4
1 Rñiꞌn loh luꞌh loh Dxiohs nee cun loh za Daada Jesucristu nin guibiaꞌgarii ziga tuhbi rrehyi tin guunn Ñiꞌh guelguxchisi loh raꞌ bwiinn raꞌ nin rii nabahan loh guidxyiyuh nee cun gallee raꞌ nin guhchi raꞌ za,
2 nahpa guuyidxyiꞌdxyi luꞌh xchiꞌdxyi Dxiohs, guzuhsiin loh Dxiohs cuun chiꞌhzi hohra, baluuꞌyi laꞌh raꞌ bwiinn duhlda raꞌ, gudxihndxi laꞌh raꞌ bwiinn raꞌ nin ayi xclaaꞌdzi raꞌ guzoꞌbadxiahga xchiꞌdxyi Dxiohs, cun guñiꞌnee za laꞌh raꞌ lasaaꞌ raꞌ nuꞌh xchiꞌdxyi Dxiohs,
3 laasii zadzihn dxyih nin ayi dxiuuꞌstoꞌ raꞌ bwiinn gucaꞌdxiahga raꞌ ba guelrluuꞌyi zaꞌca xteenn xchiꞌdxyi Dxiohs; mahzi ziuuꞌstoꞌ raꞌ ba nin naachiꞌhzi xigaaba raꞌ ba, niꞌchin zidxiꞌhyi raꞌ ba ziahan raꞌ daada raꞌ nin ruluuꞌyi tin guluuꞌyi raꞌ ba laꞌh raꞌ ba nin naa si xigaaba raꞌ ba dxihn raꞌ ba.
4 Ayi guzoꞌbadxiahga raꞌ ba xchiꞌdxyi Dxiohs; mahzi dxiuuꞌstoꞌ raꞌ ba xica raꞌ dxyiꞌdxyi nin rdxiꞌnlaadzi raꞌ bwiinn.
5 Per yiꞌh bwaꞌha guzuhchihpa tin batiiꞌdxiloh loh garaa raꞌ nin guunnee raꞌ ba yiꞌh, nee gwazahnee baluuꞌyi xchiꞌdxyi Dxiohs nin rutaꞌh laꞌh bwiinn loh duhlda, nee bwiꞌhnn zaꞌca xtsiꞌn luꞌh.
6 Laasii naꞌh riiꞌ laꞌn zuꞌh tin chiinn raꞌ ba naꞌh; laꞌh dxyih zeꞌgadzihn gachiꞌhn.
7 Laꞌh xtsiꞌnaꞌhn guluhlla ziga xtsiꞌn tuhbi suldahdu nin gudxihndxi zaꞌca loh guerru, laꞌh dxyih raꞌ riiꞌ guyaꞌloh nee guluꞌchaꞌyi dziꞌtsiꞌhn guelriachiistoꞌhn laꞌh Dxiohs,
8 yannah cabweꞌzaꞌhn guicaꞌhahn guelnazaꞌca nin guniꞌhi Daada nin nuu dxibaaꞌ naꞌh, laasii laꞌh Daada riiꞌ naa Jwehsi nin ruhnn zaꞌca guelguxchisi, per ayi naꞌh si dxiꞌh guniꞌhi Ñiꞌhn sino que neezaa laꞌh garaa raꞌ bwiinn raꞌ nin cabweeza dziꞌtsi laꞌh Ñiꞌh chin guibiaꞌgarii Ñiꞌh stuhbi.
Dxyiꞌdxyi xteenn Pahblu para loh Timoteu
9 Bwiꞌhnn jweersi dxieꞌguiaꞌha luꞌh cuunaꞌhn,
10 laasii laꞌh Demas, nin mahzi rucaꞌstoꞌ ñiꞌh guidxyiyuh riiꞌ, laꞌbi basaaꞌn naꞌh, laꞌh bi zee guihdxyi Tesalónica, ya Cresente zee loh guihdxyi Galacia, ya Titu zee guihdxyi Dalmacia.
