14
1 Benne' ḻaẕdo' zide ka' ẕza' ḻáže'gake', na' ẕnnágake': “Bi zoa Dios.”
Benne' ki zej nchix̱le yichj ḻáẕdo'gake', na' žóngake' da' bi naken chawe'.
Bi zoa no benne' žone' da' naken chawe'.
2 X̱anžo Dios, Bennen' zoe' ya'abá, ẕwie' benne' ka'
nich ḻe'ele' cha' zoa no benne' žejni'ile', bennen' žape' Dios ba la'ne.
3 Yógo'tie' bejchíx̱gekle'.
Yógo'tie' zej nchix̱le yichj ḻáẕdo'gake'.
Bi zoa no benne' žone' da' naken chawe', nitóe'.
4 ¿Bi žejní'igekle benne' ka' žóngake' da' ẕinnj?
Ẕzóẕjgake' benne' chia' ka' ka ẕzoẕj to benne' yet da' žawe',
na' bi žákbe'egekle' zoa X̱anžo Dios.
5 Ḻo yeḻa' ẕžebe chégake' žẕízegak benne' ka',
dan' žakḻen Dios benne' chawe' ka'.
6 Ẕcá'ngake' ca'ze da' wnnagak benne' yache' ka',
san benne' ki žx̱én ḻáže'gake' X̱anžo Dios.
7 Ḻa'kze Bennen' yeslé' benne' Israel ka'.
Kate' gon X̱anžon' ga yežingak benne' chie' ka', benne' ka' zej ndo'e zíto'le,
na' yebégekle ẕa'só Jakob, na' yebéḻe'egekle benne' Israel ka'.