5
Rcaꞌpwehn Pehdru laꞌh raꞌ xpwiinn Jesucristu
1 Pwihsi naꞌh ziga naan tuhbi bwiinn guuhla cañiꞌneen laꞌhtu nin naa raꞌ bwiinn guuhla loh raꞌ xpwiinn guidoꞌ Jesucristu, laasii naꞌh naan tuhbi nin bwaꞌhaloh cuun guelrzaꞌcazii nin batiꞌdxiloh Jesucristu, nee bwaꞌhazahn guelbachaꞌh nin guniꞌhi Ñiꞌh laꞌhnuꞌh chin guibiaꞌgarii Ñiꞌh stuhbi;
2 gulgahpa laꞌh raꞌ bwiinn raꞌ nin naa raꞌ ziga xiꞌyiꞌhn Dxiohs, laꞌhtu nin naa raꞌ ziga baxtohra; gulguiꞌhnnan tal ziga xclaaꞌdzi Dxiohs gaca, per ayi pur nin nahpa guunn dxiꞌh tun sino que pur xcuuxta tu; nin ayi pur saꞌbi dxiꞌh stoꞌ tu xcweenta mweeyi sino que gulguiꞌhnn xtsiꞌn tu cun gaduhbi stoꞌ tu.
3 Ayi guinabwaꞌ tu loh raꞌ ba ziga rnabwaꞌ tuhbi ballwaaꞌn loh raꞌ bwiinn raꞌ nin ruhnn raꞌ xtsiꞌn ba; gulgaluuꞌyi xa guunn raꞌ ba ziga naa xquelnabahan zaꞌca tu,
4 laasii chin dxiꞌ Jesucristu nin naa Baxtohr loh raꞌ bwiinn raꞌ nin naa raꞌ ziga lliꞌhyi nez loh Ñiꞌh, laꞌhtu zicaꞌha tu tuhbi guelnazaꞌca duxa nin guniꞌhi Ñiꞌh laꞌhtu, nin ayi naa ziga batahga nin naa raꞌ curohn raꞌ nin rbihdzi.
5 Ziꞌchi gahca za laꞌh nin naa raꞌ biiꞌhin, gulgazoꞌbadxiahga xchiꞌdxyi raꞌ bwiinn raꞌ nin naa raꞌ bwiinn guuhla loh tu. Garaa tu gulchaꞌzi xchiꞌdxyi lasaaꞌ tu, gulgaluuꞌyi lasaaꞌ tu cun gaduhbi guelnadoꞌlaadzi xteenn tu, laasii:
Dxiohs riuuꞌ llahn stoꞌ Ñiꞌh xcweenta raꞌ bwiinn nayachi raꞌ,
per ralahsa stoꞌ Ñiꞌh laꞌh raꞌ bwiinn nadoꞌlaadzi raꞌ.
6 Niꞌchin cun gaduhbi guelnadoꞌlaadzi xteenn tu gulchuu loh xneziuh Dxiohs, laasii laꞌh Ñiꞌh nahpa Ñiꞌh guelrnabwaꞌ rooꞌ tin ziꞌchi gaca lasahca tu chin guunn Ñiꞌh lligaaba guzaꞌloh Ñiꞌh guunn Ñiꞌhn.
7 Gulgatiꞌdxi garaa guelrzaaꞌ nin riuuꞌ tu loh naa Dxiohs, tin gusacwachidxyii Ñiꞌh stoꞌ tu, laasii laꞌh Ñiꞌh rucaꞌh stoꞌ Ñiꞌh laꞌhtu.
8 Gulgahca nasiin, laasii laꞌh bwiinndxaaba nin rdxyiꞌchinee laꞌhtu caꞌnzaa ziga zi tuhbi bweꞌdzi nin rchahbwih duxa yahnn ñiꞌh tin caꞌndxiꞌhyi ba chyu guxiꞌn ba.
9 Gulsuh chihpa nezloh ba, nee gulchezah dziꞌtsi loh guelriachii stoꞌ xteenn Dxiohs, laasii ayi laꞌhdxiꞌh tu cagatiꞌdxiloh tu guelrzaꞌcazii, sino que babihn tu xcweenta snuhn raꞌ bwihtsi raꞌ nuꞌh nin rii ziahan lahta cazaꞌcazii za raꞌ ba pur nin zeezah raꞌ ba loh xneziuh Jesucristu.
10 Pwihsi yaque laꞌhtu batiꞌdxiloh tu guelrzaꞌcazii loh paaldaa raꞌ dxyih, Dxiohs zuhnn nayaa Ñiꞌh laꞌhtu, zuhnn nanchii Ñiꞌh laꞌhtu, zuhnn nadxiipa Ñiꞌh laꞌhtu, laasii laꞌh Ñiꞌh naa Dxiohs nin gudihdxyi laꞌhnuꞌh tin guidxuu nuꞌh loh llaꞌñihrooꞌ xteenn Ñiꞌh cun laꞌh Jesucristu.
11 Para laꞌh Ñiꞌh banaa xteenn Ñiꞌh guelrnabwaꞌ para tuꞌpazi. Pwihsi ziꞌchi gaca.
Luulchima guelrgahpaDxiohs
12 Ya zieꞌnee Silvanu dxihtsi riiꞌ loh tu, nee ruꞌnnahnn lligaaba naa ba tuhbi lasaaꞌ nuꞌh nin ba batiꞌdxi xquelnabahan ñiꞌh loh naa Jesucristu. Laꞌh ba guhcanee ba naꞌh bacaꞌhn paaldaasi dxyiꞌdxyi raꞌ riiꞌ loh tu, tin cañiꞌneen laꞌhtu nee cun cañiꞌzahn loh tu guchii naa raꞌ dxyiꞌdxyi raꞌ riiꞌ, nee naa raꞌn tuhbi guelrahcanee paꞌhca xteenn Dxiohs; niꞌchin ¡gulchezah dziꞌtsi loh cweenta rii!
13 Bwiinn raꞌ nin naa raꞌ xpwiinn Dxiohs nin rii raꞌ loh guihdxyi Babilonia, nin gulii za Dxiohs ziga za gulii Ñiꞌh laꞌhtu, ruxeꞌhla raꞌ ba tuhbi guelrgahpaDxiohs para laꞌhtu; cun neezaa Marcu nin naa ziga zi lliiꞌnahn loh xchiꞌdxyi Jesucristu, ruxeꞌhla za bi tuhbi guelrgahpaDxiohs para laꞌhtu.
14 GulgahpaDxiohs laꞌh cada tuhbigah lasaaꞌ tu, pwihsi rnaꞌbaꞌhn loh Dxiohs gusacwachidxyii Ñiꞌh stoꞌ tu nin gwachii stoꞌ raꞌ ñiꞌh xchiꞌdxyi Jesucristu. Ziꞌchi gaca pwihsi.