8
Jesús nake' Bx̱oz Blo chežo
1 Na'a, kan nak da' ba wnnía', ẕnnan ki: zoa to Bx̱oz Blo ki chežo, Bennen' wži'e kwit ḻi ža che Dios gan ži'e, ẕnna bi'e ya'abá.
2 Ḻe' žone' žin ka Bx̱oz Blo ḻo latjen' dan' naken dot la'y, dan' naken yodon' dan' bchis X̱anžo Dios, na' kege benne' ka'.
3 Dios ẕbie' yógo'te bx̱oz blo ka' nich wdégake' ḻawe' Ḻe' da' ka' ẕnéẕjwgak benách ka', na' ḻezka' x̱chengak bia yix̱e' ka'. Che ḻen ben byenen soa da' wdé Benne' Criston' ḻaw Dios.
4 Chela' zoe' yežlyó nga, bi gake' bx̱oz, dan' zej nníta'teze bx̱oz ka' nga, benne' ka' ẕdégake' ḻaw Dios da' ka' ẕnéẕjwgak benách ka' kan ẕnna da' bchi'le Moisés.
5 Bx̱oz ki žóngake' žin che to da' ẕḻoé'ezelen, dan' naken ka to bxin che dan' zoan ya'abá che Dios. Ki naken dan' wnná Dios katen' gože' Moisés gone' yo'o yiddon', na' wnné': “Bwia nga, ben yógo'te dot kan nak dan' bḻoe'ela' le' ḻaw ya'a na'.”
6 Na'a, Bx̱oz Blo chežo ni, žone' žin che da' záka'žen, na' ni'a che da' bene' Ḻe' zoa chežo to diža' da' ẕka'n chawe' da' záka'žen, dan' ẕchaḻjen che to da' záka'žen, dan' bchebe ḻaže' Dios gatan' chežo.
7 Chela' wdape dižan' da' ẕka'n chawe' da' nežwn' dot yeḻa' wak, bi ben byenen soa to diža' bežope da' ẕka'n chawen'.
8 Na'a, Dios ẕḻoe'ele' bi beyakgak benne' ka' dot chawe' ḻawe' Ḻe' katen' bchaḻje' dan' nyejw ḻe'e yiche la'y, da' ẕnnán:
Le wia nga, ẕnna X̱anžo Dios: “Za'gak ža ka'
katen' wzóa' to diža' kobe da' wká'n chawen',
dan' gónḻena' benne' Israel ka', na' benne' Judá ka'.
9 Bi gaken kan gok dižan' da' ẕka'n chawen',
dan' bénḻena' x̱a x̱tó'gake' ka',
ža na' bex̱wa' ná'gake',
na' bebéjgaka'-ne' ḻo yežlyó Egipto.
Dan' wléj yíchjgake' diža' chia' da' ẕka'n chawen',
neda' wléj yíchjgaka'-ne'.” Ki ẕnna X̱anžo Dios:
10 “Che ḻen, ki gak diža' da' wká'n chawen'
dan' gónḻena' benách Israel ka'
te ža ki.” Ki ẕnna X̱anžo Dios:
“Wchiza' ḻo yichj ḻáẕdo'gake' da' wchi'la'
na' wzojan' ḻo yichj ḻáẕdo'gake'.
Naž gaka' Dios chégake'
na' ḻégake' gákgake' benách chia' ka'.
11 Bi gon byenen no benne' wsedle' lježe', na' nne':
Benbia' X̱anžo Dios.
Ki gaken dan' gónbia'gake' yógo'tegake' neda',
gan so ḻaw no benne' nake' gax̱jw,
na' zejte no benne' nake' blo.
12 Yeyache' ḻáže'la' ḻégake',
na' yenít ḻawa' da' kegle da' béngake',
na' biž chejsá' ḻaža'a doḻa' da' zej nbage'e.”
13 Katen' bchaḻj Dios che to diža' kobe da' ẕka'n chawen', naken dan' ba bgole diža' nežwn', na' za' te che dan' ba ngolen, na' ba naken da' ba wdén.