14
Benne' yodo' ka' žóngake' x̱tíža'gake' séngake' Jesús
(Mt. 26:1‑5; Lk. 22:1‑2; Jn. 11:45‑53)
1 Yechóp ža ka', gak Lni Pasko' kate' žejsá' ḻáže'gak benne' judío ka' kan ben Dios kate' beslé' x̱a x̱tó'gake' ka' ḻo yežlyó Egipto, da' naken lni kate' žáwgake' yet x̱til da' bi nzin' kwa zichj chen. Bx̱oz wnná bia' ka' ḻen benne' yodo' wsedle ka', wdíljgake' kan séngake' Jesusen' ži žize nich gótgake' Ḻe'.
2 Wnnágake':
—Bi žaḻa' senžo-ne' ža lni dan' gongak benách ka' žo'osbé.
To no'le ẕḻalje' da' ẕḻa' ẕix̱ yichj Jesús
(Mt. 26:6‑13; Jn. 12:1‑8)
3 Kate' ža na' wzóa Jesusen' ḻo yež Betania, ḻo liž Smon, to benne' wdé'e yižwé' leže. Kate' ne že'j žaw Jesusen', wyáz to no'le, noe'e to béga'do' da' naken yej zaka', na' nža' da' ẕḻa' ẕix̱ che yeje susén las da' naken dot ḻi ḻaže', na' záka'ḻe'en. Bḻe'e béga'don', na' wloé'e da' ẕḻa' ẕix̱ yichj Jesusen'.
4 Bža'agak baḻe benne' ka' nníta'gake' ga na', na' wnnágake' ḻa' ḻégakze':
—¿Biẕ chen' gok ditje da' ẕix̱en'?
5 Chela' no benne' gote'en, si'že' ka láẕjwžo che to yiz, na' gak chise' mežwn' chegak benách yache' ka'.
Wnnéḻe'egake' che no'len'.
6 Naž bchaḻj Jesusen', na' wnné':
—Le we'e latje. ¿Biẕ chen' ẕnnele chie'? Nak chawe' dan' bene' chia'.
7 Benách yache' ka' nníta'ḻentezgake' ḻe'e, na' bátte'teze yénelele, gak gonle chégake' da' chawe', san neda' bi sóateza' gan zoale.
8 Ben no'le ni ka da' wẕake'e. Bḻalje' da' ẕḻa' ẕix̱ ni neda', na' ki bpe'e neda' zga'ale kate' gacha'a ḻo yežw ba.
9 Da' li žapa' ḻe'e, gáte'teze gan wcháḻjgake' diža' chawe' chian' dot yežlyó nga, ḻezka' soa no benne' wzóa lie' da' ben no'le ni chia'. Ki gaken nich chejsá' ḻáže'gak benách ka' ḻe'.
Judas ẕchebe ḻaže'e wdíe' Jesús ḻo na'gak benne' yodo' ka'
(Mt. 26:14‑16; Lk. 22:3‑6)
10 Naž bžoj Judas Iskariote, bennen' nbábḻene' benne' chežinno, benne' ka' žónḻengake' Jesusen' tẕen, na' wyeje' gan zej nnita' bx̱oz wnná bia' ka' nich wdíe' Jesusen' ḻo ná'gake'.
11 Kate' béngekle' x̱tiža' Júdas na', bebégekle', na' bchebe ḻáže'gake' chíẕjwgake' ḻe' mežw. Naž wzó ḻaw Judas na' žilje' kan wdíe' Jesusen' ḻo ná'gake'.
