3
Juan beꞌnnenꞌ bchoa nis bdixjweꞌreꞌ Diꞌll Wen ke Diosenꞌ
(Mt. 3:1‑12; Mr. 1:1‑8; Jn. 1 :19‑28)
1 Kanꞌ ba gok chiꞌno (15) iz llia beꞌnnenꞌ re Tiberio César, beꞌnnenꞌ nak zerao wnebiaꞌ ganꞌ nbane Roma, Poncio Pilatonꞌ leskaꞌ llnebieꞌ ganꞌ nziꞌi Judea, naꞌ Herodesenꞌ llnebieꞌ ganꞌ nziꞌi Galilea, naꞌ biꞌch Herodes beꞌnnenꞌ re Felipe nakeꞌ beꞌnnenꞌ llnebiaꞌ ganꞌ nziꞌi Iturea, naꞌ ganꞌ nziꞌi Traconite, naꞌ beꞌnnenꞌ re Lisanias nakeꞌ beꞌnnenꞌ llnebiaꞌ ganꞌ nziꞌi Abilinia.
2 Naꞌll Anás naꞌ, naꞌ Caifás naꞌ, nak akeꞌ bxoz brao ke beꞌnn Israel kaꞌ. Iz naꞌ, beꞌrén Diosenꞌ Juan xhiꞌnn Zacaríasenꞌ diꞌlle ganꞌ zoeꞌ yiꞌxenꞌ, ganꞌ nak latj dachenꞌ.
3 Naꞌll byejeꞌ toto yell kaꞌ lliꞌ to lloaꞌ yeo Jordán naꞌ, llyixjweꞌreꞌ beꞌnne llayaꞌl wayat akreꞌ ke da xhinnj non akeꞌ, naꞌ choa akeꞌ nis nench waziꞌxhen Diosenꞌ ke akeꞌ.
4 Llak kanꞌ bzoj Isaías beꞌnn beꞌe xtiꞌll Diosenꞌ kanaꞌ, bneꞌe ke Juan naꞌ:
To beꞌnn llosiaꞌ lyiꞌxenꞌ neꞌe:
“Legón xhnid, legonchaꞌo nez ganꞌ te Xanllonꞌ,
lewsarj yichjraꞌlldaꞌore ka llon to beꞌnn llsarj to nez li.
5 Ga nak lotj, llayaꞌl wallaꞌn yo,
ga de nez da llep llaze, llayaꞌl wayaꞌten li.
Ga bi nak lixheje, wayaꞌt linꞌ,
naꞌ nez da niꞌt yej, llayaꞌl wayej lben.
6 Yeolol beꞌnn llaꞌa yellrio ni, reꞌe akreꞌ kanꞌ yesrá Diosenꞌ beꞌnne.”
7 Beꞌnn zan jakeꞌ rao Juan naꞌ, nench wchoeꞌ leakeꞌ nis, naꞌll benreꞌ leakeꞌ znia bneꞌe:
—¡Reꞌ nakre beꞌnn zban beꞌnn wxhiyeꞌe, llonre ka bele! ¿No bzejnieꞌ reꞌ, wak warare rao danꞌ wseꞌl Diosenꞌ katenꞌ goneꞌ yel koxchis ke beꞌnnachenꞌ?
8 Chaꞌ rennere ba bayátere ke da xhinnjenꞌ nonre naꞌ, llayaꞌl gonre da wen nench gakbeꞌe beꞌnne ba ballaꞌa yichjraꞌlldaꞌore. Bi gonzre xhbab nnere: “Xhiꞌnn dia lla Abraham netoꞌ.” Yej kaꞌ niꞌt nga, wakte gon Diosenꞌ wayaken xhiꞌnn dialla Abraham.
9 Leskaꞌ ba noꞌxteꞌ banchenꞌ xhnid, yeolol yay da bi llbia daxhix wen, wchoyeꞌ do roe, gaken waye da wzeyeꞌ.
10 Naꞌll beꞌnn kaꞌ llaꞌa naꞌ, lle akeꞌ leꞌe:
—¿Akxha llayaꞌl gontoꞌ nnaꞌ chaꞌ?
11 Naꞌll Juan naꞌ, lleꞌe leakeꞌ:
—Chaꞌ de chop xherk kere, leweꞌe to xherk ke beꞌnn bibi de keꞌe. Naꞌ beꞌnn de da llaweꞌ, leskaꞌ weꞌe ke beꞌnn bi de da gaweꞌ.
12 Naꞌ beꞌnn kaꞌ nak wachixhj, jabiꞌy akeꞌ lleꞌn akreꞌ choa akeꞌ nis, naꞌ lle akeꞌ leꞌe:
—Maestro, ¿Bixha gon netoꞌ?
