8
Chenu udeteꞌ Jesuse nú udacu tacu mili bee bene
(Mt. 15:32-39)
Tucu bichia uyetesaꞌ zeca huaxi bee bene lu Jesuse nu lecaxi luꞌcu beei acu beei, che ubixia Jesuse bee beneꞌnu nu uninu lubeella:
―Ruꞌu arquia bee benequieꞌ, xne nucuaꞌa labeei chuna bichia cuna liꞌá nu lecaxi luꞌcu beei caꞌa acu beei. Tunu xeꞌlaa beei nú yue beei enza niꞌ beei nu la acu beei nuꞌ modo nú chiulaꞌ beei lu inziu xne nuꞌ beei enu nzeꞌta enza istu.
Chequie ucuaqui bee beneꞌnu nu uni beella lunu:
―¿Cá chiuꞌu nú acu bee benequieꞌ caꞌa luhuare elu lecalí ti nuꞌ?
Che unidichiaꞌ Jesuse lubeella nú uninu:
―¿Xala pá rluꞌcuhua?
Nu ucuaqui beella:
―Rlucuru achine.
Chequie unibiyaꞌ Jesuse nú cuaꞌa bee bene zeꞌe lu yuu nu unaꞌtsenu achi pá zeꞌe, nu udeteꞌnu cheꞌtsalá lu Diose equie cuendaꞌ pá cuaꞌ, nu chu udeteꞌnue ya bee beneꞌnu para nú ritsiꞌ beellae lubee bene zeꞌe. Leꞌca rluꞌcu bee beneꞌnu lleꞌna bee bela nu udeteꞌnu cheꞌtsalá lu Diose equie cuendaꞌ bela zeꞌe, nu unibiyaꞌnu nú ritsiꞌ bee beneꞌnu bee bela cuaꞌ lubee bene zeꞌe. Ye bee bene zeꞌe udacu beei hasta nú ubelaꞌ beei nu uzucu sobrascaꞌ achi llume bee pedaso nú uyaꞌna udacu beei. Neca tucu tacu mili bee bene enu udacu zeꞌe nu chu uni Jesuse lubee bene zeꞌe nú nzanu. 10 Che chu uyuꞌu Jesuse liñi barco cuna bee beneꞌnu nu nzuebeella lu iliu Dalmanuta.
Unacuꞌ bee fariseo tucu milagro lu Jesuse
(Mt. 16:1-4; Lc. 12:54-56)
11 Zeꞌe uriña bee fariseo nu uquixie beei rnixuu beei cuna Jesuse, para nú riꞌi beei preo liꞌinu, che unacuꞌbeei nú riꞌinu tucu milagro nú lubeꞌ nú nzeꞌtanu lu cuendaꞌ Diose. 12 Nu hasta aquié utsii arquiꞌ Jesuse nú uninu:
―¿Xi nú niarquiꞌhua nú riꞌá tucu milagro? Neli nia luhua nú la riꞌá niꞌ tucu milagro luhua.
13 Chequie utsaꞌnanu bee bene zeꞌe nu uyuꞌu zecanu liñi barco cuna bee beneꞌnu nu chu nzuebeella stucu chú inzatuꞌ.
Rriꞌi nú seteꞌ bee fariseo tucu nú rriꞌi levadura
(Mt. 16:5-12)
14 Uzañiꞌ bee beneꞌ Jesuse a uyaꞌ beella nú acu beella nuyaꞌtsia beella tucu pá liñi barco zeꞌe. 15 Che uni Jesuse lubeella:
―Ubiꞌyahua liꞌihua, lu levaduraꞌ bee fariseo cuna levaduraꞌ Herodes.
16 Nu uquixie beella uni beella lusaꞌbeella:
―Uninu scua xne la luꞌcuaꞌahua pá.
17 Pero uriꞌi Jesuse beyaꞌ lunú rni beella, nu uninu lubeella:
―¿Xi nú rnihua nú la luꞌcuhua pá? ¿Xieꞌ lascaꞌlí riꞌihua beyaꞌ la? ¿Xieꞌ niꞌ temeꞌ la riꞌihua beyaꞌ la? 18 Nzucu iꞌculuhua pero pianu la lañiꞌhua, nzucu diacahua pero pianu la yeneꞌhua ¿Xieꞌ la llucuꞌ arquiꞌhua, 19 chenu uritsia ayuꞌ pá lu ayuꞌ mili bee bene la? ¿Nu xala llume lunú uzucu sobra uquieteꞌsaꞌhua?
Nu ucuaqui beella:
―Chiꞌchiucune.
20 Che uni Jesuse lubeella:
―Chenu uritsia achi pá lu tacu mili bee bene, ¿xala llume uriꞌichehua lunú uquieteꞌsaꞌhua?
Nu ucuaqui beella:
―Achi llumene.
21 Chequie uninu lubeella:
―¿Xieꞌ lascaꞌ riꞌihua beyaꞌ nee la?
