19
1 Orzeꞌ Pilato bicy yu mandaar lo de soldad nu cha nu dey Jesuuz nunu bicy yu mandaar nu gaaz dey mi.
2 Orzeꞌ de soldad ptel dey yaa ya gyech. Orzeꞌ bzaa dey tub coron nu briy toom. Orzeꞌ bzuu dey mi tub negy bizat.
3 Orzeꞌ byagaab dey lom. Orzeꞌ na dey:
―¡Shnu ru, rey ni de mbecy Israeel! ―na dey.
Nunu brugyiꞌ rshet dey yalom.
4 Orzeꞌ bish cya Pilato lo de mbecy zigy tuubaꞌ tir. Orzeꞌ nay rab yu dey:
―Güii der na, ya̱ yap du̱ yu lo der na gun orzeꞌ gad lagy der nu ya̱ wagyapa̱ ni tub la cyi nu bicy yu ―nay.
5 Orzeꞌ bruꞌña nu dey Jesuuz lo de mbecy zigy. Gabee ri coron gyech zeꞌ toom nunu gabee zum negy bizat zeꞌ. Orzeꞌ na gaꞌ Pilato:
―¡Güii der, ii zu mbecy ii! ―nay.
6 Na ornu bzaac de yu zub lo ni de uz gal nu de yu nu rña nañ yuꞌ nu driib zily mbecy Ñgyoozh, orzeꞌ brugyiꞌ rbish ti dey. Orzeꞌ na dey:
―¡Cut ruy lo cruuz! ¡Cut ruy lo cruuz! ―na dey.
Orzeꞌ na gaꞌ Pilato rab yu dey:
―Laab de ru gua nu der yu nu caa der yu lo cruuz. Zeꞌ ya̱, ya̱ wagyapa̱ ni tub la cyi nu bicy yu ―nay.
7 Orzeꞌ na gaꞌ de mbecy zigy:
―De̱ ya̱ ricy cup de̱ tub leey. Nunu por leey la zeꞌ, yu zeꞌ rlagy ñi gat yu, gun bicy yu ub yu nu nac yu iꞌñ Ñgyoozh ―na dey.
8 Na ornu güeñ Pilato riidz zeꞌ, orzeꞌ gudzib zir yu.
9 Orzeꞌ bish cyay guꞌy nañ yuꞌ riiñ tuubaꞌ tir. Orzeꞌ bdugyiꞌy lo Jesuuz. Orzeꞌ nay rab yum:
―Zeꞌ ¿ca gaal ledz ru? ―nay.
Tees Jesuuz wannii lam.
10 Orzeꞌ na Pilato rab yum:
―Zeꞌ ¿a wanii gaal ru lo̱ beni? ¿A wagad lagy ru nu ya̱ ricy cupa̱ rishbeey nu ca̱a̱ ru lo cruuz? Nunu niꞌ ziꞌl ricy cupa̱ rishbeey nu gla̱a̱ ru ―nay.
11 Orzeꞌ na Jesuuz rab mi yu:
―Ru rila a̱ꞌ ricy cup ru rishbeey nu la gyicy nur ya̱ zeꞌ benu walab Ñgyoozh briic mi ñii nir. Ndeꞌ nu cyi ily zir zaab yu nu bguꞌ ya̱ yaar gazeꞌ ru ―nam.
12 Nese or la zeꞌ Pilato byub yu tub mod nu laay Jesuuz. Tees de mbecy zigy zeꞌ brish ti nu zir dey yu. Orzeꞌ na dey:
―¡Zeꞌ benu yu zeꞌ glaar yu, orzeꞌ ru a̱ꞌ nac nur César, yu nu riib ic de nasyoong! ¡Gun cyu ziꞌl mbecy nu ricy yu nu nac yu rey, yu zeꞌ zay contr ni César! ―na dey.
13 Ornu güeñ Pilato de riidz zeꞌ, orzeꞌ mniiy nu cha nu dey Jesuuz ich yuꞌ riiñ zeꞌ. Orzeꞌ gusub yu zeꞌ nu riib ic dey, tub lugaar nu la Gabata benu nu riidz hebreo. Riidz zeꞌ yaruuñ: Lugaar zeꞌ nu bduꞌ dey gyitaꞌ lo yu.
14 Ndeꞌ tub or widoo tub dzi anzir ni saꞌ ni Pas. Orzeꞌ na Pilato rab yu de mbecy Israeel:
―¡Ii zu rey ni der na! ―nay.
