7
1 Le'e beṉe' chacda', ba ṉezecho can' gwna Diosen' gone' güen len chio'. Da'nan' cheyaḻa' cuejyic̱hjcho bich goncho bite'teze da' xiṉj da' gwchenen cuerp c̱hechon' o yic̱hjlažda'ochon'. Na' cheyaḻa' gapcho Diosen' bala'aṉ gwzenagcho c̱he' tža tža na' šejch gaccho beṉe' güen can' chaclaže'.
Ba bža' xbab c̱he beṉe' Corinto ca'
2 Ḻe gaque neto'. Ṉe tole bibi beneto'. Ṉe tole bi bzejni'ito' clele, na' ṉe tole bi gwziye'to'.
3 Gague žia' ca' cont tiḻa' le'e, ḻe can' ba gwnia' cana', chacda' le'e ṉa'a šlac mbancho na' ḻecz ca' gacda' le'e cate' ba gota'.
4 Ṉezda' ḻo' lažda'ogua' gonḻe can' chazlaže' Diosen', na' chbeda' choe'lena' beṉe' diža' ca güenṉa' chonḻe. Ba beyacxenḻaža' da' gwṉezda' chonḻe güen, na' zoa' mbalaz ḻa'czḻa' da' zan da' chac c̱hia'.
5 Cate' bežinto' Macedonian' bibi latje gota' cont yezi'laže'to' len da' gwdi gwxaca'to'. Gwnita' beṉe' bosošašlene' neto' na' ḻecze bžebto' ḻo' yic̱hjlažda'oto' goqueto' nac gacto'.
6 Na' Dios ben' cheyoe'xene' beṉe', beyoe'xene' neto' da' bela' Titon'.
7 Na' beyacxenḻaže'to' gague da' bele'e na'zen' san da' bedeye'e diža' chebede' can' chonḻen'. Na' be'e diža' zelaže'le yedeṉa'to' le'e da' yoble. Na' že' chegüine'le c̱he dan' ba goquen' na' chi' yic̱hjle gonḻe can' gwnian'. Nachen' ḻeca bebechda' gwṉezda' da' ca'.
8 Chacbe'eda' gocyaše'le can' gwnia' ḻe'e carten' bzoja' le'e. Na' gwdechle betiṉjda' da' bena' cont gocyaše'le, perw ṉa'a bich chetiṉjda' da' gwseḻa' carten', ḻe šložzen' gocyaše'le.
9 Chbeda' ṉa'a, ḻe goclenen le'e cont begüine'laže'le c̱he da' xiṉjen' benḻe na' betiṉjele c̱hen, can' goclaže' Diosen'. Na' can' goquen' bi bchojen mal dan' gocyaše'len'.
10 Cate' ba bencho da' xiṉj, Diosen' chaclaže' yegüine'cho c̱he dan' benchon' na' yetiṉjechon. Na' choṉe' yeḻa' mban toḻi tocaṉe c̱he chio' chetiṉje xtoḻa'chon', na' ḻeca mbalazch soacho še ba betiṉjecho xtoḻa'chon'. Perw beṉe' zan cate' chesegüine'laže' bi chesyetiṉjde' xtoḻa'gaquen', nach yesebiaye'e.
11 Chebe Diosen' can' begüine'len', ḻe goclenen gwzelaže'le benḻe can' gwna Diosen'. Goclaže'le gwlo'ele bich chonḻe txen len ben' ben da' xiṉjen', san bža'ale c̱he da' xiṉjen' benen'. Bžeble yedeyena' le'e castigw na' gwzelaže'le gonḻe ca yebeda'. Nach be'le castigw c̱he ben' ben da' xiṉjen'. Nacbia' bich bi xtoḻa'le de can' benḻna'.
12 Na' ca nac carten' bzoja' le'e, gague gwche' yic̱hja' c̱he ben' ben da' xiṉj na'ze, o c̱he ben' bende' ca', san gwche' yic̱hja' c̱he le'e cont gacbe'ele lao Diosen' ṉe' chaquele neto' na' ṉe' chaclaže'le gonḻe can' che'to' le'e.
13 Na' ṉa'a ba beyacxenḻaže'to' da' bzenagle c̱heto'.
Na' ḻecze chebechgüeto' ca mbalaz zoa Titon', ḻe yogo'le benḻe ga bezoa Titon' binḻo len xbab da' yo'o ḻo' yic̱hjlažda'ogüen'.
14 Goša' Titon' ṉezda' gonḻe güen. Na' bi cheto'eda' da' goša'ne' ca', ḻe ca da' ḻi zjanac yogo' da' chzejni'ito' le'e, ḻecz ca' da' ḻi bchoj dan' gožto' Titon', na' nacbia' be'to' diža' ḻi.
15 Na' ba chacchde' le'e cate' chjayze'ede' da' bzenagle c̱he' na' da' bžeble caten' gwṉezele benḻe da' xiṉjen'.
16 Da'nan' chebeda' na' ṉezda' yeyož gonḻe can' chazlaže' Diosen'.