8
1-2 Dzigo pcaalsase bla zha bgui ne noxco rleynie Dios, güey zho güeyqueets zho Xteb; mban rac zho, bio zho xquieḻnë me.
Leṉ dze co, psilo zha ne sca rlëënie zha ne rliladz Jesús, ptsidiḻ zho grëse zha ne rliladz me; dipse leṉ guiedz Jerusalén pquianaḻ zho zho. Grëse zho bzhooṉ, zha ne zie grëraa guiedz ne ndxie nëz Judé ga, zha ne zieegaa nëz Samar; loxaque zha ne nacse poxtl biaaṉ Jerusalén.
3 Ntseeb rac Saul, rzac me tebaa zha gnitlogazh me grëse zha ne rliladz Jesús. Stib yu stib yu zie me, riebezhoo me zho lidz zho, mgui wnaasaque rey me riesëëb me zho ladzguiib.
Bdziṉ Xtiidz Jesús nëz Samar
4 Laa grë zha ne bzhooṉ Jerusalén ga, zaatne zieetaa zho rnee zho Xtiidz Jesús lo miech.
5 Zig nac Lip, zeeṉe bdziṉ me tib guiedz nëz Samar, psilo me bnee me Xtiidz Jesús lo grë miech co.
6 Ndal zho rquiaadiag miṉe rnee me, rzee zdoo zho raṉ zho grëtaa milagr ne ruṉ me.
7 Ndal grë zha ne noguitnie meṉdox, riac zho, rquiaadan grë meṉdox co redz zeeṉe laa ma rzhooṉ; grë zha ne gutoo, grë zha ne nde ni, ruṉguiac me zho.
8 Grëse miech ne no guiedz co, rley zho.
9-11 Ga no tib meṉ ne rooḻ diidz dox, lë Simón. Ye me rzee zdoo miech grë ncuaaṉe ruṉ me. Nzianle iz sca noquidie me zho, grëse meṉguiedz ruṉbey me, haxta niats rac me rnee me guieṉdraa cho zig me. Grëse zho, haxta grë zha non rbig lo me, rzac zho lëë poder ne rap Dios ga nacnie me.
12 Laa zeeṉe bnee Lip lo grë miech co gocnaṉ zho diidz ndzon ne nac Xtiidz Dios, bin zho zha racladz Dios gban zho, bin zho cho nac Jesús; grëse zha ne bliladza, mgui wnaasaque, laa zho brobnis.
13 Dzigo yeque meṉ ne lë Simón ga bliladz Jesús, ye me laa me brobnis; zaatne zieetaa Lip naḻ me zhits Lip, rzee zdoo me raṉ me grëtaa milagr nroob ne ruṉ Dios.
14 Grë zha poxtl ne no Jerusalén, zeeṉe gocnaṉ zho scataa ndal zha Samar nocaania zhiwseed Jesús, dzigo pxeeḻ zho Pedr grop Juan zie nëz co.
15 Laa zho zie gnab zho lo Dios ygaa grë zha ne bliladzle Jesús ga guieḻbiini cheṉ Espíritu Sant;
16 sac zeeṉe bliladz zho Jesús, loxaque brobnisse zho, gard ygaa zho guieḻbiini co.
17 Bdziṉ zho pxobnia zho guic grë meṉ co, bnab zho lo Dios; dzigo grëse meṉ co laa me bgaa guieḻbiini ne rdeed Espíritu Sant.
18 Zeeṉe goṉ meṉ ne lë Simón ga, ne loxaque rxobniase zha poxtl co guic grë miech co laa zho rgaa guieḻbiini ne rdeed Espíritu Sant, dzigo laa me rdeed dimi,
19 rëb me:
―Goḻneedz poder qui lo naa; zeeṉa ye naa zha ne cxobniataa naa guic ygaa zho guieḻbiini ne rdeed Espíritu Sant.
20 Pquiab Pedr rëb Pedr lo me:
―¡Bieṉ gaṉle pe rnee luu! ¿Pa bin luu ye xpoder Dios zac si miech? ¡Tebaa niinagazh nitlo luu grë xtimi luu i!
21 Ni lalnu rieguiaḻd luu guṉ luu dziin rii, ni gdziṉdgaa dze guṉ luuw; sac mbed zdoo luu, zienied guic luu guṉ luu miṉe rnabey Dios.
