111
1 Dot ḻaža'a wká'n ẕena' X̱anžo Dios tẕen ḻen benne' chawe' ka',
benne' zej ndobe' chie' Ḻe'.
2 Da' ẕenḻe'e zej nak da' ka' ben X̱anžo Dios,
na' yógo'te benne' ka', benne' žaz ḻáže'gake' da' ka' žone' ẕlab ḻáže'gake' da' ka'.
3 Yeḻa' baní', na' yeḻa' ẕen zej nžagen da' žone' Ḻe',
na' to chi'ize zoa da' chawe' chie'.
4 Žone' ga žejsá' ḻáže'žo yeḻa' wak ẕente da' žone'.
X̱anžo Dios nake' ẕen ḻaže', na' žeyache' ḻáže'le' benách ka'.
5 Ẕwawe' benne' ka' ẕžébegake' Ḻe',
na' to chi'ize žejsá' ḻaže'e diža' da' bénḻene' benách ka'.
6 Bḻoe'ele' benne' chie' ka' yeḻa' ẕen che da' bene'.
Ẕneẕjwe' benne' chie' ka' da' zej nape benne' zi'to' ka'.
7 Ḻi ḻaže', na' chawe' zej nak da' ka' žone'.
Ḻi ḻaže' zej nak yógo'te da' ka' wnnakze' Ḻe'.
8 To chi'ize zóatezgak da' ka' bchi'le' žo'o.
Ḻo da' li, na' ḻo da' ḻi ḻaže' bene' yógo'tegaken.
9 Bsele'e to benne' weslá nich beslé' benne' chie' ka'.
To chi'ize bzoa choche' x̱tiže'e da' bénḻene' žo'o.
Da' ẕen, na' da' ẕžébežo nak La la'y chie'.
10 Nich so ḻawžo gápežo yeḻa' žejni'ile, žon byene žébežo X̱anžo Dios.
Žejní'igekle binlo yógo'te benne' ka' žóngake' ka nak da' wnnakze' Ḻe'.
To chi'ize žaḻa' wká'n ẕenžo Ḻe'.