7
Nin ruñihchi lastoꞌ bwiinn
(Mt. 15.1‑20)
1 Ya tuhbi dxyih, guyuuꞌ paaldaa raꞌ bwiinn fariseu cun paaldaa raꞌ mwehsu raꞌ nin ruluuꞌyi xlehyi Moisehs, zeꞌ raꞌ ba nez guihdxyi Jerusalehn ya badiaaꞌha raꞌ ba loh Jesuhs.
2 Ya loh nin bwaꞌha raꞌ fariseu raꞌ chi ayi bidxiꞌbi naa raꞌ xpwiinn Jesuhs chin gudahw raꞌ ba,
3 niꞌchin guñiꞌ tohnta raꞌ ba, laasii ayi bwiꞌhnn raꞌ xpwiinn Ñiꞌh ziga naa xcostumbre raꞌ ba nee neezaa snuhn raꞌ bwiinn Israel raꞌ nin zeezahnee xcostumbre raꞌ riiꞌ laasii guehtu xtatita rooꞌ raꞌ ba basiaꞌhaneen laꞌh raꞌ ba, laasii bwiinn Israel raꞌ chi guillii-guillii rdxiꞌbi naa raꞌ ba chin rahw raꞌ ba.
4 Ya ziga chin razah bwiinn Israel raꞌ chi loh dxiaaꞌ sidela ayi guidxiꞌbi naa raꞌ ba loh raꞌ ba cun ñaaꞌ raꞌ ba, ayi rahw raꞌ ba, ziꞌchi za gudahla raꞌ ziahan rooꞌ raꞌ costumbre raꞌ nin riazahnee raꞌ ba; ziꞌchi za rusiaa raꞌ ba xqihsu raꞌ ba nee cun xtraxtra raꞌ ba, nee cun xtraxta dxiꞌba raꞌ ba.
5 Chiꞌchi rahbi raꞌ bwiinn fariseu cun mwehsu raꞌ xteenn lehyi:
―¿Xixnaa ayi rdxiꞌbi naa raꞌ xpwiinn luꞌh chin rahw raꞌ ba tin guunn raꞌ ba ziga naa costumbre nin basiaꞌhannee raꞌ guehtu xtatita roo raꞌ nuꞌh laꞌh nuꞌh?
6 Chiꞌchi rahbi Ñiꞌh loh raꞌ ba:
―¡Bwiinn rusaguiꞌhi bwiinn raꞌ! Guchii guehtu Isaías ziga bacaꞌh ba xcweenta ziga ruhnn tu:
Rñiꞌ tu ziga zi nin rbwihdxyi-rnaaba laꞌh Dxiohs, per stoꞌ tu zihtu riaꞌhan loh xquelrnabwaꞌ Dxiohs.
7 Lliaaꞌh naa zi ruzuꞌnllihbi tu nez loon, laasii laꞌh tu ruluuꞌyi tu nin naa gahca xcostumbre tu nee rahbi tu naa raꞌn nin gunabwaꞌ Dxiohs.
8 ’Nee laꞌh tu ayi ruzoꞌbadxiahga tu xchiꞌdxyi Dxiohs, sino que zeenaꞌhla tu nin naa xigaaba raꞌ bwiinn guidxyiyuh.
9 Rahbi za Ñiꞌh:
―¡Bayilaa ruhnn bwiinn nasiin tu, nee cagasaaꞌn za tu tuhbi lahdu garaa raꞌ xchiꞌdxyi Dxiohs tin zeezahnee tu ziga naa xcostumbre tu nin xigaaba raꞌ bwiinn guidxyiyuh!
10 Ziga rahbi guehtu Moisehs: “Guhca nadziiꞌhi laꞌh xpaah luꞌh cun xmaah luꞌh, ya nin cuꞌdii laꞌh xpaah ñiꞌh o xmaah ñiꞌh nahpa chiin tu ba.”
11 Per laꞌh tu ruluuꞌyi tu ayi nahpa guzoꞌbadxiahga bwiinn xchiꞌdxyi xcuzahn raꞌ ba, ruchiꞌhyi tu laꞌh raꞌ ba tin guiñiꞌ raꞌ ba squiiꞌ: “Ayi nuu gacaneꞌhn yiꞌh laasii bwiꞌhnnaꞌhn lligaaba gudiꞌhihn guhn garaa nin naꞌpahn laꞌh Dxiohs.”