Uriꞌiyeca Jesuse tucu bene enu niquieꞌlu
22 Chenu uriña beella eyeche Betsaida, uriñayu bee bene tucu niyu enu niquieꞌlu lu Jesuse, nu uziquie bee bene zeꞌe lunu nú tiꞌnu yanu lu niyu zeꞌe. 23 Che unaꞌtse Jesuse ya niyu zeꞌe nu unguyaꞌnu liꞌi ruꞌu eyeche zeꞌe. Nu utiꞌnu xenenu iꞌcului, nu uricuꞌnu yanu equiei nu unidichiaꞌnu lui tunu riꞌyalai lleꞌna.
24 Nu uquixie nú riꞌya, niyu zeꞌe nu uni:
―Rlañia bee bene nú sebeei. Pero rnaa beei xi rnaa aca.
25 Chequie utiꞌ zeca Jesuse yanu iꞌcului, nu uninu lui nú biꞌyai tucutsia luhuare nu uquixie nú ulañiꞌ nzeꞌcaꞌi yeene. 26 Che uni Jesuse lu niyu zeꞌe nú yai enza niꞌi, nu unibiyaꞌnu nú la chuꞌi eyeche zeꞌe cuna nú la ixiuleꞌi lu niꞌ tucu bee bene nú xa uyeca iꞌcului.
Uni Pedro nú neca Jesuse Cristo enu uxeꞌla Diose
(Mt. 16:13-20; Lc. 9:18-21)
27 Lu lá bee nucuaꞌ, nza Jesuse cuna bee beneꞌnu lubee eyeche lu iliu Cesarea de Filipo. Chenu nzuebeella lu inziu, unidichiaꞌ Jesuse lubee beneꞌnu nú uninu:
―¿Ti rni bee bene nú necaa?
28 Chequie ucuaqui beella nú uni beella:
―Nuꞌ bee bene enu rni nú necalu Juan Bautista, nu nuꞌ bee bene enu rni nú necalu profeta Elías, nu nuꞌ bee bene enu rni nú necalu tucu bee profeta huaꞌtu.
29 Che uninu lubeella:
―Liꞌi quiehua, ¿ti rnihua nú necaa?
Nu ucuaqui Pedro nú unilla:
―Liꞌilu necalu Cristo enu uxeꞌla Diose.
30 Pero unibiyaꞌ Jesuse nú la ni beella nú ti necanu lu niꞌ tucu bee bene
Udixiuleꞌe Jesuse nú úti bee bene liꞌinu
(Mt. 16:21-28; Lc. 9:22-27)
31 Chequie uquixienu nú udixiuleꞌenu lubee beneꞌnu nú uninu:
―Liꞌá Bene enu uxeꞌla Diose chiquiꞌ nzeꞌta nú nehuana zecaa, cuna nú la yuꞌ arquiꞌ bee usticiaꞌ bee bene Israel liꞌá, niꞌbee uleꞌya enu rnibiyaꞌ lu beelá bee uleꞌya niꞌbee ulaxcuela enu reca leyꞌ Moisés, úti bee benecuaꞌ liꞌá, pero bichia rriuna huañi zecaa.
32 Chiquiꞌ neli udixiuleꞌe nzeꞌcanu lubeella lu cuendaꞌ nucuaꞌ. Chequie unguyaꞌ Pedro liꞌinu tucu chu zeꞌe nu unilla lunu nú la niaꞌnu scua. 33 Che ubelleta Jesuse nu ubiꞌyanu lubee beneꞌnu, nu uquiꞌyaꞌ Pedro uriꞌinu, nú uninu lulla:
―¡Ullunaꞌ lua bezeꞌlu! Xne elliebacuꞌ nú rriꞌilu scua la yeꞌta nucuaꞌ lu Diose, rriꞌi tsialu elliebacuꞌ tucu nú neca elliebacuꞌ bee bene iliulabe.
34 Chequie ubixia Jesuse bee beneꞌnu cuna beelá bee bene enu nucuaꞌa zeꞌe, nu uninu lubeei:
―Tunu nuꞌ bee bene enu niarquiꞌ nú aca benea, la riꞌilla tucu nú necatsia elliebacuꞌlla, rquiꞌña nú riquiꞌlla beenú nehuana zecalla che chu yeꞌta quieella liꞌá. 35 Xne bee bene enu niarquiꞌ másela lunú nehuañi lu iliulabe quieꞌ enta bichia nú nitilu nucuaꞌ, pero bee bene enu ati equie nú neca beei benea cuna equie nú uzucuꞌbeei nú rni Stichiaꞌ Diose, luꞌcu nzeꞌe nú huañi nzeꞌe lu Diose. 36 Lecaxi zibiꞌ nú riꞌi bee bene ana ye lunú nuꞌ lu iliulabe, tunu unitilulla lu Diose. 37 Xne leca modo, nú tsi bee bene nú huañilla liñibe. 38 Tunu tuꞌ tucu bene liꞌá cuna nú rni stichiaꞌa lubee bene enu rluꞌcu dula, cuna nú la chequiee beei inziuꞌ Diose leꞌca Liꞌá Bene enu uxeꞌla Diose tua bee benecuaꞌ chenu riña zecaa cuna lunú rnibiyaꞌ Pa liñibe cuna bee ángeleꞌnu.