18
1 Nži'ila' Le', X̱ana' Dios.
Le' ẕzoa chocho' neda'.
2 Le', X̱ana' Dios, nako' ka to yej gan zoa' choch,
na' nako' ka to yo'o ẕen gan yo'o chawa'a.
Nako' Benne' weslá chia', na' Dios chia'.
Le' ẕzoa chocho' neda', na' wx̱én ḻaža'a Le'.
Žape chi'o neda', na' žesló' neda',
na' ẕkache' chawo'o neda'.
3 Ẕnnia': X̱anžo Dios žaḻa' wká'n ẕenžo-ne'.
Beslé' neda' ḻo na'gak benne' ka' ẕžá'agake' neda'.
4 Wzóa' ḻo da' zede che yeḻa' got,
na' gok da' ẕinnj ka to yegw nis da' bcheben neda'.
5 Gota' ẕož chia' choa'a ḻo yi' gabíl
dan' wzóa' ḻo da' zede che yeḻa' got.
6 Ḻo da' ẕžia yin' benách ka' bḻiža' X̱ana' Dios
na' bcháḻjḻenkza' Dios chia'.
Ḻe' benle' chi'a gan zoe' latje la'y chie',
na' bze nage' da' bchaḻja' ḻawe'.
7 Naž wẕó' yežlyó nga.
Wẕízegak ya'a ka' gže'.
Wẕízeḻe'egaken dan' bže'e Ḻe'.
8 Bžoj žen che yi' ḻo ẕine'e,
na' bžoj yi' ḻo žoe'e da' bzeyen da' zej že' ḻawe',
na' yi' na' bẕenen bzio' yi' ka'.
9 Bsaljwe' ya'abá, na' betje',
na' wzóa da' choḻ ẕan ni'e.
10 Wdíe' ḻo be', ne ži'e to da' nzin' kerubín.
Ka' gaze wdíe' ḻo be' bdone'.
11 Gokwe' da' choḻ, dan' bkachen' Ḻe',
dan' naken bejw gasj da' yožen nis.
12 Ḻo da' žákti'teḻe'e chie' bžojgak bejw gasj ka'.
Bžojgak wzió' yi', na' yej nis.
13 Ẕan ya'abá wnné wzió' che chi'i X̱anžo Dios,
na' benle chi'i Dios ẕente ládjwgak wzió' yi' ka', na' yej nisen'.
14 Bsie' yag ntóche'do' chie' ka',
na' besḻase' benne' ka' bi ẕḻé'egekle' neda' chawe'.
Bsane' yes wzió' ka', na' bžia yi'e benne' ka'.
15 Naž bḻa' ḻawgak da' ka' zej že' gže' ẕan nisdo',
na' bḻa' ḻaw x̱ni'a yežlyó dan' žen' ẕan nisdon'.
Bdiḻo' benne' ka' ẕžá'agake' neda', X̱ana' Dios,
na' ḻo yeḻa' ẕža'a chio' bsejo' x̱nézgake'.
16 Betj Dios ḻo da' sibe, na' bex̱we' neda',
na' ḻen ne'e waḻe bebeje' neda' ḻo da' zede da' goken ka nis zil.
17 Beslé' neda' ḻo na'gak benne' waḻe ka', benne' bi ẕḻé'egekle' neda' chawe',
na' ḻo na'gak benne' ka' ẕží'igake' chia' neda', benne' ka' zej nakže' waḻe ka neda'.
18 Bdíḻ-ḻengake' neda' katen' wzóa' ḻo da' zedḻe'e,
san X̱ana' Dios gókḻene' neda'.
19 Bebeje' neda' gan wyoá'a, na' bzoe' neda' to latje ẕen.
Beslé' neda' dan' wyáz ḻaže'e neda'.
20 X̱anžo Dios bebi'e chia' dan' bena' da' naken chawe',
na' ka nakkze da' chawen' bebi'e chia',
21 dan' žona' ka žsedle X̱ana' neda',
na' bi wléj yichja' Dios chia'.
22 Žona' ka nak da' bchi'le' žo'o,
na' bi bsana' diža' ka' da' bdix̱jwe'.
23 Goka' ḻi ḻaže' ḻawe' Ḻe',
na' wdape chi'i kwina' nich bi gona' da' ẕinnj.
24 Bebí'i X̱anžo Dios chia' ka nak da' chawe' da' bena',
ka nakkze da' chawen' dan' bena' ḻawe' Ḻe'.