Da' že'j žawžo nich chejsá' ḻáže'žo kan got X̱anžo
(Mt. 26:17‑29; Lk. 22:7‑23; Jn. 13:21‑30; 1 Ko. 11:23‑26)
12 Nak ža ẕzo ḻaw žak lni kate' žáwgake' yet x̱til da' bi nzin' kwa zichj chen, ža na' žótgake' ẕíla'do', bian' žáwgake' Lni Paskon', kate' žejsá' ḻáže'gake' kan ben Dios katen' beslé' benne' judío ka' ḻo yežlyó Egipto. Naž benne' wsedle ka' che Jesusen' wnnábgekle' Ḻe', na' wnnágake':
—¿Gaẕ žénelo' chejto' chejsí'ni'ato' da' gawžo x̱che' che Lni Pasko'?
13 Naž Jesusen' bseḻe'e chope benne' wsedle chie' ka', na' gože' ḻégake':
—Le chej ḻo yež, gan chejx̱áka'le to benne' noe'e to že'e nis. Le chéjḻene'.
14 Gan choe'e, le ye' x̱an yo'on': “Ẕnna Benne' wsedle: ¿Gaẕ zoa yo'o gan gáwḻena' benne' wsedle chia' ka' x̱che' che Lni Pasko'?”
15 Naž wḻoe'ele' ḻe'e to yo'o ẕen gan nak da' chope kwia gan ba nba'a. Le wsí'ni'a da' gawžo ga na'.
16 Bžojgak benne' wsedle chie' ka', na' bžíngake' ḻo yež, na' bejx̱áka'gake' yógo'te kan ba gož Jesusen' ḻégake'. Bsí'ni'agake' da' gáwgake' ga na' che Lni Paskon'.
17 Kate' ba goḻen, bžin Jesusen' ga na', na' benne' chežinno, benne' wsedle chie' ka', zá'ḻengake' Ḻe' tẕen.
18 Kate' ne že'j žáwgake', bchaḻj Jesusen', na' wnné':
—Da' li žapa' ḻe'e, zoa to benne' ládjwle ḻe'e, benne' že'j žáwḻene' neda' tẕen. Ḻe' wdíe' neda' ḻo na'gak benne' yodo' ka'.
19 Naž gok nyache' ḻáže'gake', na' wzó ḻáwgake' žé'gake' Ḻe' to toe':
—¿Naken neda'?
Ḻezka' yetóe' wnné':
—¿Nedan'?
20 Bechebe Jesusen', na' gože' ḻégake':
—Nake' to benne' ladjw chežínnole ki, bennen' ẕžínḻene' neda' tẕen ḻo ye'n.
21 Cha'a gan gótgake' neda', Benne' Golje' Benách, kan nyejw ḻe'e yiche la'y kan gaken chia', san da' nyáche'ḻe'e gaken che bennen' wdíe' neda' ḻo na'gak benne' ka' gótgake' neda'. Gakže chawe' che bennen' chéla'kze bi golje'.
22 Kate' ne že'j žáwgake', Jesusen' bex̱we' yet x̱til. Gože' Dios: “Žóx̱keno'.” Bzožjen', na' bi'en chégake', na' wnné':
—Le gawn. Da' ni naken beḻa' žen chia'.
23 Ḻezka' bex̱we' to ẕíga'do', na' gože' Dios: “Žóx̱keno'.” Naž bi'en chégake', na' yógo'tegake' wé'jgaken'.
24 Jesusen' gože' ḻégake':
—Da' ni naken x̱chena' da' žon chochen diža' kobe da' ẕka'nen chawe', dan' žon Dios ḻen benách ka'. X̱chena' na' ḻaljen ni'a chegak benne' zan.
25 Da' li žapa' ḻe'e, biž ye'ja' x̱is uba ki na' zejte ye'ja' da' kobe gan ẕnna bia' Dios.
Ẕnna Jesús nna Bedw bi nónbi'e Ḻe'
(Mt. 26:30‑35; Lk. 22:31‑34; Jn. 13:36‑38)
26 Wdé béḻgake' da' belwé ḻáwgake' Dios, bžójgake', na' jake' ḻaw Ya'a Yag Olibo.
27 Naž Jesusen' gože' ḻégake', na' wnné':
—Yógo'tele gak chope ḻáže'le, na' yebéj yichjle neda' na'a že', dan' nyejw ḻe'e yiche la'y da' ẕnnan: “Gota' benne' žape chi'e ẕila' ka', na' gásḻasgakba'.”
