5
Jesucristw ben' zaca'lebe ca xila' daon' gosot beṉe' Israel ca' ṉec̱he xtoḻa'gaque'
1 Na' ble'eda' Dios ben' chi' chnabia', len ne'e ḻicha nox̱e' to yiš da' ndobyoyen na' nyoj chop ḻa'aten na' nyeyjon nyišen' gaže seyw.
2 Na' ble'eda' to angl gual gwṉe' zižje gwne':
―¿Non' zaca' gwzoxj seyw ca' cont šaš yišen'?
3 Na' nono bžel beṉe' zaca' gwzaše' yišen' ṉeca yaban' na' ṉe yežlion' na' ṉeca gan' že' beṉe' guat ca'. Ṉe to nono bžel beṉe' ḻa'c̱h le'ezden' nac naquen.
4 Na' gwchežchgua' da' nono zoa beṉe' zaca' gwzaše' yišen' gwlaben' na' ṉeca zaque' ṉa'ze' nac naquen.
5 Nach to beṉe' gwlej Diosen' cont naque' blao gože'nda':
―Bitw cuežo'. Gwṉa'šc, na' zoa Jesucristw ben' golje ḻo diaža c̱he da' Judá, naque' rey can' nac da' x̱ozxta'ogüe' David, na' da' nape' yeḻa' chnabia' xen zaca'lebde' ca to bež be nzi' león. Na' ḻe' zaque' gwzoxje' seyw ca' gaže na' gwzaše' yišen', ḻe ba gwzoede' bene' cont gac ṉitlao xtoḻa' beṉac̱hen'.
6 Nach ble'eda'ne' zeche' gan' chi' ben' chnabian' na' ladjo beṉe' ca' tap ben' zjažia x̱il, do gachoḻ beṉe' blao ca' tapechoa. Ble'eda'ne' ca to xila' dao' ben' ba gosote', ca xila' be žia gaže ḻozba' na' gaže yejlaoba'. Na' yejlaoban' gaže zejen zoa Spiritw c̱he Diosen' doxen ḻo yežlion' chonen can' ža Diosen'.
7 Nach ben' ble'eda' ca to xila' dao' jax̱i'e yiš dan' nox̱e' ben' len ne'e ḻicha gan' chi'e chnabi'en.
8 Na' cate' jax̱i'e yišen' beṉe' ca' tap lente beṉe' blao ca' tapechoa bosozoa xibgaque' lagüen'. Na' to to beṉe' blao ca' zjanox̱e' to arpa na' to barser de oro gan' chey yal, na' yalen' zejen xtiža' beṉe' ca' zjanac ḻo na' Diosen', dižan' chesoe'lene' ḻe' caten' chosoḻ güiže'ne'.
9 Nach beṉe' ca' gosoḻe' to da' cobe dan' ža:
Zaco' jax̱i'o yišen' cont gwzašon' na' gwzoxjo' seyw ca' nyišen',
ḻe bnežjw cuino' gosote' le'.
Blalj xc̱heno' cont bṉitlaguo' xtoḻa'to',
na' gwxi'o neto' cont nacto' ḻo na' Dios,
neto' nacto' beṉe' to to nación, to to yež, to to diaža na' chacto' gwde gwdele diža' da' de ḻo yežlion'.
10 Na' gwlejo' neto' cont nacto' ca rey,
na' zoato' chonxento' Dios c̱heton' ca bx̱oz,
na' žin ža ṉabia'to' ḻo yežlion'.
11 Nach gwṉa'a na' ble'eda' beṉe' zan juisyw angl, ṉeca gwzoeda' gwlaba'ne'. Zjazecha angl ca' cue'ej cuit ben' chi' chnabian' na' gan' že' beṉe' ca' tap na' beṉe' blao ca' tapechoa.
12 Na' benda' cheso'e dižan' zižje chesene':
Jesucriston' bnežjw cuine' ṉec̱he xtoḻa' beṉac̱hen',
na' da'nan' zaca'lebde' ca xila' daon' gosot beṉe' Israel cont gwṉitlao xtoḻa'gaque'.
Na' Jesucriston' zaca'cze' gonxenchone',
ḻe chnabi'e doxen, na' yo'o ḻo ne'e yogo'te da' zjade.
Naque' beṉe' sina' gual, na' nape' yeḻa' guac xen.
Cheyaḻa' güe'chone' yeḻa' bala'aṉ,
na' güe'cho diža' naque' beṉe' zaca' juisyw.
13 Na' ḻecze benda' yogo' beṉe' že' yaban' na' yežlion' na' beṉe' že' latje c̱he beṉe' guat, na' beṉe' zjanita' ḻo nisdao', cheso'e diža' chesene':
Toḻi tocaṉe chonxencho Dios ben' chi' chnabia'
na' Jesucriston' ben' zaca'lebde' ca xila' daon' gosot beṉe' Israel cont gwṉitlao xtoḻa'gaque'.
Zjanape' yeḻa' bala'aṉ, na' zjanaque' beṉe' zaca' juisyw,
na' zjanape' yeḻa' guac xen juisyw toḻi tocaṉe.
Na' benda' ḻecze can' gosena be chaš yežlion' na' be chaš le'e yaban' na' ḻo' nis, na' len yogo' bichle da' zjade.
14 Nach beṉe' ca' tap ben' zjažia x̱il gosene':
―Ca'šcacze gac.
Na' beṉe' blao ca' tapechoa bosozoa xibgaque' gosonxene' Dios ben' zoa toḻi tocaṉe.