15
Beban Criston' ladjo beṉe' guaten'
1 Beṉe' migw, chaclaža' gonḻe xbab c̱he diža' güen c̱he Criston' da' ba be'lena' le'e. Ba bzenagle c̱hen na' zoac̱hac̱hle chejḻe'len.
2 Na' ṉezele šjayzoale len Diosen' še soatezle gwzenagle c̱he diža' güen c̱hen'. Na' še bi gwzenagle c̱hen, bibi zejen da' žale chejḻe'len'.
3 Diosen' bzende' neda' da' quinga da' zjanaquen ḻa'zelagüe' da' zejen na' bac̱h gwdix̱jue'edan' le'e. Criston' bnežjw cuine' gote' cont beque'e xtoḻa'chon' con can' nyoj Xtiža' Diosen'.
4 Nach bosocuaše'ne', na' beyoṉ ža beyas bebane' ladjo beṉe' guat ca' con can' nyoj Xtiža' Diosen'.
5 Nach jaylo'elagüe' Pedron' na' gwdechle jaylo'elagüe' yezica'chle postlw ca'.
6 Beyoža' jayezlo'elagüe' gwdete gayo' gayoa beṉe' to ši'ize, beṉe' chesonxene' ḻe'. Na' zan beṉe' ca' ṉe' zjamban, ḻa'czḻa' baḻe' ba gosate'.
7 Nach jayzlo'elagüe' Jacobo. Gwde na' jayzlo'elagüe' yogo' postlw ca'.
8-9 Bzebte bedyelo'elagüe' neda', zaca'leba' ca bi' golje cate' biṉa' žin ža, ḻe cana' bc̱hi bsaca' beṉe' ca' chesedop chesežag chesonxene' Criston'. Na' da'nan' chacda' bicze zaca' yososi'e neda' postlw.
10 Perw Diosen' nži'ilaže'de' neda' na' gwleje'nda' naca' postlw c̱he', na' choncha' xšinen' clel ca beṉe' ḻježa' ca' yezica'chle. Na' ṉezda' gague chonan' neda', san Diosen' chaclene' neda' cont chonan'.
11 Da'nan' bibi nonen še xtiža' nedan' ba bzenagle o še xtiža' nochle postlw ca', ḻe toze can' chyix̱jue'eto' c̱he Criston' na' can' nac dan' ba chejḻe'le c̱hen'.
Yesyeban beṉe' guat ca'
12 Yogo' neto' chyix̱jue'eto' beban Criston' ladjo beṉe' guat ca'. Da'nan' ¿bixc̱hen' ža baḻle bi yesyeban beṉe' guat ca'?
13 Šaca' naquen diža' ḻi dan' žale bi chosban Diosen' beṉe' guat ca', zejen bi beban Criston' še ca'.
14 Na' šaca' Criston' bi bebane' ladjo beṉe' guat ca', bibi zaca' xtižen' da' be'lento' le'e na' bibi zejen da' chejnilaže'lene' še ca'.
15 Ba be'lento' le'e diža' güenḻaže' gwnato' Diosen' bosbane' Criston' ladjo beṉe' guaten' šaca' naquen diža' ḻi dan' žale bi chosbane' beṉe' ba gosat.
16 Ḻe šaca' bi chosbane' beṉe' ba gosat, ḻecze bi bosbane' Criston'.
17 Šaca' naquen da' ḻi Diosen' bi bosbane' Criston', bibi zejen da' chejnilaže'chone' na' bi ṉacho beque'e xtoḻa'chon'.
18 Šaca' naquen da' ḻi bi bosbane' Criston', ba gosebiayi' yogo' beṉe' ba gosat beṉe' gosejnilaže' Criston' še ca'.
19 Na' šaca' da' zoacho lez šjayzoalencho Criston' cate' yeza'cho yežlio nga naquen da' güenḻaže', yeḻa' zi' xench chac c̱he chio' chejni'ilaže'cho Criston' clel ca c̱he yezica'chle beṉe' še ca'.
20 Perw na' da' ḻi Diosen' bosbane' Criston' ladjo beṉe' guat ca', na' da'nan' ṉezecho žin ža yosbane' yezica'chle beṉe' chesejnilaže'ne' še ba gosate'.
21 Gwxe yeḻa' goten' yežlio nga da' gwzoa' to beṉe' bene' da' mal, na' ḻecze ca'czen' goc, to beṉe' bene' cont žin ža yebancho ladjo beṉe' guat.
22 Ḻe gwxe yeḻa' goten' cate' Adanṉa' bene' da' malen', da'nan' yogo' beṉac̱hen' chesate'. Nach Criston' bene' cont yogo' beṉe' yesaque' txen len ḻe' yesenite' toḻi tocaṉe.
23 To tocho yebancho ladjo beṉe' guaten' cont soalencho Criston' con caten' ba bsi'e xṉezenṉa'. Criston' gwžialagüe' bebane' ladjo beṉe' guat ca' na' cate' yide' da' yoble chio' chejnilaže'chone' ḻecze yebancho ladjo beṉe' guat še ba gotcho.