28 Te yebana' ḻo yeḻa' got, cha'a gan nbab Galilea zga'ala' ka ḻe'e.
29 Naž Bedw gože' Jesusen', na' wnné':
—Ḻa'kze yógo'tegake' gak chope ḻáže'gake', na' yebéj yíchjgake' Le', bi gak chope ḻaža'a neda'.
30 Jesusen' gože' ḻe', na' wnné':
—Da' li žapa' le', ḻa' yel nize, zga'ale kate' kweže leko' chope chi'i, chonne chi'i nnio' bi nónbi'o neda'.
31 Naž Bedon' ben choche' x̱tiže'e ni'a che Dios, na' wnné':
—Ḻa'kze gátḻentia' Le' tẕen, bi nnia' bi nónbi'a Le'.
Ḻezka' wnnágake' yógo'tegake'.
Jesús ẕcháḻjḻene' Dios ḻo yežlyón' nzin' Jetsemaní
(Mt. 26:36‑46; Lk. 22:39‑46)
32 Naž bžin Jesusen' ḻen benne' ka' žónḻengake' Ḻe' tẕen ḻo yežlyón' nzin' Jetsemaní, na' gože' ḻégake', na' wnné':
—Le kwe' nga, kate' cha'a neda', chejcháḻjḻena' Dios.
33 Bchi'e Bedw ḻen Jakob, na' Ẕwa, na' wzó ḻawe' žekle', na' žak nyache' ḻaže'e.
34 Jesusen' gože' ḻégake', na' wnné':
—Gatkza' ḻo yeḻa' žak nyache' ḻaže' chia'. Le kwez nga, na' le nna'ze dot yele.
35 Naž Jesusen' wzé'e yeláte'do' na'le, na' bzechw ḻawe' ḻo yo, na' bcháḻjḻene' Dios. Wnnable' Ḻe', cha' wak, kwase' chie' da' žaḻa' sáka'ḻi'e ža na'.
36 Kate' ne ẕcháḻjḻene' Dios, wnné':
—X̱e, yógo'te gak gono' Le'. Bekwás da' žaḻa' sáka'ḻi'a, san kege kan žénela' neda', san kan žénelo' Le', gono'.
37 Naž Jesusen' beyeje' gan zej nnita' benne' wsedle chie' ka', na' bejx̱ake'e ḻégake' ẕtásgake'. Gože' Bedon':
—Smon, ¿ẕtaso' na'a? ¿Bi ẕbejo' bichgale yej ḻawo' to chí'ido'ze?
38 Le nna'ze dot yele, na' le wchaḻjḻen Dios, na' le nnable' bi si' latje da' x̱iwe' chen' ḻe'e cheḻa'ale. Da' li be' nákkzele zoakzen ban ḻaže', san ḻo yeḻa' benách chele žedó ḻáže'le.
39 Naž da' yoble wyéj Jesusen', na' bcháḻjḻene' Dios, na' ḻa' tḻebe kan wnné'.
40 Kate' beyeje' da' yoble gan nníta'gake', bejx̱ake'e ḻégake' ẕtásgake' dan' yo'o bichgale yej ḻáwgake'. Bi wnnézgekle' bi da' yé'gake' Ḻe'.
41 Kate' beyeje' da' chonne chi'i gan nníta'gake', gože' ḻégake':
—¿Ẕtasle? ¿Žezí' ḻáže'le? ¡Ká'teze! ¡Ba bžin ža! Le wia nga, neda', Benne' Golje' Benách, ba ndia' ḻo na'gak benne' doḻa' ka'.
42 ¡Le chas! ¡Le cho'o! Le wia nga, za' bennen' wdíe' neda' ḻo na'gak benách ka'.
