12
Cheyaḻa' soacho goncho xbab c̱he Jesúsen'
1 Ṉezecho ba gwnita' beṉe' zan gosone' da' güen ṉec̱he da' gosejnilaže' Diosen', na' dan' gosonen' chzejni'in chio' can' cheyaḻa' goncho. Da'nan' cheyaḻa' gwzoacho ca'ale še bi da' chžonen goncho can' chazlaže' Diosen' na' cuejyic̱hjcho bi da' xiṉj da' choncho, ḻe da' xiṉjen' chziye'czen chio'. Na' cheyaḻa' soatezcho goncho can' ža Diosen' sin cbi yeche'echo.
2 Jesúsen' bene' cont gwzolao chejnilaže'cho Diosen' na' gaclene' chio' cont soaczcho šejnilaže'chone' yežintecho gan' zoe'na'. Na' cheyaḻa' soacho goncho xbab ca Jesúsen' byo bc̱heje' len da' gwdi gwxaque' cate' gosote'ne' ḻe'e yag cruzen'. Bi bžone' yesonde' ḻe' da' zan da' naquen da' zban juisyw, ḻe gwṉezde' za' gon Diosen' cont soe' mbalaz len ḻe'. Na' ṉa'a Jesúsen' ba chi'e chnabi'e txen len Diosen'.
3 Cheyaḻa' goncho xbab can' byo bc̱hejlaže' Jesúsen' len yogo' da' ca' gosone beṉe' mal ca' ḻe' na' bene' can' gwna Diosen'. Na' ca'cze cheyaḻa' gwyo gwc̱hejlaže'cho goncho can' chazlaže' Diosen' ḻa'czḻa' še chaquechon zdebe; bi cheyaḻa' yeche'echo.
4 Da' zan da' ba bžaglaole chdiḻlenḻe da' malen', perw biṉa' lalj xc̱henḻe na' biṉa' yesote' le'e.
5 ¿Ba gonḻaže'le can' ža Diosen' chṉeyoede' chio' can' chon beṉe' chṉeyoe xi'iṉe'? Nyoj xtiže'na', žan:
Xi'iṉdagua', bi gacdo' bibi zejen da' chnežjo X̱ancho Diosen' le' da' saca'zi'o' cate' chono' bi da' xiṉj,
na' bi gaco' tole cate' chdiḻe' le'.
6 Ḻe X̱ancho Diosen' chzejni'ide' yogo' beṉe' chacde',
na' chnežjue' da' saca'zi' yogo' beṉe' ba gwque'e ca xi'iṉe' cate' chesone' da' xiṉj.
7 Cheyaḻa' gwyo gwc̱hejlaže'cho cate' Diosen' choṉe' chio' da' saca'zi'cho, ḻe chonde' chio' ca beṉac̱hen' chonde' xi'iṉgaque'. Ḻe yogo'ze bidao' chnežjo x̱aben' ḻebe' castigw cate' chontezbe' da' xiṉj.
8 Na' še bi choṉ Diosen' da' saca'zi'cho cate' chontezcho da' xiṉjen', zeje diža' bi naccho xi'iṉe', ḻe yogo' beṉe' ba gwque'e ca xi'iṉe' chnežjue' da' yesezaca'zi'e cate' chesonteze' da' xiṉjen'.
9 Yogo' x̱axṉa'cho bososgole' chio' yežlio nga na' gosoṉe' castigw c̱hecho cate' bi da' xiṉj bencho, na' ṉezecho ca'cze cheyaḻa' yesone'. Nacchxe cheyaḻa' gwzenagcho c̱he X̱acho Diosen' bite'teze da' chzejni'ide' chio', cont šjayzoacho len ḻe' toḻi tocaṉe.
10 Na' x̱axṉa'chon' to c̱hop izzen' šlac bososgole' chio' gosoṉe' castigw c̱hecho con ca gosaclaže'. San Diosen' ṉezde' bi da' nac güen par chio', na' chdiḻe' chio' na' choṉe' da' saca'zi'cho cont gaclenen chio' soacho goncho da' güen na' gac lažda'ochon' xilaže' can' nac lažda'ogüen'.
11 Na' bite'tez da' chyi chzaca'cho, šlac chaquen bi chazlaže'chon, perw cate' ba gwden chaclenen goncho da' zej to ḻicha na' chaclenen soacho binḻoch len xbab da' yo'o ḻo' yic̱hjlažda'ochon'.
Diosen' goṉe' da' saca'zi'cho še bi gwzenagcho c̱he'
12 Da'nan' ḻe soa ḻe gon can' chazlaže' Diosen' sin cbi yeche'ele.
13 Ḻe soa ḻe gon da' güen cont gaclenḻe beṉe' ca' ṉe' chesacžejlaže' naquen' yesone' cont ḻegaque' yosozenagche' c̱he Diosen' na' bi yesebejyic̱hje' xtižen'.
14 Ḻe yeyiljwlaže' nacle gonḻe soale binḻo len yogo'cze beṉe', na' ḻe gwzenag c̱he Diosen' cont gac lažda'olen' xilaže', ḻe nono yežin gan' zoa Diosen' še bi nac lažda'ogüen' xilaže'.
15 Ḻe gaclen ḻježle cont ṉe tole bi ganḻaže'le catequen' nži'ilaže' Diosen' chio', ḻe cate' chzolaocho choncho güedenag len Diosen', bedao' chc̱ha'o chxenen na' guacte gonen cont beṉe' zan yesonche' da' xiṉj.
