11
Uyuꞌu Jesuse eyeche Jerusalén
(Mt. 21:1-11; Lc. 19:28-40; Jn. 12:12-19)
1 Chenu nzeriña beella axu Jerusalén, elu nchiucuꞌ bee eyeche nú lee Betfagé cuna Betania, eꞌya dañi nú lee Olivos, uxeꞌla Jesuse chiucu beneꞌnu,
2 nu uninu lubeella:
―Uquiahua eyeche axu nú nchiucuꞌ enza luaꞌahua, chenu riñahua eyeche cuaꞌ, zeꞌe nequietu tucu burro, enu lascaꞌ ricu bee bene. Uxeꞌchehuaií nu yeꞌta yuhuaí caꞌa.
3 Tunu nuꞌ enu nedichiaꞌ luhua xi nu xeꞌchehuaí, uniꞌhua lu bene zeꞌe nú Jesuse enu rnibiyaꞌ luru rquiꞌñanuí nu nee chu nzela yuzecaruí.
4 Chequie nzuebeella, nu ullelaꞌ beella elu nequietu tucu burro ruꞌu inziu, axu ruꞌu puertaꞌ tucu niꞌi, nu chu uxeꞌche beellaí.
5 Texcuaꞌa bee bene enu ulañiꞌ nucuaꞌ zeꞌe unidichiaꞌbeei lubee beneꞌ Jesuse nu unibeei:
―¿Xi rriꞌihua caꞌa? ¿Xi nú xeꞌchehua burro cuaꞌ?
6 Che ucuaqui beella lubee bene zeꞌe tucu nú uni Jesuse lubeella nú nibeella, esquie uzela bee bene zeꞌe nú unguyaꞌ beella burro zeꞌe.
7 Che uriñayu beella burro zeꞌe lu Jesuse. Nu uricuꞌ beella xucu beellaequieí, nu chu uricu Jesuse equieí
8 Leꞌca ucuaꞌa huaxi bee bene xucu beei lu inziu elu detenu, nu texcuaꞌa beei uchiecuꞌ leca ucuaꞌa beei lu inziu elu detenu.
9 Chequie bee bene enu nzuculu lunu cuna bee bene enu nzeꞌtaquie liꞌinu, rixiali beei nú unibeei:
―¡Chiquiꞌ neca equie nú rriꞌi Diose! ¡Cheꞌtsalá Diose equie cuendaꞌ liꞌinu enu nzeꞌta lu cuendaꞌ Diose!
10 ¡Cheꞌtsalá Diose equie cuendaꞌ liꞌinu enu nzeꞌta nú nibiyaꞌ, tucu nú unibiyaꞌ arre David beneꞌahua enu udetela! ¡Chiquiꞌ neca equie nú rriꞌi Diose liꞌinu enu nzucu liñibe!
11 Che uyuꞌu Jesuse eyeche Jerusalén nu uyuꞌunu liñi indu llene Jerusalén. Chenu ulaxu nú ubiꞌyanu ye nú nuꞌ zeꞌe chu nzanu eyeche Betania cuna chiꞌchiucu bee beneꞌnu, xne ucheela bichia zeꞌe.
Uni Jesuse nú bichi aca higuera
(Mt. 21:18-19)
12 Bichia rrucu, chenu nze chiuꞌu beella eyeche Betania, uquixie nú ulianaꞌ Jesuse.
13 Istu ulañiꞌnu tucu aca higuera nu nuꞌ leca niyeꞌe lue, nu chu uyabicanu lue tunu ca nuꞌ higo lue acunu, pero leca ndixi lue nuꞌtsia leca lue, xne la aca tiembu nú rayue.
14 Chequie uni Jesuse lu aca higuera zeꞌe:
―¡Lecaꞌ xunga acu bene ndixi nú rayu lulu!
Ubeneꞌ bee beneꞌnu nú uninu scua.
Utiliacaꞌ Jesuse bee bene enu ruti cuna bee bene enu sii labe eleꞌyaꞌ indu Jerusalén
(Mt. 21:12-17; Lc. 19:45-48; Jn. 2:13-22)
15 Chenu uriña beella eyeche Jerusalén, uyuꞌu Jesuse ruꞌu eleꞌyaꞌ Indu llene Jerusalén nu uquixienu uluanu bee bene enu ruti cuna bee bene enu sii zeꞌe. Nu utelletanu mexaꞌ bee bene enu xiꞌla dimi cuna nú utsiꞌquinu xletaꞌ bee bene enu ruti bee paloma zeꞌe,
16 né zelanu nú achuꞌu nulá bee bene steneꞌ beei ruꞌu eleꞌyaꞌ indu zeꞌe.
