15
Be angel nsea stub sgaꞌad be gealkweaꞌ
1 Cha uní naꞌ dub ta uzheꞌeb gibeꞌa, dub ta ngwanseana naꞌ. Leꞌa ta wa dub gaꞌad angel noꞌo stub sgaꞌad gealkweaꞌ, be ta lult ilen. Cha li yandoꞌ ta ntsaksi Dios be men.
2 No uní naꞌ dub ta cuent nitsdoꞌo waꞌán, cuent naꞌ vidr noch giꞌ. Leꞌa ndoꞌ nitsdoꞌo wa ndebe bexa mbin gan ndoꞌ man uzheꞌeb wa, no ndoꞌ ta cuent nak man wa, no ndoꞌ se ten ma, no ndoꞌ numr ten leaꞌ ma wa. Leꞌa bexa wa nsén be arpa ten Dios.
3 Ndaltoꞌo bexa dub cant, ta mbiltoꞌo Moisés xa mbin tiꞌin ndoꞌ Dios, no ndaltoꞌo bexa cant ten Borreg Ben wa, ndab bexa:
Go Dios Xa Nibeꞌe, xa ndon leꞌa juert ndoꞌ itea be taꞌa.
Uzheꞌeb ndanseana besa ndoꞌ be ta uzhebpa siꞌil ndun go.
Itea be taꞌa ndun go utsinka nak no gealngea nak‑a,
leꞌa go nibeꞌe itea be men umbiꞌi ten ga.
4 ¿Ton lá izheb ndoꞌ go Dios?
¿No ton lá gab leꞌa go dub Dios uzheꞌeb juert?
Leꞌa go nabkama nak Dios umbiꞌi.
Leꞌa be men itea be nacion ilen ndoꞌ go,
yankea bexa go,
leꞌa bexa uniꞌí leꞌa itea be taꞌa ndanno ga bexa
uzheꞌeb ta nsak no ta nsabndoꞌ.
5 Leꞌa tsoꞌo wa cha mwiꞌi naꞌ, cha uní naꞌ myaꞌal niꞌi ten Dios nde gibeꞌa, sa ncho caj ten Dios.
6 Leꞌa len sa wa cha utoꞌo isagaꞌad be angel noꞌo isagaꞌad gealkweaꞌ, bexa nak be lad lino ta umbiꞌi ndon nlaꞌbealꞌ. Nsea ncho dub sinch oro ta ladoꞌo bexa.
7 Leꞌa dub be ta nban wa msaꞌa dubga vas oro ndoꞌ isagaꞌad be angel wa, ncho be taꞌa ndakloo Dios len na, Dios xa nban idub tiemp.
8 Leꞌa len niꞌi ten Dios wa mzhea ncho zhen, ta nluu leꞌa Dios xa juert no siꞌil nak Dios. No naꞌan ton gun gan yate len niꞌi ten Dios gast yooka isagaꞌad be gealkweaꞌ, ta ncho len be vas nsén be angel wa.