144
¡Ga'n ẕen X̱anžo Dios, Bennen' ẕzoa choche' neda'!
Ḻekze' žon choche' na'a nich gak cha'a ḻo wdiḻe.
Žon choche' x̱ben na'a nich tíḻ-ḻena' benne' wen da' ẕinnj ka'.
Ḻekze' žeyache' ḻáže'le' neda', na' nake' ka to yo'o gan že' chawa'a.
Žon choche' neda', na' žeslé' neda'.
Žape chi'e neda', na' žx̱en ḻaža'a Ḻe'.
Žone' ga žongak benne' chia' ka' da' žapa' ḻégake'.
 
X̱ana' Dios, ¿biẕkze zej nak benne' ka', dan' žejsá' ḻažo'o chégake'?
¿Biẕ zej nak benne' ka' dan' ži'o wnné yoe chégake'?
Zej nak benne' ka' ka to da' ẕnitlen.
Zej nak ža chégake' ka to ẕoḻ dan' ẕdezen.
X̱ana' Dios, bsaljw ẕan ya'abá. Betj gákḻeno' neda'.
Bta ya'a ẕen ka', na' žoj žen che yi'.
Bzaḻa' yes wzió' ka', na' bsejw x̱nezgak benne' wen da' ẕinnj ka'.
Bse yag ntóche'do' chio' ka', na' bžia yi'-gake'.
Gan zo' na'le, bze no'o, na' beslá neda' ḻo da' zedḻe'e gan ži'a.
Beslá neda' ḻo na'gak benne' zi'to' ka'.
 
Benne' ka' ẕnnátezegake' da' wen ḻaže',
na' ẕzétjgake' Dios katen' žon ḻáže'gake'.
 
X̱ana' Dios, goḻkza' chio' to da' kob, na' wgoḻa' da' žóḻ-ḻento'.
Ḻen da' žóḻ-ḻento' da' nwan' chi do goḻkza' chio'.
10 Žonkzo' Le' ga žežojgak chawe' benne' wnná bia' ka'.
Besló' Dabí, benne' wen žin chio', ḻo ya ntoche' ka' chegak benne' wen da' ẕinnj ka'.
11 Beslá neda' ḻo na'gak benne' zi'to' ka'.
 
Benne' ka' ẕnnátezegake' da' wen ḻaže',
na' ẕzétjgake' Dios katen' žon ḻáže'gake'.
 
12 Ben ga gólegak bi' byo cheto' ka' kan ẕgólegak yag ka' ḻo yo bebe.
Ben ga gakgak bi' no'le cheto' ka' ka zej nak yag x̱tanḻe'e ka' nníta'gaken ḻi'a che to yo'o ẕen.
13 Ben ga cha'gak ližto' ka' yógo'te kwe' linne cheto'.
Ben ga chanḻe'e bia yix̱e' cheto' ka',
nich gakgak bia yíx̱e'do' zanḻe'e ḻo yežlyó cheto'.
14 Ben ga gakgak beže cheto' ka' bia waḻe ka' nich gónḻe'egakba' žin.
Ben ga bi wsángakba' bia že'ndo' ka' kate' bi na' žin byo' chégakba'.
Ben ga bi soa no benne' kweže nyache'e ḻo yež cheto'.
 
15 Ba nez ẕen naken chegak benne' ka' žaken ki chégake'.
Ba nez ẕen naken chegak benne' ka' X̱anžon' nake' Dios chégake'.