2 Tesalonicenses
Gyicy cyup nu bzeed Baly lo de mbecy ni Crisht nu yuꞌ Tesalónica
1
Baly zeed yu ñgyoozh ni de mbecy Tesalónica
1 Ya̱ Baly, nu Silvano, gal nu Timoteo tublaazh la zeed de̱ gyicy ii lo de ru bicy na nu nac Crisht nu yuꞌ gyedz Tesalónica. De ru mbecy ni Ñgyoozh, Uz den, gal nu Shuaan den Jesucrisht.
2 Ñgyoozh Uz den nunu Shuaan den Jesucrisht gyicy mi faboor nu nap gyicy num de ru, nunu gyicy mi nu cheti ri añ ni der.
Ñgyoozh gri beem ni de mbecy cyi ornu cyid Crisht tuubaꞌ tir
3 Der bicy na, rlagy ñi nu dub laa tiem gric de̱ gras ni Ñgyoozh nu nac de ru gal nu yad ñi, gun tub dzi ga zaab gyicy cup zir der consuel lo Crisht, nunu zaab ca zir der de losaꞌr.
4 Ndeꞌ nu de̱ ya̱ ryabica̱ gyel mbecy ni der ornu rdo̱ riidz nu de mbecy ni Crisht nu yuꞌ gal reñaꞌ lugaar. Ryabic de̱ gyel mbecy ni der nu nac nu rzu fert der, nunu nu nac nu ricy cup der consuel lo Crisht lat nu rshet zi mbecy de ru nunu lat nu rzac deet der.
5 Nu nac de nu ndeꞌ, rabee nu Ñgyoozh dzi seꞌñ ricy mi ornu ri beem ni dela mbecy, gun orzeꞌ niim nu yad ñi ni der nu chuꞌr lat de mbecy nu riib ic mi, gun de ru rzac zi der nu nac nu riib ic mi der naa la.
6 Gun Ñgyoozh dzi seꞌñ ricy mi. Ndeꞌ nu gyicy mi nu gzac zi de mbecy nu rshet zi de ru,
7 nunu gyicy mi nu nap chesu nap lagy de ru, de mbecy nu rzac deet. Niꞌ ziꞌl gyicy num de̱ ya̱. Ndeꞌ gyicy mi ornu shuub dzi nu gruu zac Shuaan den Jesuuz. Gruum gal gyibaa lat lyush gyi nu cyid mi. Nunu cyid mi lat de anc nu dzi rcyiiñ nim.
8 Orzeꞌ cyid mi par nu cuic mi cashtig ni de mbecy nu a̱ꞌ yuꞌ lo Ñgyoozh, gal nu ni de yu nu wacsuub gyidag de riidz nu sac ni Shuaan den Jesuuz.
9 Zeꞌ cashtig nu cuic mi zeꞌ, ndeꞌ nu shiñ gzac dey tub la. Orzeꞌ chuꞌ dey reñaꞌ lugaar. Wayuꞌ dey zeꞌ nu rcyiiñ Shuaan den Jesuuz. Ni wayuꞌ dey zeꞌ nu yuꞌ gyel lily nim. Ni wayuꞌ dey zeꞌ nu ricy mi coz ily.
10 Cuic mi cashtig ni dey ornu cyid mi gal dzi nu blosu Ñgyoozh. Gun orzeꞌ dela mbecy ni Crisht gyabic dey gyel mbecy nim, nunu cha nu ic dey nu dzi zily nac mi. Niꞌ ziꞌl gyicy gazaꞌ de ru, de mbecy nu guña lagy de riidz nu mne̱e̱ de̱.
11 Ndeꞌ nu zaab rdiñ la̱ de̱ lo biñ nu nac Ñgyoozh ni den nu gyicy mi nu gyap der nu gac ru mbecy nu blosum nu gruu mbañ. Mi zeꞌ gyicy mi nu gac zaꞌ lo der dela coz nap nu rlagy ru gyicy ru, gal nu de coz nu gyicy der nu nac nu ricy cup ru consuel lo Crisht. Ni gyicy mi nu nac nu dzi fert mi.
12 Ni mod rne̱e̱ du̱ de̱ Ñgyoozh, gun orzeꞌ gyabic mbecy gyel mbecy nim nu nac de ru, nunu gyabicaꞌ dey gyel mbecy ni der nu nac mi zeꞌ. Ni gyicy dey dub gal nu na faboor nu ricy Ñgyoozh gal nu Shuaan den Jesucrisht num de ru.