16
Timoteon' gwzolagüe' chonḻene' Pablon' na' Silasen' txen
1 Na' Pablon' len Silasen' besyežine' yež Derben' nach gwdena' besyežine' yež Listran'. Na' Listran' zoa to beṉe' chonxene' Jesucriston' le' Timoteo. Xṉa' Timoteon' naque' beṉe' Israel na' chonxene' Jesucriston', na' x̱en' naque' beṉe' griego.
2 Na' beṉe' ca' chesonxene' Jesucriston' yež Listran' len yež Iconion' cheso'e diža' c̱he Timoteon' chesene' zoacze' chone' da' güen.
3 Da'nan' Pablon' gwṉabe' šejlen Timoteon' ḻegaque', nach gwc̱hi'ene' gan' bosozoe' ḻe' señw dan' že' circuncisión. Bene' ca' ḻe yogo' beṉe' že' na' goseṉezde' x̱a Timoteon' bi naque' beṉe' Israel na' Timoteon' biṉa' soe' señon', na' ḻecze Pablon' goclaže' yega'aṉe' güen len beṉe' Israel ca'. Cate' beyož bzoe'ne' señua' na' gosa'aque'.
4 Na' to to yež ga besežine' bosozende' beṉe' ca' chesonxene' Jesucriston' can' nac yeḻa' güexi'a c̱he postlw ca' len beṉe' chosogüia cheseṉe'e ḻježgaque' Jerusalénṉa' c̱he da' ca' cheyaḻa' yesone'.
5 Na' beṉe' ca' chesedop chesežag chesonxene' Jesucriston' gosenita'c̱hac̱he' gosejnilaže'ne' na' gwyanche' tža tža.
Pablon' ble'edagüede' to beṉe' distritw Macedonia chata'yoede' ḻe' šeje' laže'
6 Nach Spiritw c̱he Diosen' bi ben' latje šjasedix̱jue'e Pablon' len Silasen' len Timoteon' xtiža' Diosen' yež ca' zjachi' distritw gan' nzi' Asia. Da'nan' gosedie' yež ca' zjachi' distritw ca' gan' nzi' Frigia na' Galacia.
7 Besežinte' gaḻa'ze distritw gana' nzi' Misia na' gosone' xbab yeso'e distritw da' nzi' Bitinia, perw ḻez na' bi be' Spiritw c̱he Jesúsen' latje šja'aque'.
8 Nach gosedie' gaḻa'ze distritw Misian' na' besežine' ciuda dan' nzi' Troas dan' chi' cho'a nisdaon'.
9 Nach že'na' Pablon' ble'edagüede' zecha to beṉe' distritw Macedonia lagüe', che'e ḻe': “Yo'o Macedonia cont gacleno' neto'.”
10 Neda' Lucas gwzoa' len ḻegaque' na' da' ble'edagüe Pablon' beṉe' Macedonian', nach gwṉezeto' chaclaže' Diosen' šjazeneto' beṉe' Macedonia ca' diža' güen c̱he X̱ancho Jesucriston'. Nach bsiṉi'a c̱heto' cont gwza'to' gwyejto' distritw Macedonian'.
Pablon' len Silasen' ja'aque' Filipos
11 Na' cate' gwza'to' ciuda da' nzi' Troas dan' chi' cho'a nisdao' gwyo'oto' to ḻo' barcw zejto' ḻicha gan' chi' to yežlio ḻo' nisen' dan' nzi' Samotracia, nach beteyo bžinto' yežen' dan' nzi' Neápolis.
12 Nach gwza'to' Neápolis bžinto' ciudan' nzi' Filipos gan' mbane distritw Macedonia na' bega'aṉto' to c̱hop ža. Filipos naquen ciuda blaoch c̱he distriton' gan' že' beṉe' Roma.
13 Na' cate' bžin ža c̱he Dios bchojto' ciudan' na' gwyejto' cho'a yegw gan' chaqueto' chjaseḻ güiže' Diosen', nach gwche'to' na' be'lento' no'ol ca' ba zjandoben' diža' güen c̱he Jesucriston'.
14 Toe' le Lidia naque' beṉe' Tiatira na' chote' lache' güen da' nac color moradw, na' chonxene' Diosen' do yic̱hj do laže'. X̱ancho Diosen' bene' cont bzenague' c̱he dan' bzejni'i Pablon' ḻe'.
15 Nach ḻe' len beṉe' ḻo' yo'o c̱he' gosezoe' nis. Gwdena' gota'yoede' neto' gwne':
―Še chejḻe'le da' ḻi ba chonxena' X̱ancho Jesucriston', ḻe šo'o soale ližan'.
Nach gwyejto' jasoato' ližen', ḻe bene' byen.
16 Na' to ža zejto' gan' chosoḻ güiže' Diosen' cate' bežagto' to no'ol güego' no'ole esclava. Yo'o nyaz da' x̱igüen' yic̱hjlažda'oben' chonen cont chac chṉeya'abe', na' gan xen chombe' par x̱ambe' ca' chṉeya'abe'.
17 Na' ḻebe' na'obe' neto' len Pablon' gate'tez zejto', na' chosya'abe' žabe':
―Beṉe' quinga chesone' xšin Diosen' ben' chnabi'e doxen, na' cheseyix̱jue'ede' le'e can' gata' yeḻa' mban c̱hele toḻi tocaṉe.
18 Ba chac zan ža chombe' ca' cate' goque Pablon' zed, na' gwyec̱hje' gože' da' x̱igüen' yo'o ḻo' yic̱hjlažda'oben':
―Len yeḻa' chnabia' c̱he Jesucriston' chnia' le' bechoj ḻo' yic̱hjlaždao' bi'nga.