13 Naꞌll lle Juan naꞌ leakeꞌ:
—Bi llayaꞌl wchixhjre da xhenll.
14 Leskaꞌ beꞌnn wakaꞌa ya kaꞌ bnnab akeꞌ, lle akeꞌ Leꞌe:
—¿Bi llayaꞌl gon netoꞌ?
Naꞌ lleꞌe leakeꞌ:
—Bi wxoare koꞌll beꞌnne da wxhiyeꞌe, naꞌ bi wkaꞌre bi da de ke beꞌnne. Legón banez ka to da llonre gan.
15 Naꞌ beꞌnn zan beꞌnn Israel kaꞌ, ba llaꞌa akeꞌ dá nne, llon akeꞌ xhbab chaꞌ Juan naꞌ nak Cristonꞌ.
16 Naꞌll Juan naꞌ, lleꞌe beꞌnn zan kaꞌ llaꞌn:
—Da li nadaꞌ llchoaꞌ beꞌnn nis, naꞌ za yed to beꞌnn naplle yel wak ka nadaꞌ, bi zaꞌkaꞌ nadaꞌ ka Leꞌe, ni gaz da wadiaꞌ xhereꞌ bi zaꞌkaꞌ. Leꞌe wchoeꞌ beꞌnn nis kon ren Spíritu ke Diosenꞌ, da gon ka llon yiꞌ.
17 Katenꞌ yedeꞌn, goneꞌ ka llon beꞌnn kate llsoeꞌ trigo, llazieꞌ trigonꞌ, naꞌ llzeyeꞌ yixh bebe ken. Leꞌe napeꞌ to yiꞌ da bi wayorkze.
18 Naꞌ kaꞌ, diꞌll zan da beꞌe Juan naꞌ, llyixjweꞌreꞌ Diꞌll Wen ke Xanllonꞌ.
19 Juan naꞌ, leskaꞌ lleꞌe Herodes beꞌnnenꞌ llnebiaꞌ Judeanꞌ, ka da xhinnj xhen naꞌ noneꞌ, zoreneꞌ Herodías noꞌr ke biꞌcheꞌn re Felipe. Leskaꞌ lleteꞌ leꞌe ka nak billre da xhinnj lloneꞌ.
20 Naꞌ Herodes naꞌ, basyolleꞌ beneꞌ ye to da xhinnj xhen, broeꞌ Juan naꞌ rill ya.
Jesúsenꞌ blloeꞌ nis
(Mt. 3:13‑17; Mr. 1:9‑11)
21 Bixha chak nna llchoa Juan naꞌ beꞌnn kaꞌ nis, leskaꞌ bllin Jesúsenꞌ, naꞌ bchoa Juan naꞌ Leꞌe nis. Bixha chak llalwill Jesúsenꞌ Dios naꞌn, byarj yebánꞌ,
22 naꞌ Spíritu ke Diosenꞌ betjen bzorenen Leꞌe, naꞌ nak Spíritunꞌ ka to plom daꞌo, naꞌ ben akreꞌ be xhnne ke Diosenꞌ bneꞌe:
—Rweꞌ nakoꞌ xhiꞌnnaꞌ nllieꞌraꞌ, llaweraꞌ llazraꞌllaꞌ kwis.
Xozxtaꞌo Jesucristonꞌ
(Mt. 1:1‑17)
23 Chilloa (30) ize Jesúsenꞌ, kanꞌ bzoraweꞌ lloneꞌ xchineꞌ danꞌ zadyeneꞌ rao yellrionꞌ, kon kanꞌ bne akeꞌ, gokeꞌ xhiꞌnn José, naꞌ Josénꞌ gokeꞌ xhiꞌnn Elí,
24 Elí naꞌ gokeꞌ xhiꞌnn Matat,
Matat naꞌ gokeꞌ xhiꞌnn Leví,
Levínꞌ naꞌ gokeꞌ xhiꞌnn Melqui, naꞌ Melqui naꞌ gokeꞌ xhiꞌnn Jana,
Jana naꞌ gokeꞌ xhiꞌnn José.
25 José naꞌ gokeꞌ xhiꞌnn Matatías, naꞌ Matatías naꞌ gokeꞌ xhiꞌnn Amós,
Amós naꞌ gokeꞌ xhiꞌnn Nahum,
Nahum naꞌ gokeꞌ xhiꞌnn Esli, naꞌ Esli naꞌ gokeꞌ xhiꞌnn Nagai,
26 Nagai naꞌ gokeꞌ xhiꞌnn Maat, naꞌ Maat naꞌ gokeꞌ xhiꞌnn Matatías,
Matatías naꞌ gokeꞌ xhiꞌnn Semei,
Semei naꞌ gokeꞌ xhiꞌnn José, naꞌ José naꞌ gokeꞌ xhiꞌnn Judá.
