3
Zha ne so lo grë zha ne ngab xnëz Dios
1 Zha ne racladz so gnabey zho lo grë zha ne no xnëz Dios, tib dziin wen ga rquiabladz zho guṉ zho. Sca zëëb diidz rnee miech; ni nligaaw.
2-4 Per ga nagoṉ rquiin:
tib zha ne zaacse mban,
zha ne mbannie loxaque wnaa ne nacse tsieel zho,
zha ne tibliladz,
zha ne nixbiini, rieṉ pe ruṉ,
zha ne mbe lo, choot lega gzhidznied zho,
zha ne iṉe nley rac, rbëzlo zho miech lidz zho;
zha ne rieṉ zha rseed miech,
zha ne rquiad lo nziu,
zha ne rleynied diḻ,
zha ne wen zdoo,
zha ne zaacse mbannie samiech,
zha ne rzonaḻd dimi,
zha ne zaacse mban lidz,
zha ne rrieelo rnabey lidz, rnabey xpëëd,
zha ne nguzobdiidz nac xpëëd, rbeed mëëd xquieḻto zho.
5 Sac teḻ zha ne rrieelod gnabey lidz, gnabey xpëëd; ¿pe leḻ ne so zho gnabey zho lo grë zha ne no xnëz Dios dzigo grieelo zho?
6 Niicle tib zha ne griiṉpaa psilo bliladz Xtiidz Dios grieelod gac zho dziin co; sac nend lëëque lëë zho guṉnon zho, lozh ga lëëque zha yguib guiabdee zho. Goḻsoladz gaṉle zha bzhaac meṉdox.
7 Ni ye rquiin tib zha ne zëëb xtiidz ne miech ndzinli nac zho, haxta lo zha ne nod xnëz Dios; zeeṉa tsod lega pe glisqui miech lo zho, sca gleyd meṉdox gac miṉe racladz ma.
Zha ne guṉ yudar leṉ yadoo
8-12 Scaquegaa zha ne so guṉ xyudar zha ne gnabey ga, ga rquiin:
tib zha ne zaacse mban,
zha ne rnee niapse diidzli,
zha ne rleynied guieḻgonziu,
zha ne zienaḻd dimi,
zha ne dib zdoo rliladz grëse miṉe zhobnee lo Xtiidz Dios (miṉe rliladz ne, miṉe nac diidzli),
zha ne mbe lo,
zha ne mbannie wnaa ne nacse tsieel zho,
zha ne rrieelo rnabey lidz,
zha ne rrieelo rnabey xpëëd.
Ni stiba, antes ne so zho none glugazh zho dieṉ pe nli zrieelo guṉ zho dziin co. Zig nac tsieel zhow, none gac me:
tib wnaa ne zaacse mban,
wnaa ne rleynied diidzguizh,
wnaa ne rleynied nziu,
wnaa ne rquidied.
13 Sac zha ne zaacse guṉ dziin co, ziaṉnziuuraa zho lo grë zha ne ngab lo Dios, ni scagaa iṉe mbe lo zho haxta no ro zho gnee zho lo miech zha nac ne laa zho rliladz Jesús.
Miṉe rliladz zha ne ngab lo Dios
14 Ib laa guic naa no guiaḻniob naa i, guiaḻgaṉ naa luu; per laa naa rxeḻ diidz rii lo luu,
15 zeeṉa teḻne grieelod guiaḻniob naa, per laa luu naṉle nagaṉle cho gzo luu yquiaanap grëraa zha ne ngab xnëz Dios nguiamban; zha ne ruṉbey miṉe nac diidzli, ni rlu zho gaṉle ne nli diidzliw.
16 Ne nligaa nroobdoo nac wseed ne ziaad lo Xtiidz Dios, miṉe rliladz ne, ngaṉ guieṉ miech zha naca. Nu raquiet miṉe beeṉ me:
Goc Jesús miech biaad me lo guidzliu,
ni blu Espíritu Sant gaṉle ne nli Xpëëdpaa Dios nac me;
ni goṉ grë anjl me.
Brieets bliaaḻ Xtiidz me grë guiedz,
ndaldoo miech ne bliladz gaṉle cho nac me,
blozh ga biire zey me lo guieḻndzon ne no me gbaa.