11 Sola laꞌh dxiꞌh Lucas dxuu nu riiꞌ. Badxiꞌhyi laꞌh Marcu ya dxieꞌnee luꞌh bi laasii zahca gacanee bi naꞌh loh xtsiꞌn Dxiohs,
12 ya Tíquicu baxeꞌhlaꞌhn loh guihdxyi Efesu.
13 Chin dxiꞌ luꞌh dxieꞌnee luꞌh lahdxi cahpa nin basiaꞌhanahn loh guihdxyi Troas rwaaꞌ yihdzi Carpu, cun nee raꞌ chihbru raꞌ pwihsi ayi dxiaꞌldastoꞌ luꞌh xchihtsi raꞌn.
14 Daada Alejandro, nin ruhnnee dxiꞌba dziꞌn, basaꞌcazii duxa ba naꞌh; Dxiohs gusadxihlli laꞌh ba ziga gahca nin bwiꞌhnnee ba laꞌh nuꞌh pur xchiꞌdxyi Dxiohs nin raluuꞌyi nuꞌh.
15 Yiꞌh guhca nasiin tin ayi xi guunnee ba yiꞌh laasii rdxyiꞌchinee duxa ba laꞌh nuꞌh pur xchiꞌdxyi Dxiohs nin raluuꞌyi nuꞌh.
16 Chin mwer guñiꞌn xchiꞌdxyiꞌhn nin balaloh naꞌh loh raꞌ guxchisi raꞌ, ayi chyu guhcanee naꞌh; garaa raꞌ ba basaaꞌn raꞌ ba naꞌh nee rnaꞌbaꞌhn loh Dxiohs ayi gusadxihlli Ñiꞌh nin bwiꞌhnn raꞌ ba,
17 per laꞌh Daada nin nuu dxibaaꞌ sihn bwiꞌhnn Ñiꞌh cumpahñu naꞌh nee guzuhchihpanee Ñiꞌh naꞌh tin guhca baluꞌyiꞌhn garaa xchiꞌdxyi Dxiohs loh raꞌ ba nee tin bazoꞌbadxiahga za raꞌ nin ayi naa raꞌ bwiinn Israel raꞌ xchiꞌdxyi Dxiohs, per guhcanee Dxiohs naꞌh bataꞌh Ñiꞌh naꞌh laꞌn naa raꞌ ba zigazi laꞌn rwaaꞌ tuhbi bweꞌdzi,
18 nee zutaꞌh Ñiꞌh naꞌh loh garaa raꞌ duhlda, zahpadziꞌtsi Ñiꞌh naꞌh, cun ziguꞌchaꞌyi Ñiꞌh naꞌh tin chuꞌnee Ñiꞌh naꞌh loh xquelrnabwaꞌ Ñiꞌh llaaꞌndxibaaꞌ. Lah si Ñiꞌh chuu guiñiꞌ zaꞌca raꞌ bwiinn para tuꞌpazi. Ziꞌchi gaca pwihsi.
GuelrgahpaDxiohs nin riaꞌloh dxihtsi riiꞌ
19 Badiꞌhi tuhbi guelrgahpaDxiohs laꞌh Prisca cun laꞌh Aquila, nee cun laꞌh raꞌ bwiinn lasaaꞌ Onesíforu.
20 Erastu biaꞌhan loh guihdxyi Corintu, ya laꞌh Trófimo basiaꞌhanahn loh guihdxyi Miletu laasii rahcalluꞌhu bi.
21 Bwiꞌhnn pur dxiꞌgah luꞌh galoh nin gadzihn bweꞌhw nahlda raꞌ, nee ruxeꞌhla raꞌ Eubulu, Pudente, Linu, Claudiu cun garaa ru raꞌ lasaaꞌ nuꞌh nin naa xpwiinn Jesucristu tuhbi guelrgahpaDxiohs para yiꞌh.
22 Daada Jesucristu guinabahannee Ñiꞌh yiꞌh, Dxiohs gacanee garaa tu. Ziꞌchi gaca pwihsi.