Želzene' Jesús
(Mt. 26:47‑56; Lk. 22:47‑53; Jn. 18:2‑11)
43 Kate' ne ẕchaḻj Jesusen' da' ni, bḻa' Judas, bennen' nbábḻene' yechinéj benne' ka' žónḻengake' Ḻe' tẕen, na' zá'ḻengak benne' zan ḻe' tẕen, benne' ka' zej noe'e ya ntoche' ka', na' yag ka'. Bx̱oz wnná bia' ka' ḻen benne' yodo' wsedle ka', na' benne' gole ka', bséḻa'gake' ḻégake'.
44 Judas na', bennen' ẕdie' Jesusen' ḻo ná'gake' ba bḻoe'ele' ḻégake' to da' gone' da' gak bian' no benne' nake' Jesusen', na' wnné':
—Bennen' wchág ḻawa'-ne', Ḻekze' Jesusen'. Le sene', na' le chi'e. Le wia binlo nich bi yelé'.
45 Kate' bžin Judas na' ga na', ḻa' wbíga'tie' gan zoa Jesusen', na' gože' Ḻe':
—Benne' wsedle, Benne' wsedle.
Naž bchag ḻawe' Jesusen'.
46 Naž béx̱wgake' Jesusen', na' bché'gake' Ḻe' nžeje'.
47 Naž to benne' žónḻene' Jesusen' tẕen wleje' ya ntoche', na' bene' we' bi' wen žin che bx̱oz blo, na' bchoge' yid nagbe'.
48 Jesusen' gože' benne' ka', na' wnné':
—¿Bžojle nwa'le ya ntoche' ka', na' yag ka' nich senle neda', kan žonle kate' ẕzenle to benne' wbán?
49 Kate' ža ka' wzóaḻena' ḻe'e, na' bsedla' benne' ka' gan nak ḻo ẕchil yodo', bi wẕenle neda', san žaken ki nich gak da' nyejw ḻe'e yiche la'y.
50 Naž yógo'te benne' wsedle ka' che Jesusen' bebéj yíchjgake' Ḻe', na' bẕónnjgake'.
Žẕonnj to x̱kwide' byo
51 Ḻezka' wzóa to x̱kwide' byo ga na', nawbe' Jesusen', na' nx̱oaze kwinbe' to laže' laga'. Benne' ka' zej nchi'e Jesusen' béx̱wgake'-be',
52 san bsanbe' lažen', na' gaḻ yídzebe' bẕonnjbe'.
Ẕché'gake' Jesús ḻawgak benne' yolawe' blo che yodo'
(Mt. 26:57‑68; Lk. 22:54‑55, 63‑71; Jn. 18:12‑14, 19‑24)
53 Bché'gake' Jesusen' ḻaw bx̱oz blo, gan zej ndobe yógo'te bx̱oz wnná bia' ka' ḻen benne' gole ka', na' benne' yodo' wsedle ka'.
54 Bedw bejnawe' Jesusen' zí'to'le. Wyoé'e ḻa' ḻi'a liž bx̱oz blon', na' wžé'ḻene' tẕen benne' ni'a na' ka' bx̱oz blon', na' bche'l kwine' gan nak žoa'a yi'.
55 Bx̱oz wnná bia' ka' ḻen yógo'te benne' yolawe' blo ka' gónegekle' žéḻgekle' to da' gak yesbága'gake' Jesusen' ẕia nich gak chóggake' chie' gate', san bi be bžéḻgekle'.
56 Benne' zan wnnégake' che Jesusen' da' wen ḻaže', san bi gok tḻebe dan' wnnégake' chie'.
57 Naž wzegak benne' ka' wnnégake' che Jesusen' da' wen ḻaze', na' wnnágake':
58 —Neto' benlto' da' bchaḻj bennen', na' wnné': “Wchinnja' yodo' nga, da' benen ḻen ni'a na'gak benne' ka', na' yechonne žaze yechisa' yetó da' bi gonen ḻen ni'a na'gak benne' ka'.”
