101
Góḻteza' kan zej nak yeḻa' ži'i ḻaže', na' yeḻa' ḻi ḻaže' chio'.
Góḻteza' chio' Le', X̱ana' Dios.
Žak ḻaža'a gona' da' naken ḻi ḻaže'.
¿Batx̱ yido' gákḻeno' neda'?
Dot ḻaža'a goḻkza' ḻo ližkza' neda'.
Batkle ko'o ḻaža'a gona' to da' ẕinnj.
Bi ẕḻe'ela' chawe' da' žongak benne' ka' ẕbej yíchjgake' Dios.
Batkle wa'a latje bíga'gake' gan zoa' neda'.
Wkwasa' ḻo yichj ḻáẕda'wa' da' ẕinnj,
na' bi ko'o ḻaža'a gona' da' bi nak chawe'.
Wnnita'a cheḻa'ale benne' ka' ẕnnégake' chegak benne' yoble ka' bagáche'ze.
Bi wa'a latje soaḻen neda' to benne' ẕka'n ẕen kwine', bennen' ẕži'e che Dios.
Ḻe'ela' chawe' benne' ka' zej nake' ḻi ḻaže' ḻaw Dios, nich gónḻengake' neda' tẕen.
Benne' ka' zej nake' dot ḻaže' góngake' žin chia'.
Bi wa'a latje no benne' žon ḻáže'le' choe'e liža'.
Bi wa'a latje to benne' wen ḻaže' soe' gan zoa'.
Tža tža wnnita'a žize benne' wen da' ẕinnj ka', benne' ka' nníta'gake' ḻo yežlyó chia'.
Wkwasa' yógo'te benne' wen da' ẕinnj ka' ḻo yež che X̱anžo Dios.