16 Bi gata'lenḻe beṉe' byo bi nac beṉe' c̱hele o no'ole bi nac no'ol c̱hele. Na' bi gue'ele da' naquen da' zaca' len Diosen' can' ben da' bene' gože' Esaú, ben' bše'ede' to platw yeḻa' guagw da' cheyaḻa' gwnežjo Diosen' ḻe' dan' golje' goque' beṉe' nechw.
17 Ṉezele gwdechle goclaže' yeyac ḻo ne'e da' bdie' ḻo na' beṉe' biše', perw bich bi goc bi gone' cont yeyaquen ḻo ne'e ḻa'czḻa' gwcheže' catec gwzelažen'.
18 Nža'le chac c̱he chio' ṉa'a na' can' goc c̱he da' x̱ozxta'ocho cani' cate' Diosen' bnežjue' ḻegaque' ley c̱hen'. Cate' betje' ḻo ya'a Sinaí gwyec̱hj yi' beḻ ya'ana', gwxoan žen, beyaquen c̱hoḻ, na' gwyec̱hjchgua be'.
19 Gosende' gwchež to trompeta, na' gosende' be' Diosen' diža' len ḻegaque'. Na' besežebchgüe' na' gosata'yoede' Moisésen' bich güe'len Diosen' ḻegaque' diža'.
20 Besežebchgüe', ḻe Diosen' ba gožle' ḻegaque' še noe' yesebigue' ḻo ya'an cheyaḻa' yesote'ne' yosoc̱heḻe'ne' yej, na' ḻecz ca' yesone' še len beyix̱e'.
21 Da' zaca' žebcho goc ḻo ya'an, lente da' Moisésen' gwne': “Ḻeca chaž chžeba' can' chaquen'.”
22 Perw chio' chejnilaže'cho Criston' ba naccho txen len Diosen' ben' zoa toḻi tocaṉe na' len yogo' angl c̱he' beṉe' že' yaban' chesonxene'ne', beṉe' zjanaque' beṉe' zan juisyw. Da'nan' guac ṉacho ba gwbiga'cho ḻo ya'a Sión dan' ḻecze nzin' ciuda Jerusalén da' chi' yaba gan' zoa Diosen'.
23 Na' naccho txen len yogo'ḻoḻte beṉe' chesedop chesežag chesonxene' Jesucriston' gate'teze, beṉe' zjanyoj lagaque' ḻe'e libr c̱he Diosen' da' de yaban'. Na' yogo' chio' chejnilaže'chone' zaca'lebcho ca bi' nechw to ḻo' yo'o, bi' chzi' byen c̱he x̱axṉa'be', ḻe si'cho da' güen da' goṉ Diosen' chio'. Na' naccho txen len Diosen' beṉe' c̱hoglaogüen' c̱he yogo' beṉac̱h še de xtoḻa'gaque'. Ḻecze naccho txen len beṉe' ca' ba gosat, beṉe' gosaque' beṉe' güen lao Diosen' da' gosejnilaže'ne', na' ṉa'a ba beyož zjanacyaṉe' can' chaclaže' Diosen'.
24 Na' naccho txen len Jesús ben' blalj xc̱hene' cont gwzolao chac da' coben' da' gwna Diosen' gone' gaclene' beṉac̱hen'. Na' blalj xc̱henen' cont ba bṉitlao Diosen' xtoḻa' chio' chejnilaže'chone'. Da'nan' xc̱hen Jesúsen' zaca'chen ca xc̱hen da' Abelen' da' gwlalj caten' betw beṉe' bišen' ḻe'.
25 Da' mal juisyw še goncho güedenag len Diosen' cate' chṉe' chio'. Bene' cont gosezaca'zi' da' x̱ozxta'ocho ca' cate' gosone' güedenag len xtižen' da' gwṉelene' ḻegaque' ḻo yežlion' cani', na' goṉche' da' saca'zi' chio' še goncho güedenag len xtižen' da' choe'lene' chio' ḻo' lažda'ochon' zoe' yaba na'ate.
26 Ḻeca gwxo' cate' Diosen' betje' ḻo ya'a Sinaín' cont be'lene' da' x̱ozxta'ocho ca' diža'. Na' ṉa'a ba gwne': “Gwžin ža cate' gona' x̱o' yežlion' da' yoble, perw gague yežlio na'zen', san lente yogo' da' chle'echo ḻe'e yaba.”
27 Na' da' gwne' gone' x̱o' da' yoble, zejen te c̱he yogo' da' ca' ben Diosen' da' chle'echo, perw bi te c̱he Diosen' na' c̱he yogo' da' güen da' chone' da' bi chle'echo.
28 Da'nan' cheyaḻa' güe'cho yeḻa' chox̱clen c̱he Diosen' da' gone' cont šjayzoacho mbalaz txen len ḻe' gan' chnabi'e, na' gague da' te c̱he da' güen da' gac c̱hecho len ḻe'. Nach ḻecz cheyaḻa' gacbe'echo beṉe' zaca'chgua nac Diosen' cont gonxenchone' do yic̱hj do laže'cho can' chazlažen'.
29 Cheyaḻa' gwzenagcho c̱hen', ḻe Dios c̱hechon' ḻeca chgue'ede' da' malen', na' seḻe' ḻo yi' gabiḻ beṉe' ca' bi yesyetiṉjde' c̱he da' xiṉjen', da'nan' zaca'lebde' ca yi' beḻ.