12 Ya garaa nin rñiꞌ squiiꞌ ayi ru ruhnn raꞌ ba jweersi gacanee raꞌ ba laꞌh xcuzahn raꞌ ba,
13 ya pur xcostumbre tu ruhnn ayi ruzoꞌbadxiahga raꞌ ba xchiꞌdxyi Dxiohs, ya ziahan ru cohsa raꞌ nin naa raꞌ ziꞌchi ruhnn tu.
14 Chiꞌchi gudihdxyi Jesuhs laꞌh raꞌ bwiinn, tin rahbi Ñiꞌh loh raꞌ ba:
―Gulgacaꞌdxiahga dziꞌtsi garaa tu.
15 Nin rguꞌtii laꞌh raꞌ bwiinn loh duhlda ayi naan guelwahw nin rahw raꞌ ba, sino que dxyiꞌdxyi dxixiꞌhw nin riinloh stoꞌ raꞌ ba, niꞌchi naa nin rguꞌtii laꞌh raꞌ ba loh duhlda.
16 Niꞌchin nin riuuꞌ-riaꞌzi dxyiꞌdxyi gulgacabwaꞌ nin zeꞌ raꞌ loh dxyiꞌdxyi raꞌ riiꞌ.
17 Ya chin babii Jesuhs lahda raꞌ bwiinn ziahan raꞌ chi, ya biuꞌgarii Ñiꞌh laꞌn yuuꞌ, chiꞌchi gunaabadxyiꞌdxyi raꞌ nin ruluuꞌyi Ñiꞌh tin para gacabwaꞌ raꞌ ban,
18 chiꞌchi rahbi Ñiꞌh loh raꞌ ba:
―¿Ta neezaa tu ayi rahcabwaꞌ tu? ¿Tayi rahcabwaꞌ tu ayi naa bwiinn bwiinn duhlda pur nin rahw raꞌ ba?
19 Nin rahw bwiinn ayi radzihnan tihxi stoꞌ bwiinn sino que radzihnan hasta laꞌn buxa nin nuu cweeꞌ stoꞌ bwiinn, ya rariaꞌhan nez hasta riuuꞌbwihin.
Ziꞌchi guñiꞌ Ñiꞌh tin baluuꞌyi Ñiꞌh nayaa naa garaatiiꞌ xica nin rahw bwiinn.
20 Neezaa rahbi Ñiꞌh:
―Dxyiꞌdxyi nin rreꞌh rwaaꞌ raꞌ bwiinn, niꞌchi sihn rguꞌtii laꞌh raꞌ ba loh duhlda,
21 laasii stoꞌ raꞌ bwiinn rreꞌh raꞌ lligaaba dxaaba raꞌ ziga guelgubwihlli cun guelrbaaꞌn, guelrdxiinn bwiinn,
22 guelrcahnee cheꞌhla stuhbi bwiinn, guelrzaꞌbistoꞌ xixteenn bwiinn, guelnadxaaba, guelrusaguiꞌhi lasaaꞌ ñiꞌh, nin ayi xtuhyitiiꞌ loh ñiꞌh ziga xcweenta dziꞌn dxaaba raꞌ, guelrwaꞌha dxaaba laꞌh stuhbi bwiinn, guelrudziiꞌba dii yihca lasaaꞌ ñiꞌh, guelnayachi, cun luꞌh bwiinn stoꞌ raꞌ nahda.
23 Garaa raꞌ lligaaba dxaaba raꞌ riiꞌ rreꞌh stoꞌ bwiinn niꞌchi nin rguꞌtii laꞌh raꞌ bwiinn loh duhlda.
Tuhbi gunnaꞌh nin ayi naa bwiinn Israel gunaaba ba tuhbi ayuda loh Jesuhs
(Mt. 15.21‑28)
24 Ya riꞌchi biriaꞌh Jesuhs zee Ñiꞌh para guihdxyi Tiru cun Sidohn, ya chin badzihn Ñiꞌh riꞌchi, bidxeela Ñiꞌh tuhbi yuuꞌ hasta guyuuꞌ Ñiꞌh laasii ayi guclaaꞌdzi Ñiꞌh ñahcabwaꞌ bwiinn nuu Ñiꞌh riꞌchi, per ayi guhca ziꞌchi.