Na' ḻa' bechojte da' x̱igüen' ḻo' yic̱hjlažda'oben'.
19 Na' gwdena' cate' gosacbe'e x̱ambe' ca' ba bechoj da' x̱igüen' ḻo' yic̱hjlažda'oben' na' bich bi gan yesone' len ḻebe', nach gosezene' Pablon' len Silasen' na' jasesane' ḻegaque' lagüe ya'a gan' že' beṉe' ca' chesenabia' ciudan'.
20 Na' cate' besežine' gan' že' justis ca', gose'e ḻegaque':
―Beṉe' Israel quinga chesaše' chesebeque' da' zed ḻo' ciuda nga.
21 Na' chosolo'ede' costumbr da' bi de ḻsens gao' chio' naccho beṉe' Roma.
22 Nach beṉe' ca' ḻo ciudan' gosase' contr Pablon' len Silasen', na' beṉe' gwnabia' ca' gosone' mandadw goseḻec̱hje' xagaque' cont goseyine' ḻegaque' xis.
23 Beyož goseyinchgüe' ḻegaque' nach bosoži'e ḻegaque' ḻižya, chese'e ben' chape' ḻižyan' gwṉa'yaṉe' ḻegaque' cont bi yesyechoje'.
24 Beyož gose'e ḻe' ca', nach bži'e ḻegaque' ḻo' cuart ḻižyan' dan' zoa ḻa'zelaoze gan' nac biže'te na' bc̱hide' ṉi'agaquen' len yag dan' nzi' cepo.
25 Ca' gosenita' Pablon' len Silasen' ca do chel, chosoḻ güiže' Diosen' na' chesoḻe' no himno chesonxene' Diosen', na' yezica'chle beṉe' ca' zjade ḻižyan' chosozenague'.
26 Nach zejzenez ḻeca gwxo' na' bsesechguan len yo'o ḻižyana'. Na' to ši'ize yogo' puert c̱he ḻižyana' beseyaljon na' besyeyež yogo' gden ca' dan' zjanchej ṉi'a na' beṉe' ca' že' ḻo' ḻižyan'.
27 Bosbanen ben' chape' ḻižyan' na' cate' ble'ede' ba zjanyaljo puert ca', ḻa' goḻjte spada c̱hen' cont yeyot cuine', ḻe bene' xbab ba bosyoxoṉj yogo' beṉe' ca' zjade ḻižyan'.
28 Nach Pablon' gože'ne' zižje:
―Bibi gone cuino'. Nga zoacze yogo'to'.
29 Nach ben' chap ḻižyan' gwṉabe' to yi', na' gwyo'osese' zjaṉe'e gan' de Pablon' len Silasen'. Do chxizze' bzoa xibe' lao beṉe' ca', ḻe chžebchgüe'.
30 Na' ḻa' bebejte' ḻegaque' ḻo cuart gan' zjayo'en', che'e ḻegaque':
―¿Bi cheyaḻa' gona' cont gata' yeḻa' mban c̱hia' toḻi tocaṉe?
31 Nach gose'e ḻe':
―Gwyejnilaže' X̱ancho Jesucriston', le' na' beṉe' ḻo' yo'o c̱hio', na' gata' yeḻa' mban c̱hele toḻi tocaṉe.
32 Nach ben' chape' ḻižyan' gwc̱he'e ḻegaque' ližen' na' gosoe'lene' ḻe' len beṉe' ḻo' yo'o c̱hen' xtiža' X̱ancho Jesucriston'.
33 Nach ca hora' ben' chap ḻižyan' gwdibe' ḻo güe' c̱he Pablon' na' c̱he Silasen', na' gwdena' jasoe' nis len beṉe' ḻo' yo'o c̱he' ca'.
34 Nach ben' chape' ḻižyan' bec̱he'e Pablon' len Silasen' liže' bgüe'ej bguagüe' ḻegaque'. Mbalaz zoe' ba chejnilaže' Diosen' txen len beṉe' ḻo' yo'o c̱he'.
35 Cate' ba gwyeni' beṉe' gwnabia' ca' goseseḻe' x̱a'ag jaseže' ben' chap ḻižyan' yosane' beṉe' ca' šjaya'aque'.
36 Nach ḻe' gože' Pablon':
―Beṉe' gwnabia' ca' bac̱h goseseḻe' rson yosana' le'e. Guac yeyejle to šagüe' to güen.
37 Nach Pablon' gože' x̱a'ag ca':
―Ba goseyine' neto' latje lagüe ya'a sin cbi gosone' yeḻa' justis c̱heto' še bi nonto' na' gosegüe'e neto' ḻižya, ḻen nacto' beṉe' nación Roma. ¿Na' chesone' xbab yososane' neto' šižize? Bi gac, san yesid cuine' yesyebeje' neto'.
38 Nach x̱a'ag ca' jasyeyeže' beṉe' gwnabia' ca' can' gož Pablon' ḻegaque'. Na' beṉe' ca' besežebe' cate' goseṉezde' Pablon' len Silasen' zjanaque' beṉe' nación Roma.
39 Nach beṉe' gwnabia' ca' ja'aque' gan' zjade Pablon' len Silasen' na' gosata'yoede' ḻegaque' yesyezi'xene' can' ba goquen', na' diža' šagüe' gose'e ḻegaque' yesyechoje' yesyeya'aque' ḻo ciudan'.
40 Nach bechoj Pablon' len Silasen' ḻižyan' na' ja'aque' liž Lidian' da' yoble, na' da' yoble gosone' c̱hac̱h laže' beṉe' ca' chesonxene' Jesucriston' na' beyožen' besyeya'aque'.