8
Bded zi mbecy ni Crisht
1 Nunu Saulo bet lagy yu nu biit dey Shteb.
Laab dzi zeꞌ de mbecy nu ricy cup consuel lo Crisht Jerusaleeng brugyiꞌ nu tonaꞌ la rzac zi dey. Orzeꞌ dela dey brush las yu par dela lugaar ni Judea nu dela lugaar ni Samaria. Nomaas de aposht ziꞌl wancyuu dey Jerusaleeng.
2 Tees la be mbecy nu tonaꞌ la rca lagy lo Ñgyoozh, de yu zeꞌ pcach dey Shteb, nunu tonaꞌ la bicy dey sentiir.
3 Tees Saulo mbicy peey nu nit loy dela mbecy nu ricy cup consuel lo Crisht. Gazaꞌ yuꞌ gazaꞌ yuꞌ la rzuꞌy. Bgayu tuñ lay mñaa gyeey la de yu nu ricy cup consuel lo Crisht par nu cha nuy dey nañ yuꞌ gyiib.
Pshaal dey riidz ni Ñgyoozh Samaria
4 Na de mbecy nu ricy cup consuel lo Crisht brush las dey zay dela lugaar. Za shaal dey riidz ni Crisht.
5 Orzeꞌ Lip guay gyedz nu la Samaria. Lo de mbecy zeꞌ pshaal yu riidz ni Crisht.
6 De mbecy zigy dzi nap bicy cuen dey de riidz nu mnii Lip. Bzuub gyidag dey riidz nu mniiy, nunu bzaac dey de nusuriidz nu bicy yu.
7 Nunu zigy mbecy nu bicy ni nuras byac yu. De nuras tonaꞌ la rbish tiy. Orzeꞌ bruu chuy lo dey. Zañ mbecy chi̱, gal nu zañ mbecy coj byac yu.
8 Nunu de mbecy Samaria tonaꞌ la gucyit lagy dey.
9 Na laab gyedz zeꞌ rcyiiñ tub mbecy nu la Simo̱o̱. Bi rac tiem rguuy de mbecy Samaria nu fis gyel tuꞌ niy. Mniiy nu tonaꞌ la mbecy lily nac yu.
10 Dela mbecy nu yuꞌ gyedz zeꞌ dzi nap bicy cuen dey de riidz nu rniiy gush lañ de yu shni gashtal de yu lily. Mnii dey:
―Simo̱o̱ nac yu biñ ni Ñgyoozh nu dzi cyiiñ nu gyicy coz ily ―rnii dey.
11 Tonaꞌ la bicy cuen de mbecy yu gun dzi gulas rguuy dey nu fis gyel tuꞌ niy.
12 Tees ornu bicy cup de mbecy consuel lo de riidz nap ni gyel gubier ni Ñgyoozh nunu de riidz nap ni Jesucrisht, de riidz nu mnii Lip, orzeꞌ bzu nis dey. Bzu nis de yu gyeey nunu bzu nisaꞌ de biñ mñaa.
13 Niꞌ Simo̱o̱ bicy cup yu consuel lo Crisht. Ornu bzu nis yu, orzeꞌ gua cay ich Lip dela lugaar zeꞌ nu zay, nunu tonaꞌ la gua nu ic yu ornu bzaac yu nu ricy Lip nusuriidz, gal nu deꞌ zir de coz ily.
14 Na de aposht nu yuꞌ Jerusaleeng güeñ dey nu de mbecy Samaria gush dey de riidz ni Ñgyoozh. Orzeꞌ bzuu nez dey Bed nu Waa nu chay lo dey.
15 Na ornu bruꞌña dey, mnii nu dey Ñgyoozh nu nac de mbecy nu ricy cup consuel lo Crisht. Bdiiñ dey lo Ñgyoozh nu cuic mi Espiriit Yon nim ni dey,
16 gun Espiriit Yon ni Ñgyoozh nigul gyicy nim ni tub la dey. Nomaas nu bi bzu nis ziꞌl dey par nu gabe nu nac yu mbecy ni Crisht.
17 Orzeꞌ Bed nu Waa gul yaa dey de mbecy zeꞌ, nunu Ñgyoozh briic mi Espiriit Yon nim ni dey.
18 Na Simo̱o̱ bzaac yu nu Ñgyoozh briic mi Espiriit Yon nim ni de mbecy ornu gul yaa de aposht dey. Orzeꞌ mniiy nu cuic yu tiñ ni Bed nu ni Waa.
19 Orzeꞌ nay:
―Gyicy ru nu gac gyicy ya̱ ndeꞌ, gun orzeꞌ cyu ziꞌl mbecy nu gal ya̱a̱ Ñgyoozh cuic mi Espiriit Yon nim niy ―nay.
20 Orzeꞌ na Bed rab yu Simo̱o̱:
―¡Ru nu dela tiñ nir gyar gabily! Gun ru rnii toor nu gac zir coz nu cuic Ñgyoozh.
21 Riiñ nu ricy de̱ ya̱ nii rila wac gyicy ru ñii, gun a̱ꞌ nap lardoor par lo Ñgyoozh.
22 Orzeꞌ mneꞌ coz a̱ꞌ nap nu rlagy ru gyicy ru zeꞌ nunu bdiiñ lo Ñgyoozh ben a gyicy sulagy mi nir par nu nac coz nu psaꞌ lagy ru nañ lardoor.
