7
Bexa nkea se ten Dios xtuzh na
1 Tsoꞌo wa uní naꞌ dap be angel nde idap skin gizhliyo. Leꞌa bexa wa nsénsaꞌab idap mbi ncho ndoꞌ gizhliyo, natsa lá uxoꞌon mbi ndoꞌ gizhliyo ni ndoꞌ nitsdoꞌo no ni dub ndoꞌ ya.
2 No uní naꞌ stub angel nchaꞌkea lad sa nlen wizh, leꞌa xa wa nsén dub se ten Dios xa nban. Cha ugeꞌ uníꞌi xa ndoꞌ idap angel wa, bexa na msaꞌa Dios juers ndoꞌ na guzhaꞌa bexa gizhliyo no nitsdoꞌo.
3 Ndab angel wa:
—Lá guzhaꞌa bega gizhliyo ni nitsdoꞌo no ni be ya baꞌ, gast gor na ukeꞌa besa se xtuzh be men ndun tiꞌin ndoꞌ Dios ten beuna.
4 Cha weꞌe mbín naꞌ plo bexa nkea se wa xtuzh na: dub gayoꞌo ncho top gaꞌal ncho dap mil bexa nkea se lat itea be ras bexa Israel.
5 Leꞌa ta wa dub tibtop mil bexa ras ten Judá.
Nsea stibtop milga bexa ras ten Rubén.
Nsea stibtop milga bexa ras ten Gad.
6 Nsea stibtop milga bexa ras ten Aser.
Nsea stibtop milga bexa ras ten Neftalí.
Nsea stibtop milga bexa ras ten Manasés.
7 Nsea stibtop milga bexa ras ten Simeón.
Nsea stibtop milga bexa ras ten Leví.
Nsea stibtop milga bexa ras ten Isacar.
8 Nsea stibtop milga bexa ras ten Zabulón.
Nsea stibtop milga bexa ras ten Kosé.
No stibtop milga bexa ras ten Benjamín.
Bexa kwaꞌad luzh nak be lad nagud
9 Tsoꞌo wa uní naꞌ uzhebpa kwaꞌad luzh be men, gast naꞌan ton gun gan ulaꞌab bexa. Leꞌa bexa wa bexa itea be nacion, nsea itea be ras, nsea itea be gezh, no itea be diꞌizh ndadiꞌizh bexa. Nde bexa lad ndoꞌ yaxil ten Xa Nibeꞌe no ndoꞌ Borreg Ben. Leꞌa bexa wa nak be lad nagud, nsea dubga xos yagin nsén bexa.
10 Cha uzhebpa ugeꞌ ndab bexa:
Leꞌa Dios ten beuna xa nsob ndoꞌ yaxil baꞌ nsea Borreg Ben baꞌ,
leꞌa bexa wa leꞌa ngoꞌo beuna ndoꞌ be ke ten beuna.
11 Leꞌa itea be angel wa nde idub gangeak wats yaxil wa, no wats bexa gox nsak wa, no wats idap be ta nban wa. Cha usaxib be angel wa ndoꞌ xa nsob ndoꞌ yaxil wa, gast ndoꞌ yo ngol xtuzh bexa. Cha ngwankea bexa Dios,
12 ndab bexa:
¡Lika nak‑a!
Idub tiemp gab beuna leꞌa Dios ten beuna dub Dios siꞌil,
no ndon leꞌa xa juert nak,
no ndon leꞌa xa nibeꞌe,
no ndon leꞌa xa ndák.
Yankea beuna xa, no uzheꞌeb usaꞌa beuna xno ndoꞌ xa idub tiemp.
¡Lika nak‑a!
13 Weꞌe leꞌa dub xa gox nsak wa unabdiꞌizh ndoꞌ naꞌ, ndab xa:
—¿Nchandoꞌ lu bexa nak lad nagud baꞌ zha? ¿Uniꞌí lu pa utoꞌo bexa baꞌ zha?
14 Leꞌa naꞌ ndáp ndoꞌ xa:
—Señor, go leꞌa uniꞌí.
Leꞌa xa wa cha ndab ndoꞌ naꞌ:
—Leꞌa bexa baꞌ bexa mxik ndoꞌ gealkweaꞌ siꞌil; msat bexa be xab bexa, no msambiꞌi bexa, no mgud xab bexa no ten ten Borreg Ben baꞌ.
15 Ta weꞌe nde bexa baꞌ wats yaxil nsob Dios,
teꞌal tezhea ndun bexa tiꞌin ndoꞌ Dios sa ncho Dios.
Leꞌa xa nsob ndoꞌ yaxil baꞌ leꞌa nsobulaꞌach bexa.
16 Yá lá gantana bexa, no lá gakta ladna bexa.
No ni lá uchuta bea bexa, no ni stub xtii lá iniꞌíta bexa.
17 Leꞌa Borreg nsoꞌ tlaw sa nsoꞌ yaxil baꞌ leꞌa ulaꞌach bexa,
no goꞌo xa bexa sa ndiblen nits nsaꞌa gealnaban.
Leꞌa Dios utsambiꞌi itea nitsndoꞌ bexa baꞌ.