115
1 Kege kwinto', X̱anto' Dios, kege kwinto', san Le'
žaḻa' wká'n ẕento' ni'a che yeḻa' ži'i ḻaže' chio', na' yeḻa' ḻi ḻaže' chio'.
2 ¿Biẕ chen' ẕnnábgekle benne' zi'to' ka' neto'?
Ẕnnágake': “¿Gaẕ zoa Dios chele?”
3 Dios chežo zoe' ya'abá.
Žone' da' žaz ḻáže'kze' gone'.
4 Dios ka' chegak benne' zi'to' ka'
zej naken lo'a ka' da' zej naken plat, na' oro,
da' ka' nongak ḻo na'gak benne' ka'.
5 Zoa žoá'agaken, san bi ẕnnégaken.
Zoa yej ḻáwgaken, san bi ẕḻé'egeklen.
6 Zoa nággaken, san bi žéngeklen.
Zoa ẕína'gaken, san bi ẕḻé'egeklen.
7 Zoa ná'gaken, san bi be ẕtágaken.
Zoa ní'agaken, san bi ẕdágaken.
Bi ẕžoj chí'igaken lbá'gaken.
8 Kan zej naken, nakgak benne' ka' béngake' lo'a ka',
na' ḻezka' benne' ka' žx̱en ḻáže'gake' ḻégaken.
9 Le wx̱én ḻaže' X̱anžon', ḻe'e, benne' Israel ka'.
Ḻe' žákḻene' ḻe'e, na' žape chi'e ḻe'e.
10 Le wx̱én ḻaže' X̱anžon', ḻe'e, bx̱oz ka' che Dios, ḻe'e nakle ẕa'só Aarón.
Ḻe' žákḻene' ḻe'e, na' žape chi'e ḻe'e.
11 Le wx̱én ḻaže' X̱anžon', nole ḻe'e ẕka'n ẕenle Ḻe'.
Ḻe' žákḻene' ḻe'e, na' žape chi'e ḻe'e.
12 X̱anžon' žejsá' ḻaže'e žo'o, na' gon chawe'e žo'o.
Gon chawe'e benne' Israel ka'.
Gon chawe'e bx̱oz chie' ka' zej nake' ẕa'só Aarón.
13 Gon chawe'e benne' ka' žápegake' Ḻe' ba la'ne,
benne' blo ka', na' benne' gax̱jw ḻaže' ka'.
14 Gon X̱anžon' ga changak ẕi'nle ka',
na' changak ẕi'ngak x̱kwide' byo chele ka'.
15 X̱anžon' gon chawe'e ḻe'e.
Benkze' Ḻe' ya'abá, na' yežlyó nga.
16 Che toze X̱anžon' nak ya'abá,
san bneẕjwe' benne' ka' yežlyó nga.
17 Benne' gat ka' bi gak we ḻáwgake' X̱anžon',
na' bi gak benne' ka' zej die' yežw ba,
18 san žo'o, benne' ban ka', wká'n ẕenžo X̱anžon', na'a ža, na' to chi'ize.
¡Le wká'n ẕen X̱anžon'! ¡Ga'n ẕen Ḻe'!