138
X̱ana' Dios, dot ḻaža'a we ḻawa' Le'.
Žóḻteza' da' žoe ḻawa' Le' ḻawgak dios ka' chegak benne' zi'to' ka'.
Ẕzoa ẕiba' ḻo yodo' la'y chio',
na' ẕka'n ẕena' La la'y chio' dan' nako' ḻi ḻaže',
na' žeyache' ḻáže'lo' benne' chio' ka',
na' dan' bḻoe'elo' ḻaw nako' Benne' ẕente, na' ẕente nak x̱tižo'o.
Kate' bḻiža' Le', na' gókḻeno' neda'.
Ḻen yeḻa' wak chio' ben chocho' neda'.
Yógo'te benne' wnná bia' ka' nníta'gake' yežlyó nga we ḻáwgake' Le', X̱ana' Dios,
dan' ba béngekle' da' ẕnna x̱tižo'o.
 
Góḻgake' che da' ben X̱anžo Dios,
dan' ẕente nak yeḻa' ẕen che X̱anžon'.
Ẕente nak X̱anžo Dios, na' žákḻene' benne' gax̱jw ḻaže' ka',
san bi žwi'e latje benne' ẕka'n ẕen kwine' žine' ḻawe' Ḻe'.
 
Kate' že' zedla', Le' žon chocho' neda'.
Ẕlago' benne' ka' bi ẕḻé'egekle' neda' chawe', na' ḻen yeḻa' wak chio' žesló' neda'.
 
Gon X̱anžo Dios da' wchebe ḻaže'e chia'.
 
X̱ana' Dios, žeyache' ḻáže'tezlo' benne' chio' ka'.
Bi wsano' žono' žin da' wzó ḻawo' žonon'.