4
Diosen' beyaše' beži'ilaže'de' neto' na' gwleje' neto' cont chyix̱jue'eto' xtižen'. Da'nan' bi cheche'eto' chyix̱jue'eton'. Na' bibi chonto' bagaše'ze ca no da' nac da' yeḻa' zto'. Bi chonḻeto' beṉe' na' ṉeca choša'to' xtiža' Diosen' cont yesyebe beṉe' chosozenag xtiža'ton'. San chle'ecze Diosen' chyix̱jue'eto' xtižen' con can' naquen cont yogo' beṉe' yesene xtiža'ton' yeseṉezde' ḻo' lažda'ogaquen' choe'to' diža' ḻi. Con beṉe' ca' ba zjambiayi' yeḻa' bi chejḻe' c̱hegaquen', ḻegacze' bi chesejni'ide' diža' güen dan' choe'lento' ḻegaque'. Ḻe beṉe' bi chesejḻe' xtiža' Diosen' chosozenague' c̱he Satanás dan' chnabia' da' x̱igüe' ca' latje da' yosozenague' c̱he Diosen', na' Satanásen' chonen cont nc̱hoḻ yic̱hjlažda'ogaquen'. Da'nan' diža' güen c̱he Criston' bi chseṉin' ḻo' yic̱hjlažda'ogaquen' ca to be'ni' cont yeseṉezde' Criston' naque' beṉe' zaca' juisyw. Cayaṉe' nac yic̱hjlaždao' Diosen' nac yic̱hjlaždao' Criston', na' toz can' chesone'. Na' ca nac diža' da' chyix̱jue'eto', chyix̱jue'eton' gague cont gwzenagle c̱he neto', san cont gwzenagle c̱he Jesucriston' ben' naque' X̱ancho. Na' da' chaqueto' Jesucriston', zoato' chonto' bite'teze da' chaclenen le'e. Na' Dios ben' gwne' gata' be'ni' yežlio nga gan' goc c̱hoḻ, ba gwlo'e be'ni' c̱hen' ḻo' yic̱hjlažda'ochon' cont nombia'cho Jesucriston' ben' nac beṉe' zaca' juisyw, na' cate' ba nombia'chone' chacbe'echo can' nac yeḻa' beṉe' zaca' c̱he Diosen'.
Pablo cho'e xtiža' Diosen' lagüe' da' chejnilaže'ne'
Cuerp c̱hecho quinga da' chesat zjazaca'leben ca to che'e nis da' naquen de gona'. Perw Diosen' ba gwlo'e be'ni' c̱hen' ḻo' yic̱hjlažda'ochon' ṉa'a šlac ṉe' mbancho len cuerp c̱hecho quinga cont gacbe'echo bibi chac goncho še bi goṉe' yeḻa' guac xen c̱hen' cont gac bi da' goncho. Na' neto', da' zan da' chyi chzaca'to', perw bi chbejyic̱hjto' xšin Diosen'. Zan ṉi'a bi chežellaže'to' nacle gonto', perw ṉezeto' Diosen' chaclene' neto'. Chosolagšibe' neto', perw Diosen' bi chbejyic̱hje' neto'. Chosoc̱hi chososaque' neto', perw Diosen' bi cho'e latje yesote' neto'. 10 Gate'teze chejto', con yogo' ṉi'a chosoc̱hi chososaca' beṉe' neto' na' chesaclaže' yesote' neto' can' gosote' Jesúsen'. Na' Diosen' cho'e latje chac c̱heto' ca' cont nacbia' zoacze Jesúsen' chaclene' neto' šlac mbanto' len cuerp c̱heto' quinga. 11 Na' šlac ṉe' mbanto', yogo' ža nita'cze beṉe' chesaclaže' yesote' neto' lagüe' da' chyix̱jue'eto' xtiža' Jesúsen'. Na' chac c̱heto' ca' cont nacbia' zoacze Jesúsen' chaclene' neto' šlac mbanto' len cuerp c̱heto' quinga da' yesat. 12 Can' chac, tža tža chesaclaže' yesote' neto', san le'e ba de yeḻa' mban c̱hele toḻi tocaṉe.
13 Xtiža' Diosen' nyojen žan: “Chejnilaža' Diosen' na' da'nan' choa' diža' c̱he'.” Na' ca ben' bzoj da'na' gwyejnilaže' Diosen', ca'czen' chejnilaže'to'ne' na' da'nan' choe'to' xtižen'. 14 Ḻe ṉezeto' Dios ben' bosban X̱ancho Jesúsen' ladjo beṉe' guat ca' ḻecze žin ža yosbane' chio' še ba gotcho, na' neto' txen len le'e šjayzoacho gan' zoe'na'. 15 Ṉec̱he le'e bžaglaoto' yogo'ḻoḻ da' ba goc c̱heto'. Ḻe chaclaže'to' gac zancho gaclenchgua Diosen' chio' cont šejnilaže'cho X̱ancho Jesúsen', na' ḻecze gac zancho güe'cho yeḻa' chox̱clen c̱he' catec beṉe' zacan' naque'.
16 Da'nan' bi chjax̱aque'laže'to'. Ḻa'czḻa' tža tža zej chax̱o'ch cuerp c̱heto' quinga, ḻecze tža tža Diosen' chocobche' yic̱hjlažda'oto'. 17 Yob te c̱he bite'teze da' dao' da' chžaglaocho yežlio nga. Na' da' ca' chyi chzaca'cho chesaclenen chio' cont soacho mbalaz juisyoch cate' šjayzoacho len Diosen' toḻi tocaṉe, na' ḻenṉa' da' zaca'ch ca bite'tezchle. 18 Nachen' bi chi' yic̱hjcho c̱he da' chle'echo yežlio nga, san chi' yic̱hjcho c̱he da' bi chle'echo. Ḻe yesede c̱he da' ca' zjade yežlio nga da' chle'echo, na' da' ca' bi chle'echo, gague da' yesede c̱hegaquen, ṉita'czen toḻi tocaṉe.