22 Blee zhgab yozh qui guic luu, bnab lo Dios zeeṉa togo squia zdoo me luu, guṉquizhd me luu doḻ ne squi bza zdoo luu i;
23 sac rlu niapse guieḻntseeb nonie guic luu, ni lëëque luu goṉ nosacsi luu ne squitaa noyuṉctal luu xtoḻ luu.
24 Pquiabse me rëb me:
―Goḻguṉ guieḻnzaac, goḻnab lo Dios yquia zdoo me naa, zeeṉa ygaad naa grë guieḻnëdox ne rnee to i.
25 Blozhse bzodiidznie Juan grë miech co grop me Pedr, blozhse pseed zho zho Xtiidz Dios, laa zho wbire zey zho Jerusalén stib. Guiedz ne rdedtaa zho dib xtan zha Samar ga, rnee zho Xtiidz Dios lo grë miech co.
Bzodiidznie Lip tib meṉ Etiopí
26 Laa Lip no Samar ga, tib dze brieequia tib xanjl Dios lo Lip, rëb me tsie Lip nëz ne rriee Jerusalén zie nëz Gaza.
27 Dzigo güey Lip nëz co. Tib dan ngana, lëëtaque laa tib meṉ ne nac dziin lo rein ne lë Candás zie ga, dziin nroob nac me lo rein co, sac me ngotsow grëtaa dimi ne no Etiopí.
28 Zobse me tib leṉ carret nroob zie me ga; znu wbirele me Jerusalén güeygaṉ me Dios. Laa me zob leeṉ co quialab me lo Xtiidz Dios miṉe pquiaa Isá, meṉ ne biadteed xtiidz Dios padzeela.
29 Dzigo bnabey Espíritu Sant Lip tsie Lip ygaa carret co lo Lip.
30 Zeeṉe bgaa carret co lo Lip, bin Lip pa lo nolab meṉ co; nacne rëbchaa Lip lo me:
―¿Pe rieṉ luu cho raquiet zaatne nolab luu i?
31 ―Rieṉd naaw ―rëb me―, rquiin tib zha ne gnë lo naa dieṉ zha naca.
Dzigo bredz me Lip biep Lip leṉ carret co, güeysob Lip cue me.
32 Znu rnee zaatne nolab me ga:
Zigne racse mëcwxiil yeeṉ zeeṉe rnaaz zho ma rut zho ma,
scadaa ndooladz goc me,
peet beeṉd me zeeṉe laa zho zienie me.
Ni zigne roptsied ma zeeṉe rtsiib zho ma,
scaque ni tib diidz ptsired me lo zho.
33 Niicle ne goṉ zho scataa ndooladz me,
per psacsi zho me.
¡Pa lotaa bdziṉ guieḻntseeb ne beeṉ grë meṉladz me!
Sac goṉ, ptiche zho xquieḻmban me lo guidzliu.
34 Dzigo rëbchaa meṉ co lo Lip:
―Bzhiguieḻ bnë lo naa dieṉ, cho nu znu rzeet Isá lo rii. ¿Pe me bded miṉ rii, te stib zhow ye?
35 Dzigo rëb Lip lo me Jesús raquiet ga, ni bnee Lip grëraa miṉe nac zhiwseed Jesús.
36 Laa zho no nëz, tibaque zeeṉe bdziṉ zho tib lugar co no nis; rëbchaa me lo Lip:
―¡Bui gaṉle laa nis no nu! Mazd bzhiguieḻ pchoobnisgazh naa.
37 [―Zaca ―rëb Lip―, totsaque dib zdoo luu rliladz luu Jesús.
―Rliladz naa me ―rëb meṉ co―, rliladz naa ne nli Xpëëd Dios nac me.]
38 Dzigo bnabey me blëz carret co ga. Biet me leeṉ co grop me Lip bzëëb zho lo nis co, ga pchoobnis Lip me.
39 Blozhse ga, laa Espíritu Sant blis Lip goṉdraa me Lip; per rley me laa me bio nëz stib, laa me zie.
40 Zeeṉe laa Lip brieequia, laa Lip nole guiedz ne lë Azot. Ga psilo me zigse zie me, guiedz ne rdedtaa me rnee me Xtiidz Dios lo grë miech co. Sca bio me nëz, haxta bdziṉ me guiedz Cesarea.