17 Che uquixie Jesuse nú uzeteꞌnu bee bene, nu uninu lubeei:
―Lu ichiꞌ Stichiaꞌ Diose rni: “Nia neca elu chiuꞌulee elu nacuꞌ ye bee bene iliulabe lu Diose”; pero liꞌihua rriꞌihua nia xineca yubeꞌ elu rcuaꞌa bee huanaꞌ.
18 Chenu ubeneꞌ bee uleꞌya enu rnibiyaꞌ lu beelá bee uleꞌya cuna bee ulaxcuela enu reca leyꞌ Moisés nucuaꞌ, uquixie rlaꞌna beei xa modo útibeei Jesuse xne xiqui beei liꞌinu lunú rriꞌinu, xne chiquiꞌ nzenu arquiꞌ ye bee bene lunú seteꞌnu liꞌibeei.
19 Pero chenu nzeꞌta chuꞌu rulaꞌ, uchiuꞌu Jesuse cuna bee beneꞌnu eyeche Jerusalén.
Ubichila aca higuera
(Mt. 21:20-22)
20 Stucu bichia silaꞌ udete beella elu nzucu aca higuera zeꞌe, nu ulañiꞌ beella nú ubichi aca zeꞌe hasta luue.
21 Chequie ulluꞌcu arquiꞌ Pedro, nu unilla lu Jesuse:
―Maestro, ubiꞌyacuru, ubichila aca higuera nú unilu nú bichi.
22 Nu ucuaqui Jesuse nú uninu:
―Uchili arquiꞌhua Diose.
23 Xne neli nia luhua, nú tatse bene enu ni lu dañi quieꞌ: “¡Ullunaꞌ caꞌa nu uzanaꞌ lu inzatuꞌ!”, tunu la zaꞌ arquiꞌlla chenu nilla scua, aca nú unilla scua che.
24 Enzeꞌe nia luhua nú ye nú nacuꞌhua lu Diose, nu uchili arquiꞌhua nú liquiꞌnu nucuaꞌ che yucuhuane.
25 Chenu rnacuꞌhua lu Diose, tunu nuꞌ tucu bene enu rleehua lu uriꞌihua perdona liꞌilla, para nú leꞌca esquie Diose Paꞌahua enu nzucu liñibe riꞌinu perdona liꞌihua equie cuendaꞌ stulahua.
26 Xne tunu la riꞌihua perdona bee bene, leꞌca la riꞌi Diose Paꞌahua enu nzucu liñibe perdona liꞌihua equie cuendaꞌ stulahua.
Equie nú rnibiyaꞌ Jesuse
(Mt. 21:23-27; Lc. 20:1-8)
27 Chenu uriña beella eyeche Jerusalén. Diqui nú enzee Jesuse liñi Indu llene Jerusalén, uriña bee uleꞌya enu rnibiyaꞌ lu beelá bee uleꞌya lunu, cuna bee ulaxcuela enu reca leyꞌ Moisés cuna bee usticiaꞌ bee bene Israel,
28 nu unidichiaꞌ beei lunu:
―¿Ti uliquiꞌ elu usticia nú rriꞌilu scua? ¿Nu ti uliquiꞌ elu rnibiyaꞌ nú rriꞌilu scua?
29 Che ucuaqui Jesuse nú uninu:
―Leꞌca nidichiaꞌa luhua tucu bedichiaꞌ tunu cuaquihua nucuaꞌ, che ixiuleꞌa luhua ti uliquiꞌ elurnibiyaꞌ nú rriꞌá scua.
30 ¿Ti uxeꞌla Juan Bautista? ¿Uxeꞌla Diosella la urre uxeꞌla bee benella la? Ucuaquihua nee.
31 Che uquixie beei nú ubedichiaꞌnu saꞌbeei nú unibeei:
―Tunu niaꞌahua nu Diose uxeꞌla Juan Bautista, che ni nucuaꞌ: “¿Xinu né chili arquiꞌhua liꞌilla che?”
32 ¿Leca modo nú niaꞌahua nú bene uxeꞌla liꞌilla?
Unibeei scua xne xiqui beei bee bene, xne ye bee bene nzeli arquiꞌ nú unga Juan tucu profeta enu neli udixiuleꞌe Stichiaꞌ Diose.
33 Nu ucuaqui beei lu Jesuse:
―La riꞌiru beyaꞌ ti uxeꞌlalla.
Che ucuaqui Jesuse nú uninu lubeei:
―Leꞌca la ixiuleꞌa ti uliquiꞌ elurnibiyaꞌ nú rriꞌá scua che.