5
Can' cheyaḻa' gon chio' chejnilaže'cho Criston'
1 Ṉa'achen' de da' ṉia' le'e nchojle cont chgüia chṉa' ḻjež le'e chejnilaže'le Criston'. Neda' ḻecze nchoja' chona' ca'. Ble'eda' gwxaca'zi' Criston' na' choe'lena' beṉe' diža' can' goquen', na' ḻecze ṉezda' žin ža šjayzoa' len ḻe' gan' yo'ochgua be'ni' ca le'e šjayzoalenḻne'.
2 Ḻe güia ṉa' beṉe' ba gwlo'o Diosen' ḻo na'le güia ṉa'le, ca no x̱an xila' chgüia chṉe'e xila' c̱he' ca'. Ḻe gonen do yic̱hj do laže'le can' chazlaže' Diosen', gague gonḻen žan ca žan, ṉeca gonḻen cont gonḻe gan mechw, san ḻe yebe gonḻen.
3 Na' ca nac beṉe' ca' güia ṉa'le, bi gonḻe znia cont yosozenague' c̱hele, san soatezle gonḻe da' chazlaže' Diosen' cont yesele'ede' can' chonḻen', na' yesacbe'ede' ḻecze can' cheyaḻa' yeson ḻegaque'.
4 X̱ancho Jesucriston' zaca'lebde' ca to beṉe' güeyoe' xila' beṉe' chnabi'e nochle güeyoe' xila'. Na' cate' yide' da' yoble, cana'ch gone' soale mbalaz juisyw še ba benḻe xšin Diosen' can' cheyaḻa', na' gague da' te c̱he yeḻa' zoa mbalaz c̱helen' ca chde c̱he no premio da' chesone' yežlio nga.
5 Nach ḻecze ca' le'e beṉe' xcuide', cheyaḻa' gwzex̱jw yic̱hjle gwzenagle c̱he beṉe' ca' ba zjanchoj ben' chosogüia chosoṉe'e le'e. Na' yogo'le ḻe gwzex̱jw yic̱hjle cont gwzenag c̱he ḻježle, ḻe:
Diosen' chdiḻlene' beṉe' zjanac ya'laže',
san chaclene' beṉe' chosozex̱jwlaže' lagüen'.
6 Cheyaḻa' gwzex̱jw yic̱hjcho gwzenagcho c̱he Dios ben' nape yeḻa' guac xen, cont žin ža gone' ga gacxencho.
7 Na' cheyaḻa' gwcua'aṉcho yogo'ḻoḻ da' chi' yic̱hjcho c̱hen ḻo na' Diosen', ḻe ḻen' chgüia chṉe'e chio'.
8 Cheyaḻa' goncho byen goncho da' nac da' zaca', na' cheyaḻa' gwsaca'cho cont Satanás dan' chnabia' da' x̱igüe' ca' bi co'on chio' to ḻo nez mal, ḻe chgue'en chio' na' cheyiljwlažen' nac gonen gwžiayin' chio', ca to bež znia chosya'aba' chdaba' chyiljwba' be gagwba'.
9 Cheyaḻa' soac̱hac̱hcho bi gwzenagcho c̱he Satanásen' na' soac̱hac̱hcho šejnilaže'cho Jesucriston', ḻe ṉezecho beṉe' ḻježcho ca' chesejnilaže'ne' gate'tezechle ḻo yežlion' ḻecze chesezaca'zi'e can' chac c̱he chio'.
10 Perw cate' ba gwde da' chyi chzaca'cho šlož dao' ṉa'a, cuin Diosen' gone' cont gacch yic̱hjlažda'ochon' can' chazlažen', cont šejnilaže'chchone', cont soecho gonchcho can' chnalažen', na' cont soacho len toze xbab. Dios nan' nži'ilaže'de' chio' na' chaclene' chio' bite'teze da' chac c̱hecho, na' ba gwleje' chio' chejnilaže'cho Criston' cont šjayzoacho txen len ḻe' gan' yo'ochgua be'ni'.
11 Cheyaḻa' soacho gonxenchone' toḻi tocaṉe da' naque' beṉe' zaca' juisyw, na' ṉabia'che' ca note'tezechle. Can' gonšcaczcho.
Pedron' chguape' tiox beṉe' ca' yosolab carten'
12 Beṉe' migw c̱hecho Silvano, ben' chacda', zoateze' chone' can' cheyaḻa' gone', na' ba bzoje' xtiža' ḻe'e cart dao' nga. Na' ḻe'e cart nga chṉeyoeda' le'e soaczle gonḻe da' güen na' chzejni'ida' le'e Diosen' ba goclene' le'e cont ṉezele da' ḻi nži'ilaže'chgüede' le'e. Da'nan' cheyaḻa' soaczle šejnilaže'lne'.
13 Beṉe' ca' ba gwlej Diosen' cont chesedop chesežague' chesonxene' Jesucriston' ḻo ciuda Roma nga chosoguape' le'e tiox, ciudan' da' nsi'a Babilonia. Na' ḻecze Marcos ben' nona' ca xi'iṉa' chguape' le'e tiox.
14 Cate' chdop chžagle txen ḻe gwnopa' na' ḻježle cate' gwguap ḻježle tiox cont gacbia' chaque ḻježle.
Na' chṉaba' yogo'le chejnilaže'le Criston' soa cuezle binḻo len xbab da' yo'o ḻo' yic̱hjlažda'olen'. Da' na'zen' chnia'.