GUITS NE GLO PQUIAA
PEDR
1
Bets, bzian, ¡diuzh to grëse to!
1 Naa nac Pedr, tib zha ne rxeeḻ Jesús nonee Xtiidz Ndzon me lo miech. Laa naa rxeḻ tib guits rii ziaad lo to grëse to ne nac to zha Israel, no to stib ladz beṉ: zig nac nëz Pont, nëz Galás, nëz Capadós, nëz Asia ni nëz Bitin.
2 Dios meṉ ne nac Pxoz ne, ible me bzooblo to mazd padzeela, sac naṉle me laa to gac xpëëd me. Bdziṉ dze, zeeṉe laa me pxeeḻ Espíritu Sant bleextso to laa to ngab xnëz me, zeeṉa gban to zigne rnabey me, ni lozh csaṉmbe Jesús to; sac ible miṉ co nacne bzhiee xchen me. Dios glu gaṉle pa lotaa noxco me to, zeeṉa peet zhgab ctsebde to.
3 Xquizh xquieḻnzaac Dios, Pxoz Jesús meṉ ndzon ne rnabey ne, sac goṉ pquia zdoo me ne ptsëë me lo xquieḻmban ne, rrieequia gol ne stib. Xquizh me bleeban me Jesús, sac goṉ ga rlu ib zgaa ne guieḻnzaac nroob ne no diidz gneedz me lo ne,
4 guieḻnzaac cosi ncuaaṉe mbe naca, nacda ncuaaṉe nitlo, nacda ncuaaṉe gdzëëlo, ni gbaa ga quianie mew.
5 Ne squi dib zdoo to rnalo to me niina, gane quianap me to con grëtaa poder ne rap me, parne ygaa to guieḻnzaac co. Zeeṉe laa dze co gdziṉ, zaṉlo to gaṉle zeeṉe laa me ycaania to.
6 Gacxe waa iṉe nley goḻgac. Nli zaṉ to grë pe guieḻnë, per ncuaaṉe tib rded ga.
7 Ib none gaṉ to grë guieḻnë, parne ga glu dieṉ pe nli dib zdoo to rnalo to Dios. Zig nac guiib or, parne glu dieṉ pe nli ora, none teda lo gui; scaquegaa to, none gaṉ to guieḻnë parne glu to nli dib zdoo to rnalo to Dios; ni zig nac or, ncuaaṉe rnitlo ga. Grëse zha ne tibaque gnalo me, niicle mazdraa guieḻnë ne gaṉ zho, gaḻ dze ne guiaad Jesús stib, iṉe zuṉnon Jesús zho, saṉglaa me zho, zley me gaṉ me zho, sac blu zho nli dib zdoo zho rnalo zho me.
8 Me i squitaa rleynie to, me i squitaa rnalo to, niicle ne goṉde to me, niicle ne raṉde to me. Tib guieḻbley nrooba lo to, tib guieḻbley ndzona, nacda ncuaaṉe grieelo gnee to zha naca;
9 sac goṉ, ne squi dib zdoo to rnalo to me, ib scaania me to.
10 Grë zha ne biadteed Xtiidz Dios lo miech padzeela, bzeet zho laa Dios glu gaṉle pa lotaa noxco me ne, laa me csilaa ne lo doḻ; per ib bieṉd zho dieṉ zhapaa guṉ me.
11 Zeeṉe bdeed zhiEspíritu Jesús guieḻbiini lo zho bzeet zho ne ib laa Dios cxeeḻ me, pe nac guieḻnë ne ted me, ni pe nac guieḻndzon ne guiaadnie me; gocladz zho niacnaṉ zho dieṉ cho nac meṉ co, pa hor gac miṉ co.
12 Nacne blu Dios lo zho gocnaṉ zho nacda ncuaaṉe gac leṉ dze co, sinque haxta nele ygaa dziaṉa. Saṉgue niina, naṉwen to gaṉle laa grë miṉ co gocle, lëë diidz cub co i gocnaṉ to niina, gbaa biet Espíritu Sant bdeed me guieḻbiini lo zha ne biadneew lo to. ¡Ncuaaṉe ndzona, haxta grë anjl racladz tebaa zha gacnaṉraa zho dieṉ zha naca!
None gban ne zigne racladz Dios
13 Goḻquix biini xquieḻrien to sca. Tiblique goḻguṉ guic to ne laa to ygaa grëtaa miṉe ral zdoo Dios gneedz me lo to, zeeṉe laa Jesús guiaad stib.
14 Zig grë mëëd ne ron xtiidz pxoz, sca nguzobdiidz goḻgac lo Dios; guṉdraa to grë ncuaaṉ ndzinlid ne beeṉ to zeeṉe gard guṉbey to me ga.
15 Goḻtsoxco goḻban zigne racladz me, zeeṉa iṉe mbe guiaaṉ to lo doḻ; sac goṉ teḻ me, meṉ mbe nac me, nacd me meṉ ne rdziguien doḻ.
16 Zigne zhobneeque lo Xtiidz me, zaatne rnee: “None guiaaṉmbe to lo doḻ, sac goṉ meṉ mbe nac naa.”
17 Pxoz to nac me, me rnalo to, naṉle to zeeṉe laa me guṉ guieḻwxtis, led yed me cue; miṉe beeṉ tib tib miech, zuṉquizh me zhow. Goḻguieṉ sca, goḻgon xtiidz me gzataa dze ne gbanse to lo guidzliu rii.
18 Goḻsoladz me blee to lo grë wseed ndzinlid ne psaṉ grë xmeṉgol to; naṉwen to gozh briee to ga; per pquiind me ncuaaṉe rnitlo zig nac pe dimi or, pe dimi plat;
19 sinque laa me pquiin xchen ndzon Jesús. Ren ne bzhiee goc zig tib gon, zigne rgogon miech carner yeeṉ ne mazdraa niow, carner yeeṉ ne mazdraa ndaan parne guiaaṉwen zho lo Dios.
20 Padzeelale, haxta zeeṉe gard cue guidzliu bzo Dios me gac me gon co, ni nligaa zeeṉe laa dze co bdziṉ laa me biaad, biaadsaṉwen me to lo Dios; laa Dios beeṉ miṉ co sacne rleynie me to.
21 Gacxe waa, zrieelo dib zdoo to gnalo to Dios, mese none gliladz to. Me nac meṉ ne bleeban Jesús, blu me ne meṉ non nac Jesús.
22 Ni niina ne laa to mban zigne nac XTiidz Dios, miṉe nac diidzli, laa zdoo to biaaṉmbele lo doḻ; nasi zrieelo gleynie to zha ne nacgrë to. Dib zdoo to sca goḻleynie zho,
23 goḻguieṉ gaṉle, tib guieḻmban cuble rap to niina, rrieequia gol to stib; per nacdraaw zigne gol to glo, sinque lëë guieḻmban qui bgaa to zeeṉe bliladz to Xtiidz Dios, diidz ne rneedz guieḻmban, diidz ne gdziṉd dze nitlo.
24 Zigne zhobneeque low, zaatne rnee:
Grëse ne nac ne miech, zdziṉ dze ne lozh ne,
lega nacse ne zig nac grë guizhye,
grë xquieḻndaan ne, lega nacsew zig nac guieeṉ guizh co.
Sac teḻ guizhyew, zeeṉe laaw rbidz, laa guieeṉa rliaaḻaque;
25 saṉgue Xtiidz Dios, gdziṉd dze ne nitlow.
Ni lëë diidz co ga goṉ biadseed zho to, lëëw rlu zha laa miech lo grë xtoḻ zho.