24 Nach te c̱he yežlio nga. Na' Criston' gwṉitlagüe' yeḻa' chnabia' c̱he yogo' beṉe' chesegue'ede' Diosen' na' yeque'e yeḻa' chnabia' c̱he yogo' da' x̱igüe' ca'. Na' yeyožen' Criston' gone' ḻo na' X̱e' Diosen' yogo' da' nḻane' chnabi'e na' yogo' non' chnabi'e.
25 Diosen' bžie' bia' zoa Criston' chnabia'che' ca yogo' beṉe' ca' na' bichle da' ca', na' Diosen' gone' cont žin ža cate' gwlej gwšošje' beṉe' ca' na' bichle da' ca' bi cheson txen len ḻe'.
26 Na' cate' yeyož gwlej gwšošje' yogo' bichle da' bi chon txen len ḻe', nach gwcueze' yeḻa' goten'.
27 Diosen' ba nsi'e xṉezen' cont yogo'ḻoḻ da' zjade zjanaquen ḻo na' Criston'. Perw bi ṉacho zejen Diosen' naque' ḻo na' Criston', san Diosen' nsi'e xṉezen' cont yezica'chle beṉe' na' bica'chle da' zjade yesaquen ḻo na' Criston'.
28 Nach cate' ba ben Diosen' cont yogo' da' zjade ba zjanaquen ḻo na' Criston', nach Criston' gwlo'e ḻecze ḻe' naque' ḻo na' X̱e' Diosen'. Can' gac cont yogo' beṉac̱h na' yogo' angl yesacbe'ede' Diosen' naque' X̱angaque', na' ḻecze yesacbe'e da' x̱igüe', beyix̱e' na' bichle da' zjade.
29 Nita' beṉe' chesezoe' nis gualaz beṉe' ba gosat. Na' bibi zejen da' chesone' ca' šaca' bi žin ža yesyeban beṉe' guat ca'.
30 Na' neto' yogo' ža nita' beṉe' chesaclaže' yesote' neto' da' choe'to' xtiža' Criston', na' bibi zejen zoa chbezto' ca' šaca' bi yesyeban beṉe' guat ca'.
31 Beṉe' migw, choa' diža' ḻi chnia' chbechgüeda' ba chejnilaže'le X̱ancho Jesucriston', na' ḻecze ca' choa' diža' ḻi chnia' yogo' ža chzanḻaže' cuina' gac bi da' gac c̱hia'.
32 Guac ṉacho bež znia ba gwdiḻlena' Efeso nga ga ba gosedabaga'chgua beṉe' neda'. Na' bibi zejen ba bchejda' yogo' da' ba gosonde' neda' šaca' bi yesyeban beṉe' guat ca'. Na' šaca' bi yesyeban beṉe' guat ca', yejṉi'a goncho can' ža dižan' žan: “Ye'ej gagwtezcho, ḻe gwx̱ezen' gatcho.”
33 Bi güe'le latje yesonḻede' le'e. Da' ḻi can' ža to diža' da' de, žan: “Beṉe' chejlen beṉe' cheson da' mal ḻecze solao gone' can' chesone'na'.”
34 Ḻe yeyon xbab šagüe' na' cuejyic̱hjle xbab mal dan' chonḻen', ḻe baḻle biṉa' šejni'ile c̱he Diosen'. Chnia' ca' da' chaclaža' gaquele zto' c̱he da' malen' chonḻe.
Cuerp c̱he beṉe' yesyeban ladjo beṉe' guat ca'
35 Baḻle ṉabḻjale nac gac yesyeban beṉe' guat ca' o nac gac cuerp c̱hegaquen' cate' yesyebane'.
36 Nc̱hoḻ yic̱hjlažda'olen' še chaquele bi gac yesyebane' ladjo beṉe' guat ca'. Ṉezecho to to xoa' dao' da' chazcho cheyaḻa' yexiṉjen cont la' yel dao'.
37 Na' caten' chazcho, bi chazcho yel daon', san chazcho xoa', nach chexiṉjen cont la' yel daon'. Na' can' chac len bi da' chazcho, con xsen' chazcho na' chla' yag dao' c̱hen.
38 Diosen' chone' cont chla' yag dao' dan' chazchon', bi chla' yag yoble da' bi gozcho.
39 Na' gague toze ca nac cuerp c̱he chio' beṉac̱h len cuerp c̱he be žia tap ṉi'a na'ba'. Nža' cuerp c̱he beṉac̱h na' nža' cuerp c̱he be žia x̱il, na' ḻecze nža' cuerp c̱he be chesaš ḻo' nis.
40 Nža' cuerp c̱he beṉac̱h, nža' cuerp c̱he beyix̱e', na' nža' da' ca' chle'echo ḻe'e yaban', gwbiž, bio' na' beljw ca'. Na' nža' yeḻa' xdan c̱he gwbiž, bio' na' beljw ca', na' nža' yeḻa' xdan c̱he beṉac̱h na' c̱he beyix̱e' ca' chesaš ḻo yežlion'.
