8
Jesuuz zum gyibaa nu locyuub mi de ub na
1 Na coz nu ricy zir ñi presis nu nii den, ndeꞌ nu zu tub uz nu rzuꞌ lo Ñgyoozh por cuen ni de ub na. Nunu mi zeꞌ nam gal nu bi mne̱e̱. Na zub mi par yaa bee Ñgyoozh gyibaa.
2 Zum riiñ nañ tub yuꞌ yon nu rishli, tub yuꞌ nu wansaa mbecy nu yaay, sinu coz nu bzaa Ñgyoozh.
3 Na dela uz nu zu riiñ zeꞌ bdugyi dey riiñ zeꞌ par nu cuic yu gun lo Ñgyoozh, nunu par nu cut dey bañcyug nu shuy reñ ma lom. Ndeꞌ nu niꞌ ziꞌl rlagy ñi nu Jesucrisht cuic mi gun lo Ñgyoozh.
4 Benu gyishlombecy ñcyiiñ mi, orzeꞌ wac gyicy mi riiñ zeꞌ, como par ndeꞌ bi yuꞌ de uz nu rbic gun lo Ñgyoozh mod nu rnii leey ni Moisees.
5 Ornu rzu dey riiñ zeꞌ, orzeꞌ rboo nab dey coz nu rac gyibaa. Ricy dey de coz zeꞌ gyishlombecy ii gal nu na tub sheñ zi de coz rishli nu rac gyibaa. Rad lagy den nu nab ziꞌl ndeꞌ ricy dey, gun ornu Moisees bi zuu lay nu zaay yuꞌ yon zeꞌ, orzeꞌ Ñgyoozh nam rab mi yu: “Bzu cuidad ornu gzaar ñii. Gal mod nu na nab ñii nu bzaac ru ornu blyu̱u̱ lor too bicy zeꞌ, ni na gzaar”, nam.
6 Zeꞌ Crisht zum tub riiñ nu gya zir zu par riiñ nu zu deꞌ zir uz. Niꞌ ziꞌl trat nu bloom nu rniiñ nu lac gyicy nu Ñgyoozh den, ndeꞌ tub trat nu nap zir par trat gush ni leey, gun riidz ni trat cub, riidz nu mnii Ñgyoozh nu segur la gyicy mi, ndeꞌ riidz nu nap zir gazeꞌ riidz ni trat gush.
7 Benu cueꞌ ñgyuꞌ falt ni trat nu loga la nu bicy nu Ñgyoozh de mbecy, orzeꞌ walagy ñi tuubaꞌ trat.
8 Tees Ñgyoozh byap mi falt ni de mbecy nim. Orzeꞌ mniim:
Shuaan den nam: Shuub dzi nu
zu̱ tub trat cub lat de mbecy Israeel nu lat de mbecy Judá.
9 Reñaꞌ mod nañ par trat nu bicy du̱ de gyitoo bel ni dey
tiem nu blo̱o̱ dey lo yu ni Egipto ornu ya̱a̱ du̱ dey.
Tees wangyicy yac dey trat ne̱.
Orzeꞌ ya̱ blaa ya̱a̱ dey,
na Shuaan der.
10 Orzeꞌ na gaꞌm:
Mod nu za trat nu gyicy du̱ de mbecy Israeel:
Ornu shuub dzi zeꞌ, ya̱ gyicya̱ nu caa ic dey de riidz nu rne̱e̱.
Gyicya̱ nu gad lagy dey ñi.
Ya̱ naca̱ Ñgyoozh ni dey,
nunu de yu zeꞌ gac dey mbecy ne̱.
11 Ni tub la mbecy walagy ñi nu lyuuy ni losaꞌy.
Ni walagy ñi nu lyuuy ni bicy yu nu niiy:
“Rlagy ñi nu chuꞌ lor Shuaan den”, niiy,
gun dela mbecy chuꞌ lo dey ya̱.
Dela mbecy shni, nunu gashtal dela mbecy lily,
se tub ruꞌ la chuꞌ lo dey ya̱.
12 Nunu ya̱ gyicy sulagya̱ dela cyi nu bicy dey.
Nunu rila wayezaꞌ gaꞌ lagya̱ ñii,
nam.
13 Ornu bzat mi tub trat cub, orzeꞌ bicy mi nu trat loga zeꞌ par tub trat nu bi bded ni. Nunu benu bi guush ñi, benu bi bded niñ, orzeꞌ sñuu ga nit loñ.