23 Gun ya̱ rad lagya̱ nu ru dza laa nañ lardoor yuꞌ coz lya nunu coz cyi riib ic ñi ru ―nay.
24 Orzeꞌ na Simo̱o̱ rab yu Bed nu Waa:
―Bdiiñ lo Ñgyoozh ne̱ nu cueꞌ gzaca̱ de coz nu mniir zeꞌ ―nay.
25 Na ornu Bed nu Waa pshaal dey de coz nap nu bicy Jesuuz num dey, nunu mnii dey riidz ni Ñgyoozh, orzeꞌ bruu dey Samaria ya dey par Jerusaleeng. Lat nu ya dey, zañ tir pshaal dey de riidz nu sac nu bruu lo Ñgyoozh de gyedz nu yuꞌ lo yu ni Samaria.
26 Orzeꞌ tub anc ni Ñgyoozh mniiy lo Lip. Orzeꞌ nay:
―Bzu lily, nunu gua par yaa been ornu güiin zeꞌ nu driib doo par zeꞌ nu riib nez nu za par Gaza ―nay.
Laab nez nu za zeꞌ rded ñi tub lugaar ub zi.
27 Orzeꞌ Lip bzu lily yu. Orzeꞌ zay. Na laab nez nu zay zeꞌ bdzeel yu tub mbecy Etiopía. Yu zeꞌ nac yu mbecy capo̱o̱. Tonaꞌ la riiñ ily zuy. Nac yu tesorer ni biñ mñaa nu nac rey ni de mbecy Etiopía. Yu zeꞌ guay Jerusaleeng par nu riib zily yu Ñgyoozh, tees
28 bi bish cyay yay par ledz yu. Zub yu nañ caret niy rsyaꞌy libr ni Isaías, tub yu nu mnii por cuen ni Ñgyoozh.
29 Orzeꞌ na Espiriit Yon ni Ñgyoozh rab mi Lip:
―Bechaꞌ lo caret re, nunu cueꞌ gyazet ru looñ ―nam.
30 Orzeꞌ ornu bechaꞌ Lip lo caret zeꞌ, orzeꞌ güeñ yu nu rlab mbecy zeꞌ riidz ni libr ni Isaías, yu nu mnii por cuen ni Ñgyoozh. Orzeꞌ nay rab yu mbecy zeꞌ:
―¿A yet lag ru cuen de riidz nu rlab ru? ―nay.
31 Orzeꞌ na mbecy zeꞌ rab yu Lip:
―¿Lac gyicya̱ gyet laga̱ cuen, zeꞌ sac cyu yu nu shaal lo̱? ―nay.
Orzeꞌ mniiy lo Lip nu chuꞌy nañ caret nu gzub nuy yu.
32 Na zeꞌ nu rlab yu lo riidz ni Ñgyoozh zeꞌ rniiñ:
Mi zeꞌ nam gal na tub shily nu za nu dey lo mbecy par nu cut yu ma.
Mi zeꞌ nam gal nu tub shily nu wanii la ma ornu rshiꞌñ mbecy gyich ma.
Ni tub riidz wanniim.
33 Mbecy bicy gyidz dey mi, nunu wangyicy dey gyel fushtiz nuy mi.
Ni tub la mbecy wac zat dey nez mi,
gun bzaꞌ lo dey lo yum, rniiñ.
34 Orzeꞌ mbecy nu zu riiñ zeꞌ nay rab yu Lip:
―Mnii lo̱ cyu mbecy rzat yu nu mnii por cuen ni Ñgyoozh lat nu pcaay riidz ii. ¿A laab ub yu rzat yu uti reñaꞌ mbecy? ―nay.
35 Orzeꞌ Lip brugyiꞌ rniiy. Gush yu nu loga la zeꞌ nu blab mbecy zeꞌ lo libr ni Isaías. Orzeꞌ mniiy dela riidz nap ni Crisht.
36 Na lat nu zaab za dey nez, bruꞌña dey tub lugaar zeꞌ nu yuꞌ nis. Orzeꞌ na yu nu zu riiñ zeꞌ rab yu Lip:
―Ii yuꞌ nis. ¿A wac zu nisa̱? ―nay.
37 Orzeꞌ na Lip rab yuy:
―Gac zu nis ru, benu ru ricy cup ru consuel lo Crisht nu dutuub la lardoor ―nay.
Orzeꞌ nay rab yu Lip:
―Ya̱ zeña lagya̱ nu Jesucrisht nac mi Iꞌñ Ñgyoozh ―nay.
38 Orzeꞌ yu nu zu riiñ zeꞌ mnii nuy mbecy nu rsaa caret zeꞌ nu chesuy. Na orzeꞌ bruuy nañ caret za nuy Lip tublaazh la par lo nis. Orzeꞌ Lip briib nis yuy.
39 Na ornu bruuy lo nis, orzeꞌ Espiriit Yon ni Ñgyoozh byash mi Lip za num yu. Mbecy nu zu riiñ zeꞌ wansaacaꞌy Lip tuubaꞌ tir, tees lat nu zaab zay nez, tonaꞌ la zu cyit lagy yu.
40 Na Lip gud lagy yu nu zuy tub gyedz nu la Azoto. Orzeꞌ zay gazaꞌ gyedz la pshaal yu de riidz nu sac nu bruu lo Ñgyoozh gashtal bruꞌña lay tub gyedz nu la Cesarea.