41 Na' nža' ca chseṉi' gwbiž, nža' ca chseṉi' bio' na' ḻecze nža' ca chseṉi' to to beljw ca'.
42 Nach cate' yesyeban beṉe' ca' ba gosat, cuerp c̱hegaquen' bi gaquen ca cuerp da' gosape' cate' gosebane'. Cuerp c̱hegaque' da' bosocuaše' ḻo' ban' ba beyožon', perw cuerp cobe c̱hegaquen' gague da' te c̱hen.
43 Bibi zaca' cuerp c̱he beṉe' guat ca', zjanaquen cuerp šen, na' cheyožon', da'nan' chcuaše'chon ḻo' ba. Perw beṉe' gosejnilaže' Criston', cate' yesyebane' ladjo beṉe' guat ca' yesyeyac cuerp c̱hegaque' da' güen juisyw na' da' gual.
44 Cuerp c̱hegaquen' zjanaquen de bela' chen cate' chosocuašen' perw cate' yesyebane' ladjo beṉe' guat ca' nža' ba zjanac cuerp c̱hegaquen', ḻe yesyeyaquen cuerp cobe da' yeson con can' ža Spiritw c̱he Diosen'. Ṉezecho cuerp c̱hechon' da' de ṉa'a naquen de bela' chen, na' ḻecze cheyaḻa' ṉezecho žin ža cate' yeyaquen da' cobe na' gonen con can' ža Spiritw c̱he Diosen'.
45 Xtiža' Diosen' nyojen žan Adán beṉe' goc beṉe' nechw gwzoe' gwbane' cani'. Na' ṉa'a zoa Criston' zaca'lebde' ca Adánṉa', ḻe Criston' choṉe' yeḻa' mban toḻi tocaṉe.
46 Ṉa'a cuerp c̱hechon' bi naquen to da' chzenag c̱he Spiritw c̱he Diosen', perw žin ža yeyaquen da' cobe na' gwzenaguen c̱he Spiriton'.
47 Diosen' bene' beṉe' nechw len bište yo cont gwzoe' ḻo yežlio nga, perw X̱ancho Criston' ben' zaca'lebde' ca beṉe' nechon' ze'e yaba.
48 Na' chio' beṉac̱h, cuerp c̱hechon' naquen ca cuerp c̱he beṉe' nechon' da' ben Diosen' len bište yo, da'nan' naccho c̱he yežlio nga. Na' chio' chejnilaže'cho Criston', žin ža cate' cuerp c̱hechon' yayaquen da' cobe can' nac cuerp c̱he Criston' beṉe' za' yaba.
49 Ṉa'a šlac zoacho yežlion' naccho ca beṉe' ben Diosen' len bište yo, perw cate' žin ža šjayzoacho yaban', gaccho ca Cristo ben' za' yaba.
50 Beṉe' migw, chnia' le'e bi gac yežincho yaba gan' zoa Diosen' len cuerp c̱hechon' de bela' chen. Da' te c̱he cuerp c̱hecho quinga, da'nan' bi gac šjayzoalenchon len Diosen' toḻi tocaṉe.
51 Chnia' le'e to da' nono gwṉeze cani', gague yogo'chon' gatcho, perw yogo'chon' yeža' can' gaccho.
52 Bedao'ṉez, ca bedaon' chžode' yejlaochon', yeža' can' gaccho cate' cuež trompeta c̱he Diosen'. Cuež trompetan' na' yesyeban yogo' beṉe' ba gosat beṉe' gosejnilaže' Criston'. Na' cuerp c̱hegaquen' yesyeyaquen da' cobe da' bi yesat na' ḻecze ca' chio' ṉe' mbancho yeža' cuerp c̱hechon'.
53 Ḻe cuerp c̱hechon' da' mbanecho yežlio nga da' te c̱hen. Naquen da' chat, na' cheyaḻa' yayaquen da' cobe da' bi gat, da' bi gožo' na' da' bi te c̱he.
54 Cate' ba beyac cuerp c̱hechon' da' cobe da' bi gat na' bi te c̱hen, cana' ba goc can' nyoj Xtiža' Diosen' gan' žan: “Diosen' gwzoede' bcueze' yeḻa' goten', na' choṉe' yeḻa' mban toḻi tocaṉe.
55 Bich soe yeḻa' goten' chio' da' yoble. Gwbatech gatcho šo'cho ḻo' ba.”
56 De yeḻa' got c̱hecho ṉa'a ḻe chio' beṉac̱h choncho da' mal. Da' ṉeze chio' beṉac̱h can' ža ley c̱he Diosen' cheyaḻa' goncho na' bi chzenagcho gonchon, da'nan' chnabia' da' malen' chio'.
57 Chox̱clen Diosen' gwseḻe' X̱ancho Jesucriston' beque'e xtoḻa' chio' chejnilaže'chone'. Da'nan' bi soe yeḻa' goten' chio', san de yeḻa' mban toḻi tocaṉe c̱hecho.
58 Da'nan' beṉe' migw c̱hia', chacda' le'e na' chṉeyoeda' le'e ḻe soac̱hac̱h len toze xbab. Na' ḻe gonchgua xšin X̱anchon', ḻe ṉezczecho cate' choncho xšinen' chejnilaže'chone', gague da' chondadzchon'.