15 Orzeꞌ brish ti dey:
―¡Biit yu! ¡Biit yu! ¡Cut ruy lo cruuz! ―na dey.
Orzeꞌ na Pilato:
―¿Walab gaal rlagy der nu duta̱ rey ni der lo cruuz? ―nay.
Orzeꞌ na de uz zub lo:
―¡De̱ ya̱ a̱ꞌ ricy cup de̱ renaꞌ rey sinu César ziꞌl! ―na dey.
16 Orzeꞌ Pilato bguꞌy mi yaa dey par nu cut dey mi lo cruuz. Orzeꞌ za nu dey mi.
Caa dey Jesuuz lo cruuz
17 Orzeꞌ bruu Jesuuz lugaar zeꞌ za num cruuz nu cam lo. Orzeꞌ bruꞌñam tub lugaar nu la Gólgota benu nu riidz hebreo. Riidz zeꞌ yaruuñ: Lugaar ni cyug too añ.
18 Zeꞌ pcaa dey mi lo cruuz gal nu cyupaꞌ mbecy. Tub ga dey cay tub laꞌ gaꞌ cuit mi.
19 Orzeꞌ Pilato bicy yu mandaar nu zaa dey tub nac letr. Orzeꞌ pcaa dey ñi too cruuz nim. Orzeꞌ letr zeꞌ rniiñ: “Jesuuz, yu nu bruu Nazaret, rey ni de mbecy Israeel”, rniiñ.
20 Orzeꞌ zigy mbecy Israeel psyaꞌ dey de riidz nu rnii de letr zeꞌ gun lugaar zeꞌ nu pcaa dey mi lo cruuz zeꞌ garee ga ruꞌ gyedz. Zeꞌ letr zeꞌ bzaa dey ñi nu riidz hebreo, nu riidz lati̱i̱, gal nu riidz griego.
21 Orzeꞌ de uz zub lo ni de mbecy Israeel, bish cya dey nu gua niiy lo Pilato. Orzeꞌ na dey:
―Cueꞌ ncaar “Rey ni de mbecy Israeel”, sinu nap zir nu caar “Yu nu rnii nu nac rey ni de mbecy Israeel” ―na dey.
22 Orzeꞌ na Pilato:
―Bi cañ ca nu nu cañ ―nay.
23 Despuees ornu bi pcaa de soldad Jesuuz lo cruuz, orzeꞌ byash dey shab mi, nunu orzeꞌ tap nac ñii bicy dey nu dugyi tub gay. Orzeꞌ gush dey negy duñ nu ca yeñ mi. Ndeꞌ tub negy nu tub zily la zuñ gal yeñ mi nu gal yeñ gyiꞌ lam ornu bdugab ñi. Sac la zeꞌ nu bdugyib niñ.
24 Orzeꞌ na de soldad rab yu losaꞌy:
―Nap zir cueꞌ shaan ñi sinu loon suert ni losaꞌn ben ca na den dugyin ñi ―na dey.
Ni guuc ñi par nu byuꞌ niñ gal nu rniiñ lat de riidz ni Ñgyoozh: “Bleez dey shaba̱ lat losaꞌy. Bloo dey suert ni losaꞌy ben ca nay dugyiy negy duñ nu pcaa yeña̱”, rniiñ lat riidz ni Ñgyoozh. De ndeꞌ coz nu bicy de soldad.
25 Na garee zeꞌ nu zu cruuz nu ca Jesuuz, zeꞌ zu ñaam, gal nu bily ñaam, nu Li mñaa Cleofas, gal nu Li biñ nu bruu Magadán.
26 Orzeꞌ Jesuuz bzaac mi ñaam nu zum garee ga nu ya̱, tub yu nu rsyaꞌ lom. Laab ya̱, yu nu dzi razañ lagy mi. Orzeꞌ nam rab mi ñaam:
―Ña, yu nu zu zeꞌ, bicy yu par tub iꞌñ ru ―nam.
27 Orzeꞌ nam rab mi ya̱, yu nu rsyaꞌ lom zeꞌ:
―Biñ nu zu zeꞌ, bicy mi par tub ñaar ―nam.
Orzeꞌ nese laab or la zeꞌ byasha̱ biñ mñaa zeꞌ nu ya du̱m yu̱ꞌ.
Jesuuz gut mi
28 Na despuees ni de nu ndeꞌ, orzeꞌ Jesuuz bi gud lagy mi nu bi bzaꞌ lom de riiñ nu biid mi. Orzeꞌ par nu gyuꞌ niñ gal nu rniiñ lat de riidz ni Ñgyoozh, orzeꞌ nam:
―Rbigya̱ nis ―nam.
