16
Tas ca' gaže na' yeḻa' zi' ca' gosac cate' bososc̱ho'en
1 Na' benda' gwṉe Diosen' zižjechgua, zoe' gan' chacxene', gože' angl ca' gaže:
―Ḻe šja'ac ḻe šjalalj dan' yože ḻo' tas c̱helen' ḻo yežlion', da' zejen ḻeca chloca' da' xiṉj cheson beṉe' ca' bi chosozenag c̱hia', na' gona' ga yesezaca'zi'chgüe'.
2 Nach angl nechon' gwyeje' jalalje' da' yože ḻo' tas c̱hen' ḻo yežlion' gan' nac yo biž, na' yogo' beṉe' ca' zjazoa señw c̱he bežen' na' chesonxene' ḻ gua'a ḻsaca' da' nac ca ḻeba', gosebie' güe' xen güe' zban na' goselachgüe'.
3 Nach angl gwchopen' jalalje' da' yože ḻo' tas c̱hen' ḻo nisdaon' na' nisdaon' beyaquen chen ca chen c̱he beṉe' guat, na' gosat yogo' be ca' že' ḻo' nisen'.
4 Nach angl gwyoṉen' jalalje' dan' yože ḻo' tas c̱hen' ḻo yegw ca' na' gate'ze chal nis na' ḻecze besyeyaquen chen.
5 Nach benda' gwṉe angl ben' chape' nisen' da' de ḻo yežlion', gože' Diosen':
―X̱anto' Dios, len' naco' beṉe' laždao' xilaže' juisyw. Ba zoaczo' le' cate' za' x̱e yežlion'. Zejczo' ḻicha can' ba gwc̱hoglaguo' chac da' quinga,
6 ḻe beṉe' že' yežlion' ba gosote' beṉe' ca' goso'e xtižon' na' gosote' nochle beṉe' gosac ḻo nao'. Da'nan' ba beno' cont yese'eje' chen ṉec̱he da' bosolalje' xc̱hen beṉe' ca'. Na' da' chac c̱hegaque' naquen da' cheyaḻa'cze gac.
7 Nach benda' gwṉe to beṉe' do cho'a mes gan' beṉe' ca' že' yaban' chosozeye' bi da' chosozeye' cate' chesonxene' Diosen', gwne':
―X̱anto' Dios, len' napo' ḻa'zelagüe yeḻa' guac xen, chono' con can' žo' gono', na' chono' da' zej to ḻicha cate' chc̱hogbi'o c̱he beṉe'.
8 Nach angl gwdapen' jalalje' dan' yože ḻo' tas c̱hen' ḻo gwbižen', na' gwbižen' bzeyen beṉac̱h.
9 Yogüe' ḻeca goseye', perw bi besyetiṉjde' xtoḻa'gaque' na' bi gosonxene' Diosen', con goseṉe' yeḻa' ya' c̱he Dios ben' be' latje goc da' ca' chesezaca'zi'e.
10 Nach angl gayon' jalalje' dan' yože ḻo' tas c̱hen' gan' chi' bežen' chnabia'ba' na' beyac c̱hoḻ doxen gan' chnabia'ban'. Na' beṉac̱hen' gosagwxejte lože'gaquen' catec gosesezaca'zi'e.
11 Na' goseṉe' yeḻa' ya' c̱he Dios ben' zoa yaban' ṉec̱he dan' chesezaca'zi'en na' ṉec̱he güe' xen dan' zjažia ḻo cuerp c̱hegaquen', perw ṉe ca' bi besyetiṉjde' c̱he da' mal dan' gosonen'.
12 Nach angl gwxopen' jalalje' dan' yože ḻo' tas c̱hen' ḻo yegw xen da' nzi' Eufrates, na' bebiž nis yegon' cont beyaquen to nez ga yesede beṉe' gwnabia' ca' za'ac do gan' chla' gwbiž.
13 Nach ble'eda' šoṉe da' x̱igüe' da' zjanac ca bḻož. Ton bchojen cho'a beḻ be zoa gaž yic̱hj, yeton bchojen cho'a bež x̱igüen' na' yeton bchojen cho'a ben' cho'e diža' güenḻaže' cont chesonxene' bežen'.
14 Na' da' x̱igüe' quinga gosonen yeḻa' guac da' besyebane beṉe', na' jasetoben yogo' beṉe' gwnabia' ca' že' gate'teze ḻo yežlion' cont yesediḻlene' Dios ben' nap ḻa'zelagüe yeḻa' guac xen cate' žin ža gac ca'.
15 Na' benda' ben' nac Xi'iṉ Dios gwne':
―Ḻe gwzenag da' nga: ba zoa yida' da' yoble, yedexenyala' beṉe' bi chosozenag c̱hia' can' chzenyal beṉe' gwban ga chjaḻane'. Mbalaz zjazoa note'teze beṉe' nita'teze' chesebeze' neda' cate' yida' na' chesezaquede' bibi da' mal chesone', ḻe yesacde' zto' še biṉa' yesyetiṉjde' xtoḻa'gaquen' caten' yida', na' yogo'ze beṉe' yesacbe'ede' da' malen' ba gosonen' še ca'.
16 Nach bezle'eda' da' x̱igüe' ca' šoṉe bosyotoben yogo' beṉe' gwnabia' ca' že' ḻo' yežlion' to latje ga nzi' Armagedón diža' hebreo.
17 Na' angl gažen' jalalje' dan' yože ḻo' tas c̱hen' ḻo be', na' benda' gwṉe Diosen' zižje, gan' zoe' chesonxene' ḻe' yaban' gan' ḻecze chi'e chnabi'e, gwne':
―Bac̱h goc da' cheyaḻa' gac.
18 Nach gwyep yes, goc sšag, na' gošj gwtin, na' ḻeca gwxo'. Gwxo'ch ca ba goc bate'tezechle šlac že' beṉac̱hen' ḻo yežlion'.
19 Na' ciuda da' nac ḻa'zelagüe blao ḻo yežlion' gwžiayin' bchojen šoṉle, na' ḻecze gosebiayi' yezica'chle ciuda da' zjachi' ḻo yežlion'. Diosen' bich gwleze' bene' cont goseyi gosezaca'chgua beṉe' že' ciuda Babilonia c̱he da' mal da' ba gosonteque', ḻe blocchgüe' yeḻa' mal c̱hegaquen'.
20 Na' catequen' gwxo' besyenittecze yogo' yež da' zjachi' ḻo' nisdaon' na' yogo' ya'a ca'.
21 Na' gwche'chgua yej ži'a ḻo yežlion', yej zi'i da' cha'a do tapa rob güeje beselažon' cože' beṉe'. Na' beṉe' že' yežlion' goseṉe' yeḻa' ya' c̱he Diosen' ṉec̱he dan' besežaglaochgüe' len yej dan' gwchen'.