27 Judá naꞌ gokeꞌ xhiꞌnn Joana,
Joana naꞌ gokeꞌ xhiꞌnn Resa, naꞌ Resa naꞌ gokeꞌ xhiꞌnn Zorobabel,
Zorobabel naꞌ gokeꞌ xhiꞌnn Salatiel,
Salatiel naꞌ gokeꞌ xhiꞌnn Neri.
28 Naꞌ Neri naꞌ gokeꞌ xhiꞌnn Melqui,
Melqui naꞌ gokeꞌ xhiꞌnn Adi,
Adi naꞌ gokeꞌ xhiꞌnn Cosam, naꞌ Cosam naꞌ gokeꞌ xhiꞌnn Elmodam,
Elmodam naꞌ gokeꞌ xhiꞌnn Er.
29 Er naꞌ gokeꞌ xhiꞌnn Josué, naꞌ Josué naꞌ gokeꞌ xhiꞌnn Eliezer,
Eliezer naꞌ gokeꞌ xhiꞌnn Jorim,
Jorim naꞌ gokeꞌ xhiꞌnn Matat.
30 Naꞌ Matat naꞌ gokeꞌ xhiꞌnn Leví,
Leví naꞌ gokeꞌ xhiꞌnn Simeón,
Simeón naꞌ gokeꞌ xhiꞌnn Judá, naꞌ Judá naꞌ gokeꞌ xhiꞌnn José,
José naꞌ gokeꞌ xhiꞌnn Jonán,
Jonán naꞌ gokeꞌ xhiꞌnn Eliaquim.
31 Naꞌ Eliaquim naꞌ gokeꞌ xhiꞌnn Melea,
Melea naꞌ gokeꞌ xhiꞌnn Mainán,
Mainán naꞌ gokeꞌ xhiꞌnn Matata, naꞌ Matata naꞌ gokeꞌ xhiꞌnn Natán.
32 Natán naꞌ gokeꞌ xhiꞌnn David,
David naꞌ gokeꞌ xhiꞌnn Isaí, naꞌ Isaí naꞌ gokeꞌ xhiꞌnn Obed,
Obed naꞌ gokeꞌ xhiꞌnn Booz,
Booz naꞌ gokeꞌ xhiꞌnn Salmón, naꞌ Salmón naꞌ gokeꞌ xhiꞌnn Naasón.
33 Naasón naꞌ gokeꞌ xhiꞌnn Aminadab,
Aminadab nanꞌ gokeꞌ xhiꞌnn Aram, naꞌ Aram naꞌ gokeꞌ xhiꞌnn Esrom,
Esrom naꞌ gokeꞌ xhiꞌnn Fares,
Fares naꞌ gokeꞌ xhiꞌnn Judá.
34 Naꞌ Judá naꞌ gokeꞌ xhiꞌnn Jacob,
Jacob naꞌ gokeꞌ xhiꞌnn Isaac,
Isaac naꞌ gokeꞌ xhiꞌnn Abraham, naꞌ Abraham naꞌ gokeꞌ xhiꞌnn Taré,
Taré naꞌ gokeꞌ xhiꞌnn Nacor.
35 Nacor naꞌ gokeꞌ xhiꞌnn Serug, naꞌ Serug naꞌ gokeꞌ xhiꞌnn Ragau,
Ragau naꞌ gokeꞌ xhiꞌnn Peleg,
Peleg naꞌ gokeꞌ xhiꞌnn Heber, naꞌ Heber naꞌ gokeꞌ xhiꞌnn Sala.
36 Sala naꞌ gokeꞌ xhiꞌnn Cainán,
Cainán naꞌ gokeꞌ xhiꞌnn Arfaxad, naꞌ Arfaxad naꞌ gokeꞌ xhiꞌnn Sem,
Sem naꞌ gokeꞌ xhiꞌnn Noé,
Noé naꞌ gokeꞌ xhiꞌnn Lamec.
37 Naꞌ Lamec naꞌ gokeꞌ xhiꞌnn Matusalén,
Matusalén naꞌ gokeꞌ xhiꞌnn Enoc,
Enoc naꞌ gokeꞌ xhiꞌnn Jared, naꞌ Jared naꞌ gokeꞌ xhiꞌnn Mahalaleel,
Mahalaleel naꞌ gokeꞌ xhiꞌnn Cainán.
38 Cainán naꞌ gokeꞌ xhiꞌnn Enós, naꞌ Enós naꞌ gokeꞌ xhiꞌnn Set,
Set naꞌ gokeꞌ xhiꞌnn Adán, naꞌ Adán naꞌ gokeꞌ xhiꞌnn Dios.