2
Xa rquiꞌña nú nacuꞌ bee bene lu Diose
1 Nee rluti nia luhua nú nacuꞌhua lu Diose, cuna nú ziquieehua lu Diose, cuna nú diquinuꞌ arquiꞌhua nacuꞌhua lunu lu cuendaꞌ ye bee bene, nu deteꞌhua cheꞌtsa lunu lu cuendaꞌ beella.
2 Rquiꞌña nú nacuꞌahua lu Diose lu cuendaꞌ bee gobierno cuna lu cuendaꞌ ye bee usticia, para nú huañi nzeꞌcaꞌahua nu nzuxe arquiaꞌahua, cuna nú nze riꞌilaꞌahua seidu inziuꞌ Diose nu luꞌcuaꞌahua ulaꞌna tucu nú rialane.
3 Xne nucuaꞌ neca nzeꞌca nú riuꞌ arquiꞌ Diose Pa liñibe liꞌinu enu utsilaꞌa liꞌahua lu dula.
4 Nu niarquiꞌnu nú tsilaꞌa ye bee bene nu riña bichia nú chuꞌlu bee bene lunú neli neca.
5 Xne nuꞌ tucutsia Diose, nu equie cuendaꞌ tucutsia Jesucristo nuꞌ modo riña bee bene lu Diose liꞌinu enu ubeꞌta lu iliulabe xi neca tucu bene.
6 Unguti Jesucristo lu cruse para nú udixiunu equie cuendaꞌ stula ye bee bene iliulabe, nucuaꞌ neca nú ulubeꞌ Diose lubee bene chenu uriña bichia nú unga bee nucuaꞌ.
7 Enzeꞌe ucañinu liꞌá para nú aca tucu apóstolꞌnu nu ixiuleꞌa stichiaꞌnu lubee bene cuna nú zetea bee bene enu la neca bee bene Israel lunú neli neca cuna nú xa chili arquiꞌbeei Jesucristo. Nelia nú rnia scua, la zequienuahua.
8 Nee niarquia nú ye bee eyeche nacuꞌ bee niyu lu Diose nu letsa beella yabeella enza liñibe, pero la nacuꞌ beella lu Diose cuna elliebacuꞌ nú lixiu neca nu sin nu rlee bene nu sin xuu.
9 Leꞌca niarquia nú bee unaꞌa utu beenchu xucu beenchu tucu nú riala nú utu beenchu, sin nú dete xeꞌtaꞌ beenchu lunú sucheꞌe beenchu cuna oro cuna perla, cuna laquie fiño nú huaxi seca, cuna nú la tsucheꞌ xeꞌtaꞌ beenchu ichia equie beenchu,
10 xne máse neca nzeꞌca nú riꞌi beenchu lunú neca nzeꞌca, tucu nú riala nú riꞌi ye bee unaꞌa enu nzenala inziuꞌ Diose.
11 Leꞌca esquie bee unaꞌa rquiꞌña nú chii cuaꞌa beenchu nu zucuꞌ diacatsia beenchu nu la ni beenchu chenu seteꞌ bee niyu Stichiaꞌ Diose.
12 La yala nú zeteꞌ tucu unaꞌa Stichiaꞌ Diose elu rieteꞌ saꞌ bee bene para nú rieneꞌbeei Stichiaꞌ Diose xne la yala nú nibiyaꞌ bee unaꞌa lubee niyu. Sino que zucuꞌ diacatsia bee unaꞌa,
13 xne rlutilá urecheꞌe Diose Adán, cheela urecheꞌnu Eva.
14 Nu lá zequienu bezeꞌlu Adán, enu uzequienu bezeꞌlu neca Eva, nu equie nú uzequienu bezeꞌlu liꞌinchu uriꞌinchu dula.
15 Pero leꞌca tsilaꞌa Diose bee unaꞌa tunu riꞌi beenchu tucu nú riala nú riꞌi beenchu como naa nú neca beenchu, cuna nú chequieelá beenchu nú nzeli arquiꞌ beenchu Diose, cuna nú zeca beenchu bee bene, nu huañi nzeꞌca beenchu.