6
Utaxoꞌob dub gaꞌad xabgiꞌi gun tiꞌin
1 Leꞌa be wizh wa leꞌa be xmen Jesús nsayak kwaꞌad. Parea leꞌa lat bexa wa leꞌa bexa níꞌi diꞌizh griego usaxan ndakloo ndoꞌ bexa níꞌi diꞌizh hebreo, ndab bexa:
—Leꞌa be xagots ngut xabgiꞌi ten na ncho lat besa ndee, ncho zha lá ndal bexa sian ta gaw bexa, gor na ntseꞌa bega ta wa.
2 Weꞌe leꞌa isatibtop be apostol wa mchealte iteanak be xmen Jesús, cha ndab bexa:
—Lá nsabndoꞌ ulaꞌa besa lá gudiꞌizh besa diꞌizh ten Dios, cha ndi utseꞌa besa ta ndaw bexa wa.
3 Ta weꞌe bti bega gaꞌad xabgiꞌi ndák lat bega, bexa wen nak no uzheꞌeb ncho juers ten Espíritu ten Dios ladoꞌo xa. Leꞌa bexa wa leꞌa gun tiꞌin ndee.
4 Leꞌa besa ndee li syoꞌo gan gudiꞌizhnota Dios no uluuta besa be men diꞌizh ten Dios.
5 Leꞌa itea bexa wa ngol ladna ta ndab be apostol wa, cha mti bexa Xteb dub xa uzheꞌeb ngeꞌ ladna Dios no uzheꞌeb ndap xa juers ten Espíritu ten Dios. Nsea mti bexa Julip no Prócoro no Nicanor no Timón no Parmenas no Nicolás xa Antioquía. Leꞌa Nic wa naꞌanpa xa judio, parea ndankea xa Dios lak ndun bexa judio.
6 Weꞌe cha mte bexa isagaꞌad bexa wa ndoꞌ be apostol. Cha mxoꞌob be apostol yaꞌa na gek bexa wa, unab bexa ndoꞌ Dios gakno Dios isagaꞌad bexa wa.
7 Weꞌe leꞌa diꞌizh ten Jesús uzhebpa mteꞌachso. Leꞌa gezh Jerusalén uzhebpa nsayak kwaꞌad be xmen Jesús, no gast kwaꞌadpa be uleꞌay mbingea ladna Jesús.
Usen bexa Xteb
8 Leꞌa Dios uzhebpa ndakno Xteb, no nsaꞌa xa juers ndoꞌ xa, ndun Xteb sian be uyon ten Dios, be ta ndanseana be men.
9 Leꞌa ncho dub sa nsaleaꞌ Be Men Myaꞌak, dub niꞌi sa nzhealbe bexa judio. Leꞌa pla bexa ten sa wa usaxan nyotoꞌono Xteb. Leꞌa xa wa bexa gezh Cirene nsea gezh Alejandría no Cilicia nsea Asia.
10 Ná lá ngun bexa gan ndoꞌ Xteb, leꞌa Xteb uzhebpa ndák, lak nsaꞌa Espíritu ten Dios ndoꞌ xa.
11 Weꞌe msaꞌa bexa med ukaꞌa stapla be men ndontsa gun bexa gealkwiꞌin, ndab bexa leꞌa bexa mbiꞌín leꞌa Xteb nisi Moisés no Dios.
12 Weꞌe uzheꞌeb ngokloo be men no bexa gox nsak no be mech ten ley. Cha usen bexa Xteb, cha mbiꞌi bexa xa sa nzhealbe bexa nibeꞌe wa.
13 Cha ulenno bexa be men gun gealkwiꞌin, ndab be men wa:
—Leꞌa xabgiꞌi ndee ni lá nlaꞌa ta li nisi xa niꞌi ten Dios ndee no ley ten Dios.
14 Leꞌa besa mbiꞌín ndab xa leꞌa Jesús xa Nazaret wa ulate niꞌi ten Dios, no ucheꞌa xa be costumbr ndeno beuna, ta mchaꞌan Moisés.
15 Weꞌe leꞌa be men nibeꞌe wa no itea bexa nde sa wa, mwiꞌi bexa ndoꞌ Xteb. Cha uniꞌí bexa leꞌa ndoꞌ Xteb nluu cuent ndoꞌ angel ten Dios.