29 Orzeꞌ zeꞌ zu tub teg yuꞌ ñup zii nañ ñi. Orzeꞌ psal dey tub coz nu chayoꞌ nis lo ñup zeꞌ. Pcyiig dey ñi lo tub lo yag nu la hisopo. Orzeꞌ pcaa dey ñi ruꞌm.
30 Orzeꞌ goꞌm ñup zeꞌ. Orzeꞌ nam:
―Byaꞌ loñ ―nam.
Orzeꞌ gusab tiily toom. Orzeꞌ gut mi.
Tub soldad mneꞌy yag too lyuch cuit Jesuuz
31 Ndeꞌ tub dzi anzir ni saꞌ ni Pas. Zeꞌ de mbecy zub lo ni de mbecy Israeel walagy dey ca añ lo cruuz dzi sab, dzi nu rzu lagy mbecy, gun dzi zeꞌ, ndeꞌ tub dzi da. Orzeꞌ gua nishbaa dey lo Pilato nu gyicy yu mandaar lo soldad nu cha dey cyicy yu gyiꞌ de yu nu taꞌ lo cruuz zeꞌ par nu gyel gyet de añ zeꞌ lo cruuz.
32 Orzeꞌ gua de soldad zeꞌ. Pcyicy dey gyiꞌ yu nu bruꞌña dey lo loga la. Gazeꞌ nu pcyicyaꞌ dey gyiꞌ yu nu ca lo cruuz, cruuz nu zu tub laꞌ gaꞌ cuit Jesuuz.
33 Tees ornu bruꞌña dey lo Jesuuz, orzeꞌ bzaac dey nu bi gut mi. Orzeꞌ ndeꞌ nu wancyicyaꞌ dey gyiꞌm.
34 Tees tub de soldad mneꞌy tub yag too lyuch lat rit lyush mi. Orzeꞌ lueg la bruu reñ nunu bruu nis.
35 Laab ya̱, yu nu rnii de coz nu guc ii, ndeꞌ coz nu bzaac urlo̱ la̱. Nunu rne̱e̱ coz rishli. Laab ya̱ rad lagya̱ nu coz nu rne̱e̱, ndeꞌ coz rishli. Ni mne̱e̱ gun orzeꞌ niꞌ de ru cheña lagy der.
36 Dela coz ii ni guuc ñi par nu byuꞌ niñ gal nu rniiñ lat de riidz ni Ñgyoozh zeꞌ nu rniiñ: “Ni tub rit mi wacyicy dey”, rniiñ.
37 Zeꞌ tub seꞌ gaꞌ lat riidz ni Ñgyoozh rniiñ: “De mbecy güii dey lo biñ nu mneꞌ dey yag too lyuch nañ”, rniiñ.
Pcach dey Jesuuz
38 Despuees ni de nu ndeꞌ, orzeꞌ See, tub yu nu bruu Arimatea, bdiiñ yu rishbeey lo Pilato nu cha nuy cuerp ni Jesuuz. Zeꞌ yu zeꞌ niꞌ nac yu tub yu nu rsyaꞌ lom. Tees dze ga rsyaꞌy lom nu nac nu rdzib yu lo de yu zub lo ni de mbecy Israeel. Orzeꞌ Pilato briic yu rishbeey. Orzeꞌ See gua nuy cuerp nim.
39 Orzeꞌ Nicodemo, yu nu gua bee riidz nu Jesuuz nu loga la tub rel, yu zeꞌ bruꞌña nuy tub nu rnii gal rup tii cyil coz zguul. Coz zguul zeꞌ ndeꞌ tub lo bid nu la mirra guꞌ can nu tub lo gyez ni yag nu la áloe.
40 Orzeꞌ laab de yu zeꞌ gua nu dey cuerp ni Jesuuz. Orzeꞌ ptiish dey cuerp zeꞌ negy. Lo negy zeꞌ taꞌ de coz zguul. Bicy dey mod nu rlagy ñi gal nu na cushtom ni de mbecy Israeel ornu rcach dey añ.
41 Gaab ga zeꞌ nu pcaa dey mi lo cruuz, zeꞌ ri tub nac yag mni. Nunu lat yag mni zeꞌ ca tub gyerbaa cub nu nigul cui la añ.
42 Orzeꞌ zeꞌ bri dey cuerp ni Jesuuz, gun gyerbaa zeꞌ garee ga cañ nunu sñuu ga shuub dzi nu rzu lagy de mbecy Israeel.