59 Ḻezka' bi gok tḻebe x̱tíža'gake'.
60 Naž wzó ža' bx̱oz blon' gachje ḻáwe'le benne' ka' nníta'gake' ga na'. Wnnable' Jesusen', na' wnné':
—¿Bi be žechebo'? ¿Biẕen' da' ẕnnagak benne' ki kan naken chio'?
61 Wzóa žize Jesusen', na' bi be bechebe'. Da' yoble bx̱oz blon' wnnable' Ḻe', na' wnné':
—¿Nako' Le' Benne' Criston', Ẕi'n Dios la'y?
62 Bechebe Jesusen', na' wnné':
—Naka'. Ḻezka' ḻé'elele neda', Benne' Golje' Benách, soa' kwi'a kwit ḻi ža che Dios, Bennen' napkze' dot yeḻa' wnná bia', katen' yeḻá'a ḻo bejw ya'abá.
63 Naž bx̱oz blon', ḻo yeḻa' ẕža'a chie' bcheze' laže' da' nakwe', na' wnné':
—Bi žiážjelžo no benne' wḻoe'ele' ẕia da' nbage'e.
64 Bénkzelele wnníe' che Dios ḻen da' wnné'. ¿Biẕ ẕnnale ḻe'e?
Yógo'tegake' bchóggake' che Jesusen' gate'.
65 Naž baḻe' wzó ḻáwgake' ẕžé'egake' Jesusen' ẕene'. Bkáche'gake' yej ḻawe', na' béngake' Ḻe' zi', na' wnnágake':
—Wnné ya'a na'a nolto' bwáwža'ato' Le'.
Benne' ka', benne' ni'a na' bx̱oz blon', wdápa'gake' žoa'a ḻaw Jesusen'.
Ẕnna Bedw bi nónbi'e Jesús
(Mt. 26:69‑75; Lk. 22:56‑62; Jn. 18:15‑18, 25‑29)
66 Kate' ne zoa Bedw ḻi'a ẕan yo'o, to x̱kwide' no'le, bi' wen žin che bx̱oz blon', wbíga'be' gan zoe'.
67 Kate' bḻe'elbe' Bedon' gan ži'e ẕche'l kwine' žoa'a yi', bwíabe' ḻe', na' wnnabe':
—Ḻezka' le' žónḻeno' Jesús, benne' Nasaret na', tẕen.
68 Beží'i Bedon', na' wnné':
—Bi nónbi'a-ne', na' bi nnezla' bi dan' ẕnno'.
Bežój Bedon', na' bejsóe' gan žázgake' ḻi'a na'. Naž wžeže leko'.
69 Da' yoble to x̱kwide' no'le wen žin bwíabe' ḻe', na' wzó ḻawbe' že'be' benne' ka' nníta'gake' ga na', na' wnnabe':
—Benne' ni žónḻene' ḻégake' tẕen.
70 Da' yoble bžon Bedon'. Yextido', benne' ka' nníta'gake' ga na' góžgake' Bedon', na' wnnágake':
—Da' li žónḻeno' ḻégake' tẕen, dan' nako' benne' Galilea. Ḻa' díža'ze ẕchaḻjo' zej nak bi'o, dan' toze kan ẕchaḻjle.
71 Wzó ḻaw Bedon' žẕia kwine' ẕia, ẕzetje' Dios, na' wnné':
—Bi nónbi'a bennen' ẕchaḻjle chie'.
72 Ḻa' wžéžete leko' da' chope chi'i. Naž bejsá' ḻaže' Bedon' dan' wnná Jesusen', katen' gože' ḻe': “Zga'ale kate' kweže leko' chope chi'i, chonne chi'i nnio' bi nónbi'o neda'.” Kate' bejsá' ḻaže'e diža' ni, wzó ḻawe' ẕbéžeḻi'e.