12
1 X̱ana' Dios, beslá benne' chio' ka'
dan' biž zoa no benne' žape' Le' ba la'ne,
na' bi zoa no benne' ḻi ḻaže' ládjwgak benne' ka'.
2 Yógo'te benne' ka' žon ḻáže'gekle' ljéžgake' ka'.
Ḻo da' wen ḻaže' ẕnnágake' diža' chawe'
da' ẕnnágake' nich gon ḻáže'gekle' benách ka'.
3 X̱anžo Dios wžía yi'e benne' ka' ẕcháḻjgake' ki,
na' benne' ka' ẕcháḻjgake' da' ẕka'n ẕen kwíngake'.
4 Benne' ka' ẕnnágake': “Da' ẕchaḻjžo gákḻenen žo'o.
Wchaḻjžo kan žénelžo. ¿Noẕkze benne' wchi'le' žo'o?”
5 San ẕnna X̱anžo Dios:
“Na'a ḻa'kza' neda' dan' žsáka'gake' benne' yache' ka',
benne' ka' ẕbeže ḻáže'gake',
na' yeslá' benne' ka' žénegekle' bi da' gona'.”
6 X̱tiža' X̱anžo Dios naken dot da' li.
Naken ka ya plat da' wdén ḻo yi',
da' ba wdén ḻo yi' gaže chi'i ka'.
7 Le', X̱ana' Dios, ẕwíakzo' benne' chio' ka'.
To chi'ize gape chi'o ḻégake' ḻo na'gak benne' ka' zej nnita' ḻo ža na'a ža.
8 Kate' ẕka'n ẕengak benách ka' da' ẕinnj,
zej nnita' benne' bi zej nake' chawe' ka' gáte'teze.