4
Pablon' bzejni'ide' can' che'ne Diosen' yesezoa yesebeze'
1 Ṉa'a beṉe' migw, bac̱h bsed blo'eto' le'e gonḻe can' chazlaže' Diosen', na' bac̱h zoale chonḻe ca'. Na' can' ža X̱ancho Jesucriston' chata'yoeto' le'e na' chonto' mandadw šejchle gonchle dan' chazlaže' Diosen'.
2 Ba ṉezczele bica' da' ca' bento' mandadw gonḻe na' zjanaquen con ca ža X̱ancho Jesúsen'.
3 Diosen' chaclaže' soatez soacho gaccho beṉe' laždao' xilaže'. Bi chazlaže' gata'lencho no'ol bi nac no'ol c̱hecho o beṉe' byo bi nac beṉe' c̱hecho.
4 Chaclaže' ṉeze to tole naquen' cheyaḻa' soalen xo'ollen' sin cbi gaple doḻa' na' gonelene' ca beṉe' zaca'.
5 Bitw gonḻe can' cheson beṉe' bi zjanombi'e Diosen', con chesezoalene' no'olen' contze yesone' can' chzelaže' lažda'ogaquen'.
6 Ṉe tole bitw gonḻe da' bi cheyaḻa' gonḻe na' siye' beṉe' ḻježle na' soalenḻe no no'ol c̱he'. Ba be'czto' diža' bosṉiseto' le'e can' gon X̱ancho Diosen' cont yesezaca'zi'chgua beṉe' cheson bite'tez da' xiṉjen' zjanac ca'.
7 Diosen' gwleje' chio' cont gaccho beṉe' laždao' xilaže', gague cont goncho bi da' xiṉj da' zjanac ca'.
8 Da'nan' note'tez le'e še bi chzenagle c̱he da' qui ba bzejni'ito' le'e, gague xtiža' beṉac̱hen' chzoale ca'ale, san Diosa' chzoale ca'ale. Ḻen' beṉe' chio' Spiritw c̱hen' na' Spiriton' naquen laždao' xilaže'.
9 Bitw chyažjen gwzoja' le'e can' cheyaḻa' gaque ḻjež chio' chejnilaže'cho Jesucriston'. Dios nan' ba bsedde' le'e cont chaque ḻježle tole yetole.
10 Na' da' ḻi ba chaquele yogo' beṉe' ḻježcho ca' nita' doxen Macedonian'. Na' chata'yoeto' le'e beṉe' migw, ḻe gaquech ḻegaque'.
11 To tole ḻe yeyiljwlaže' bi žin gonḻe cont soa cuezle binḻo can' nonto' mandadw na' bitw tale gwgüia ṉa'le bi cheson beṉe' yoble.
12 Ḻe gon can' ba gwnia' cont beṉe' bi zjanaque' txen len chio' yesacbe'ede' chonḻe güen, na' ḻecze cont bibi gac falt še bi dan' chyažj chc̱hinele.
Can' gac cate' yid Criston' da' yoble
13 Beṉe' migw, chaclaže'to' ṉezele can' yesac c̱he beṉe' gosejnilaže' Jesucriston' na' ba gosate'. Chaclaže'to' ṉezelen cont bi yegüine'le ca cheson beṉe' bi nita' lez šjasyezoe' len Jesucriston'.
14 Ṉezecho gosot beṉe' Jesúsen' na' bebane' ladjo beṉe' guat ca'. Ḻecze ṉezecho Diosen' gone' cont yid Jesúsen' da' yoble nc̱he'e beṉe' ca' ba gosat con beṉe' gosejnilaže' ḻe'.
15 Na' diža' nga chzeneto' le'e naquen dan' non X̱ancho Jesúsen' mandadw gwzeneto'. Chio' mbancho ṉa'a chejnilaže'chone', še ṉe' mbancho cate' yide' da' yoble, bitw ṉacho yobch yežagchone' clel ca beṉe' ca' ba gosat.
16 Na' ca nac X̱ancho Jesúsen', cuine' yetje' ḻe'e yaban', na' ṉe' zižje gone' mandadw yesyeban beṉe' guaten', na' to angl blaona' ṉe', na' yenecho cuež trompeta c̱he Diosen'. Nach beṉe' ca' ba gosat beṉe' gosejnilaže' Criston', ḻegaque' zgua'tec yesyebane' ladjo beṉe' guaten'.
17 Na' ca yeyoža', chio' chejnilaže'chone' še ṉe' mbancho yežlio nga, gon Diosen' cont yeyepcho txen len ḻegaque' ḻe'e yaban' to ḻo' bejw na' yežagcho X̱ancho Jesúsen' ḻe'e yaban'. Nach šjayzoacho len ḻe' toḻi tocaṉe.
18 Da'nan' ḻe gon c̱hac̱h laže' ḻježle tole yetole güe'le diža' can' gaca'.