12
1 Horco goṉ naa blu tib ncuaaṉe gzee zdoo ne zhan gbaa. Ga brieequia tib wnaa, masaque igose me riab tib biini, zig riab xbiini ngbidz, ni zob tib coron guic me, quia tsiipchop mel cho coron co; ngali ni me zob mëë.
2 Rlupaa zoney me mëëd, rquiaadan me redz, laa me rquiale yoob ne gap me xpëëd me.
3 Tibaque brieequia tib ma ngol, dipse ma rna nizhnie, niaa ma zigne niaa ngutsiets; zob gadz guic ma, ni tsii zhoz ma, tibga coron zob tib tib guic ma.
4 Znuse bzieecw ma xcol ma, blaaḻ ma palal mel gbaa lo guidzliu; gzoob ne nlë mel tsoṉ tant, masaque tib tant mel co blaaḻ ma. Wbig ma lo wnaa co, quiambëz ma gal xpëëd me, parne gow ma win.
5 Per zigne gol mëëd co, znuse bdziṉ win nëz lo Dios, zaatne zob me rnabey me; tib mëëdbguiw, nacle diidz tib meṉ ndip xtiidz gac win, win gac meṉ ne gnabey grëse guiedz ne ndxie lo guidzliu.
6 Horcogazhaquew bzhooṉ wnaa co ga, laa me zie tib dan zit, zaatne psaṉle Dios diidz gaṉ zho me dipse leṉ tsoṉ iz groḻ.
7 Nacne bio tib diḻ gbaa. Psilo anjl Miguel, grë me grëraa anjl ne nacnie me, bdiḻnie me ma ngol co grë ma xanjl dox ma;
8 per blëbd ma, beṉcxooṉ zho ma gbaa.
9 Lëë ma ngol co ga nac meeḻ dox ne notaque padzeela, lëë meṉdox ga, lëë Satanás ga, ma ne scataa tibaque noquidie miech; hor co laa zho bzonëz ma nëz lo guidzliu, grë xanjl dox ma.
10 Dzigo bin naa, nguiedz zëëb tib tsi meṉ co gbaa, rnee me:
¡Lëëw nagoṉ!
¡Nasi laa dze ne ycaaniapaa Dios zha ne ngab lo me, laa dze co bdziṉ!
Nasi laa me blu poder ne rap me,
nasi laa Meṉ ne pxeeḻ me lo guidzliu ga gnabey lo grëse zha ne ngab lo me.
¡Laa me beṉcxooṉle meṉdox!
Ma ne scataa dze guieel nolisqui dieṉ pe ruṉ zho,
nac zho zha ne nacgrë ne.
11 Peet brieelod ma niuṉ ma zho,
sac niapse meṉ ne nac Carner yeeṉ ne gut lo cruz ga bnalo zho;
ni lalnu ib bdziebd zho, bnee zho lo miech cho nac me,
bleeladz zho xquieḻmban zho, no zho haxta beet miech zho.
12 ¡Gacxe waa tib guieḻbley nroob ne rac gbaa niina!
¡Grëse to ne nac to zha ne no gbaa, goḻley!
¡Per probsaxe grë zha ne no lo guidzliu, sac laa meṉdox co tsiesacsi zho!
Ntseeb rac ma laa ma zie nëz co,
rieṉ ma riaaṉdraa nroob dze ne sonlaa ma.
13 Zeeṉe goṉ ma sca bzonëz zho ma lo guidzliu, dzigo ptsidiḻ ma wnaa ne gop mëëdbgui co.
14 Nacne bzoob zho chop xiiḻ me, lëëdaa xiiḻ msidoo; par grieelo xooṉ me lo ma, guey me dan zit ne nole diidz gaṉ zho me dipse leṉ tsoṉ iz groḻ co.
15 Gocladz ma nsiloow ma me, blee ma tib nis naal ro ma, pale tib guiubee ro,
16 per psaand guidzliu me, znuse bzhial low psi grëse nis naal co.
17 Horco mazdraa blëënie ma me, psilo ma noguib ma zha csacsi ma grëraa zha ne ziaad lo xtii me. Lëë grë zha co zienaḻ miṉe rnabey Dios, ni rdziebd zho rlu zho xnëz Jesús no zho.
18 Nacne güey ma, bzo ma ro nisdoo.