Filemón
Gyicy nu bzeed Baly lo Moong
1
Baly zeed yu ñgyoozh ni Moong
1 Ya̱ Baly ri̱ pres nu nac Jesucrisht. Orzeꞌ na ca̱a̱ gyicy ii tublaazh la nu biicy na Timoteo nu zeeda̱ lo ru Moong. Ru losa̱ꞌ de̱ nu tonaꞌ la rca̱. Nunu tub ziꞌl riiñ ni Crisht ricy den.
2 Orzeꞌ zeeda̱ gyicy ii lo ru, gal nu lo dela de mbecy ni Crisht nu yatublaazh yuꞌr, gal nu lo zan den Apia, gal nu lo Arquipo. Yu zeꞌ nay gal nu na tub soldad ni Crisht nu nac losa̱ꞌ nu rded du̱ tublaazh.
3 Orzeꞌ Ñgyoozh Uz den gal nu Shuaan den Jesucrisht gyicy dem faboor nu nap gyicy num ru, nunu gyicy dem nu cheti ri añ nir.
Moong ricy cup yu consuel lo Crisht nunu dzi rcay losaꞌy
4 Dub laa tiem drica̱ gras ni Ñgyoozh ornu yezaꞌ lagya̱ ru lat nu rne̱e̱ du̱m,
5 gun ya̱ bi güeña̱ nu zaab riidz nu tonaꞌ la rcar dela mbecy nim nunu dzi ricy cup ru consuel lo Shuaan den Jesuuz.
6 Nunu rdiña̱ lom nu ornu cuic ru nu gad lagy mbecy nu la na consuel ricy cup ru, orzeꞌ ndeꞌ gyicy ñi nu nap zir gyet lag dey cuen ni dela coz nap nu ricy nu Ñgyoozh de ub na nu nac Crisht.
7 Ya̱ dzi yet lagya̱ nunu guti ye lagya̱ nu nac nu dzi rcar losaꞌr. Orzeꞌ shnu lar, bicy na, gun bicy ru nu guti ye lagy de yu nu ricy cup consuel lom.
Baly rgyiiñ yu rishsulagy nu nac Onésimo lo Moong
8 Orzeꞌ como ya̱ naca̱ tub aposht ni Crisht, orzeꞌ ricy cupa̱ rishbeey nu gyicya̱ mandaar lor nu gyicy ru ca na coz nu rlagy ñi.
9 Tees yet zir lagya̱ nishba̱a̱ lor nu ni gyicy ru nu nac nu rca den losaꞌn. Ya̱ Baly. Nunu bi gubela̱. Nunu ri pres nu nac Jesucrisht.
10 Orzeꞌ na ya̱ diña̱ tub faboor lor par nu nac Onésimo. Yu zeꞌ bi byac yu gal nu na tub yu feñ ne̱ nu nac de coz ni Ñgyoozh lat nu ri̱ nañ yuꞌ gyiib ii.
11 Gulas, yu zeꞌ se la la pcyiiñ yu nir, tees na rcyiiñ yu par ru nunu rcyiiñ yu par ya̱.
12 Ya̱ zuu neza̱ yu nu gyed yu lor tuubaꞌ tir. Orzeꞌ bicy nuy gal nu ricy nur ya̱.
13 Ya̱ ngulagya̱ nu ñgyiyeeñ yu lo̱ ii, gun orzeꞌ ñgyicy yu riiñ ne̱ lugaar ni ru lat nu ri̱ nañ yuꞌ gyiib nu nac de riidz nu sac ni Crisht.
14 Tees ya̱ wangalagya̱ ñgyicya̱ ni tub la coz benu walab nu nac rishbeey nir. Gun ornu gyicy ru faboor nur ya̱, orzeꞌ cueꞌ gyicy ru ñii por fers la, sinu gyicy ru ñii nu dub gal rii la lagy ru.
15 Cyup ridz Onésimo bruu chuy lor par la be tiem, gun orzeꞌ na cyiiñ yu lor tub la.
16 Na walabaꞌ nu cyiiñ yu lor nu nac yu moz por fers la, sinu na gya zir zuy gazeꞌ tub moz por fers la. Nac yu tub bicy ru nu dzi rcar nu nac Crisht. Ya̱ tonaꞌ la rca̱ yu. Tees ru nap zir rcar yu na, gun na walab tub lo ziꞌl nu nac yu moz nir, sinu niꞌ ziꞌl nac yu bicy ru nu nac Shuaan den Jesuuz.
17 Ndeꞌ nu beni, benu ru ricy ru ya̱ par bicy ru nu nac Crisht, orzeꞌ nap nii nur yu ornu griy lor gal nu nap nii nur ub la ya̱ ornu yapa̱ lor.
18 Zeꞌ benu yu zeꞌ bicy yu la na tub coz nuy ru, o benu zaab yu nir, orzeꞌ ya̱ grisha̱ ñii nir.
19 Ya̱ Baly ca̱a̱ lo gyicy ii nu letr yaa: Ya̱ grisha̱ ñii nir. ¡Mas ñgyicya̱ nu gyezaꞌ lagy ru nu yuꞌ diꞌñ ru gyiꞌ lardoor lo̱!
20 Orzeꞌ laab ru, bicy na, bicy tub faboor nu ya̱ nu nac nu ricy cup na consuel lo Shuaan den Jesuuz. Orzeꞌ bicy na nu nac Crisht, briic consuel nañ lardo̱o̱.
21 Ya̱ zeeda̱ gyicy ii lor, gun ya̱ rad lagya̱ nu gzuub gyidag ru ne̱. Nunu neña̱ nu sheñ zir gyicy ru gazeꞌ coz nu diña̱ lor.
22 Niꞌ ziꞌl ne̱e̱ lor nu zu yer tub lugaar zeꞌ nu cyiiña̱, gun ya̱ drish lo̱ lo Ñgyoozh nu gyicy mi gal nu rnii der ornu rgyiiñ ru lom. Orzeꞌ cuic mi lugaar nu yap güi̱i̱ der.
Laab ndeꞌ la ñgyoozh nu zeed Baly
23 Epafras, losa̱ꞌ nu ri nañ yuꞌ gyiib nu nac Jesucrisht, yu zeꞌ zeed yu ñgyoozh nir.
24 Nunu niꞌ ziꞌl Marc, nu Aristarco, nu Demas, nu Luc, de yu nu rlocyuub ya̱ nu nac de riiñ ni Crisht, de yu zeꞌ zeed yu ñgyoozh nir.
25 Orzeꞌ Shuaan den Jesucrisht gyicy mi faboor nu nap gyicy num der.