luhuare nú rucuhua bee bela.
18 Hora zeꞌe utsaꞌna beei ixiu nú rucu bela nu chu nzequie beei liꞌinu che. 19 Lleꞌnatsia enza lu zeꞌe ulañiꞌ Jesuse Jacobo cuna Juan neca beei llianaꞌ tucu bene enu lee Zebedeo. Nucuaꞌa beei liñi barcoꞌ beei rquielaꞌ beei ixiu nú rucu bela. 20 Nu ubixia Jesuse liꞌibeei, che utsaꞌna beei paꞌ beei cuna bee mozoꞌ beei liñi barco nu chu nzuebeei cuna liꞌinu.
Chenu uriꞌiyeca Jesuse tucu bene enu seca ichiaꞌ benechiquiꞌ
(Lc. 4:31-37)
21 Chenu uriña beella cuna Jesuse eyeche Capernaum. Bichia nú sulachi bee bene Israel, uyuꞌunu liñi induꞌ beella nu uquixienu uzeteꞌnu bee bene zeꞌe. 22 Chiquiꞌ nzenu arquiꞌ bee bene zeꞌe lunú seteꞌnu xne seteꞌnu bee bene xi neca tucu bene enu chiquiꞌ rnibiyaꞌ nu bee ulaxcuela enu reca leyꞌ Moisés la zeteꞌ beei scua. 23 Liñi indu zeꞌe nzucu tucu niyu enu nchiñi benechiquiꞌ arquiꞌ, nu rixiali niyu zeꞌe nú rni:
24 ―¿Xinu rriꞌchialu liꞌiru Jesuse bene eyeche Nazaret? ¿Uriñalu para nú nitilulu liꞌiru la? Nuꞌlua liꞌilu nú necalu beneꞌ Diose nu la luꞌculu dula.
25 Chequie uriꞌinu nú uquiꞌyaꞌ benechiquiꞌ nu uninu:
―¡Uzaca nu uchiuꞌu arquiꞌ niyu quieꞌ!
26 Che utsiꞌqui benechiquiꞌ niyu zeꞌe lu yuu, nu uriꞌi ichia ziñia lu niyu zeꞌe. Nu chiquiꞌ juerte rixialii nu chu uchiuꞌi arquiꞌ niyu zeꞌe. 27 Che ye bee bene enu nucuaꞌa zeꞌe uyanu arquiꞌbeei nú unibeei lu saꞌbeei:
―¿Xi nucuaꞌ? Nú, ¡necheꞌe seteꞌ nucuaꞌ liaꞌahua chiquiꞌ rnibiyaꞌ nucuaꞌ hasta bee benechiquiꞌ sucuꞌ nú rni nucuaꞌ!
28 Scua yexetsia uriꞌchia bedichiaꞌ diqui lu iliu Galilea lunú uriꞌi Jesuse.
Uriꞌiyeca Jesuse suegraꞌ Pedro
(Mt. 8:14-15; Lc. 4:38-39)
29 Chequie chenu uchiuꞌu beella liñi indu zeꞌe. Nzenu Jesuse, Jacobo cuna Juan niꞌ Simón cuna Andrés. 30 Zeꞌe nuxu suegraꞌ Simón nu secalla xlee. Chequie chenu uriña Jesuse zeꞌe, udixiuleꞌe beei lunu nú ritilla. 31 Chequie uyabicanu elu nuxulla nu unaꞌtsenu yalla nu uletsanu liꞌilla. Hora zeꞌe uchiuꞌu xlee nú secalla. Che udeteꞌlla nú udacu beella.
Uriꞌiyeca Jesuse huaxi bee bene enu riti
(Mt. 8:16-17; Lc. 4:40-41)
32 Chenu uhuatseꞌ bichia nu enta chuꞌu rulaꞌ. Uquixie bee bene nú uriñayu beei ye bee bene enu riti cuna bee bene enu nchiñi benechiquiꞌ arquiꞌ lu Jesuse. 33 Uyetesaꞌ ye bee bene eyeche zeꞌe ruꞌu niꞌi elu nzucunu. 34 Uriꞌiyeca Jesuse bee bene enu riti ye luu bee elichia nú seca beei, cuna nú uhuanu bee benechiquiꞌ arquiꞌ bee bene. Pero né zelanu nú ani bee benechiquiꞌ, xne nuꞌlu beei liꞌinu.
Uzeteꞌ Jesuse Stichiaꞌ Diose lubee bene lu iliu Galilea
(Lc. 4:42-44)
35 Chenu lá yeꞌe lu yuu nu necabescaꞌ nzu uzetee Jesuse nu uchiuꞌunu eyeche zeꞌe nu nzanu tucu luhuare elu lecalí ti nuꞌ para nú nacuꞌnu lu Diose zeꞌe. 36 Chequie uya Simón cuna beelá bee bene enu neyeteꞌi nu uyacuaꞌna beei Jesuse. 37 Chenu ullelaꞌ beei liꞌinu, unibeei lunu:
―Huaxi bee bene rcuaꞌna liꞌilu.
38 Che uninu lubeei:
―Chaꞌahua lubee eyeche axu caꞌa para nú leꞌca ixiuleꞌa Stichiaꞌ Diose lubee bene cuaꞌ xne enzeꞌe uriña.
39 Che udixiuleꞌenu Stichiaꞌ Diose lubee bene liñi bee induꞌ bee bene Israel diqui lu iliu Galilea. Nu uhuanu benechiquiꞌ arquiꞌ bee bene.
Uriꞌiyeca Jesuse tucu bene enu ulleꞌca elichia nú lee lepra
(Mt. 8:1-4; Lc. 5:12-16)
40 Tucu bichia uriña tucu niyu enu seca elichia nú lee lepra lu Jesuse nu utsu lliquii lunu nu uni:
―Tunu laca arquiꞌlu nuꞌ beyaꞌ nú riꞌiyecalu liꞌá.
41 Chequie chiquiꞌ uhuaꞌa arquiꞌ Jesuse niyu zeꞌe nu uricuꞌnu yanu equiei nu uninu:
―Niarquia nú yecaꞌlu, uyecaꞌ nee.
42 Chenu uninu scua, hora zeꞌe uyecaꞌi elichia nú secai nu lecaꞌ xi nai. 43 Che uduꞌ nziunu liꞌi nu uninu lui:
44 ―Nia lulu nú la ixiuleꞌelu nucuaꞌ lu niꞌ tucu bee bene nú xa uyecaꞌlu. Lu uleꞌyatsia uquiatixiuleꞌe nú uyecaꞌlaꞌlu. Che deteꞌlu tucu uꞌna lu Diose tucu nú unibiyaꞌ Moisés, para nú riꞌi bee bene beyaꞌ nú uyecaꞌlaꞌlu.
45 Pero chenu nzia niyu zeꞌe, né tsacuꞌ arquiꞌi. Aꞌla mase udixiuleꞌi lu titse bee bene nú xa uriꞌiyeca Jesuse liꞌi. Enzeꞌe leca modo nú achuꞌu Jesuse lu niꞌ tucu bee eyeche zeꞌe. Enzeꞌe enzetsianu dañi elu lecaꞌ niꞌi bee bene. Pero uyascaꞌ huaxi bee bene bee eyeche diqui abenchilaꞌ zeꞌe elu nzucunu.