25 Laasii lwehgu bihn xmaah tuhbi dxaꞌpa nin guyuuꞌ tuhbi bwiinndxaaba stoꞌ ñiꞌh laꞌh Jesuhs nuu riꞌchi, niꞌchin gwah ba hasta nuu Ñiꞌh ya chin bwaꞌha ba loh Jesuhs bazuꞌnllihbi ba nezloh Ñiꞌh,
26 ya gunnaꞌh chi ayi naa ba bwiinn Israel sino que naa ba tuhbi bwiinn sirofenicia, per loh nin gunaaba ba tin gabweꞌhe Jesuhs bwiinndxaaba chi stoꞌ lliiꞌndxaꞌpa ba,
27 rahbi Jesuhs loh ba:
―Basaaꞌn gahwxgah raꞌ lliiꞌn raꞌn, laasii ayi naa bwen chyu cooba xpahn raꞌ lliiꞌn raꞌn ya chubwihin loh bwehcu.
28 Chiꞌchi rahbi gunnaꞌh chi:
―Guchii luꞌh daada, per hasta bwehcu raꞌ rahw raꞌ guehta biuyiꞌhn nin riaaba llaaꞌn mwella nin rahw raꞌ lliiꞌn raꞌ luꞌh.
29 Chiꞌchi rahbi Ñiꞌh loh gunnaꞌh chi:
―Bwehngahca guñiꞌ luꞌh, zahca guziaa luꞌh, ya laꞌh bwiinndxaaba chi bariaꞌh stoꞌ lliiꞌndxaꞌpa luꞌh.
30 Ya chin bwaa gunnaꞌh chi yihdzi ba gwaguiaꞌha ba loh luꞌhn laꞌh lliiꞌndxaꞌpa ba bwiinndxaaba chi bariaꞌhala stoꞌ bi.
Jesuhs basiaca laꞌh tuhbi goopa nin ayi riin dxiahga ñiꞌh
31 Ya chin bariaꞌh Jesuhs guihdxyi Tiru, chiꞌchi gudiiꞌdxi Ñiꞌh nez guihdxyi Sidohn cun garaa raꞌ nezloh guihdxyi raꞌ nin rnabwaꞌ Decápolis, ya ziꞌchi zi badzihn Ñiꞌh hasta rwaaꞌ laguhn xteenn Galilea,
32 ya chin guyuuꞌ Ñiꞌh laꞌn guihdxyi xteenn Decápolis, gwanee paaldaa raꞌ bwiinn laꞌh tuhbi ndxiꞌhw nin naa goopa loh Ñiꞌh, ya gudxiꞌhn raꞌ ba gudziiꞌba naa Ñiꞌh yihca bwiinn goopa chi tin dxiaca ba,
33 ya chiꞌchi gwanee Ñiꞌh laꞌh bwiinn goopa chi tuhbi lahdu nez hasta ayi chyu bwiinn riiꞌ, riꞌchi guluꞌtee Ñiꞌh bacwihn naa Ñiꞌh laꞌn dxiahga bwiinn goopa chi, neezaa bagahdxyi xihin Ñiꞌh yihca bacwihn naa Ñiꞌh ya bidxiꞌ Ñiꞌh luudxyii ba,
34 chiꞌchi bwaꞌha Ñiꞌh nez llaaꞌndxibaaꞌ guñiꞌ biin lastoꞌ Ñiꞌh, chiꞌchi rahbi Ñiꞌh loh ndxiꞌhw chi:
―¡Efata! ―Naa ziga guiñiꞌ luꞌh: ¡Billaala!.
35 Ya hohra chi gahca ballaala dxiahga bwiinn goopa chi, neezaa luudxyi ba guhca bañiꞌ,
36 chiꞌchi rahbi Jesuhs loh ndxiꞌhw chi:
―Ayi chyuloo tiiꞌ chixteeꞌ luꞌh pur nin basiaacahn yiꞌh.
Per loh bihnn ba ayi xi guuyi ba mahzi ru batiꞌchi ba dxyiꞌdxyi chi,
37 ya garaa raꞌ bwiinn nin bihn dxyiꞌdxyi chi badxyigaaꞌ loh raꞌ ba neezaa rahbi raꞌ ba:
―¡Garaa nin ruhnn ba naa dziꞌn zaꞌca! ¡Hasta bwiinn gweꞌta rallaala ba dxiahga ñiꞌh ya goopa raꞌ ruhnn ba pur rañiꞌ raꞌ ba!