25 Žeyache' ḻáže'lo' no benne' žeyache' ḻáže'le' lježe',
na' nako' ḻi ḻaže' ḻen bennen' nake' ḻi ḻaže'.
26 Ẕcháḻjḻeno' benne' chawen' da' naken dot chawe',
na' gako' snia ḻen benne' wen da' ẕinnj.
27 Yesló' benne' chawen' ḻo da' wžía yin' benách ka',
san wzex̱jo' benne' ka' ẕka'n ẕen kwíngake'.
28 Le' wzaljo' yi' chia'.
Le', X̱ana' Dios, wza'ni'o chia' gan zoa' ḻo da' choḻ.
29 Yeḻa' wak chio' wžía yin' benne' zanḻe'e, benne' ka' žjake' ḻo wdiḻe.
Cha' Le', Dios, sóaḻeno' neda', wak wchinnja' ze'e ka' žape chí'igaken yež ka'.
30 Da' ka' žon Dios zej naken ḻi ḻaže', na' x̱tiže'e naken dot da' li.
Žape chi'e yógo'te benne' ka' žx̱en ḻáže'gake' Ḻe'.
31 Toze X̱anžon' nake' Dios.
Toze Dios chežo nake' Benne' žape chi'e žo'o.
32 Dios nake' Bennen' žone' neda' benne' waḻe,
na' Benne' žeyone' ḻi ḻaže' da' žona' neda'.
33 Žone' ni'a ka zej nak ni'a bžina' yix̱e'
na' ẕzoa choche' neda' ḻaw Ya'a Sión chie'.
34 Žsedle' neda' nich gak cha'a ḻo wdiḻe,
na' nich gak wlewa' da' žsi yag ntóche'do' ka', dan' naken ya bronse.
35 Ḻo yeḻa' žeslá chio' wdape chi'o neda', na' ḻen no'o ḻi ža gókḻeno' neda'.
Ḻo yeḻa' ži'i ḻaže' chio' bka'n chawo'o neda'.
36 Ben chawo'o nez gan tia',
na' bi kwila' ḻo nezen'.
37 Bsejwa' x̱nezgak benne' ka' ẕžá'agake' neda', na' bena' ga bẕónnjgake',
na' bi beyá'a liža' ga bžinte beta' benne' ka'.
38 Bena' benne' ka' we', na' bi gok yeyásgake'.
Bejbíx̱gake' ẕan ni'a.
39 Ben chocho' neda' nich gok cha'a ḻo wdiḻen'.
Bzex̱jo' benne' ka' ẕžá'agake' neda' ẕan ni'a.
40 Beno' bẕonnjgak ḻawa' neda' benne' waḻe ka',
na' bžia yi'a benne' ka' bi ẕḻé'egekle' neda' chawe'.
41 Wnnábgekle' no benne' gákḻene' ḻégake' san bi wzóa no benne'.
Wnnábgekle' X̱anžo Dios, san bi wzé nage' chégake'.
42 Bžia yi'a benne' ka', na' gókgake' ka bix̱te yo dan' ẕzen ḻo be'.
Bleja' ḻégake' ka ẕleja' gona' ḻo nez ka'.
43 Besló' neda' ḻo na'gak benne' ka' ẕží'igake' chia',
na' beno' neda' benne' blo ḻo yež ka', na' ḻáwe'lgak benne' zi'to' ka'.
Benne' ka' bi nónbi'a, žóngake' žin chia'.
44 Kate' béngekle' chia', na' béngake' kan wnnía'.
Benne' yež ka' béngake' kan bchi'la' ḻégake'.
45 Benne' zi'to' ka' gotgak ni'a ná'gake'.
Ḻo yeḻa' ẕžebe bžójgake' ḻo yež ẕen ka' chégake'.
46 ¡Ga'n ẕen X̱anžo Dios!
¡Ga'n ẕene' dan' žákḻene' neda'!
¡Ga'n ẕen Dios, Bennen' žeslé' neda'!
47 Dios žebéj yichje' benne' ka' ẕžá'agake' neda',
na' ẕdie' benne' yež ka' ḻo na'a neda'.
48 Žeslé' neda' ḻo na'gak benne' ka' ẕžá'agake' neda'.
Žone' ga ẕnna bi'a benne' ka' bží'igake' chia' neda'.
Beslé' neda' ḻo na'gak benne' yichj ža'a ka'.
49 Wká'n ẕena' Le', X̱ana' Dios, ḻawgak benne' yež ka',
na' goḻkza' che La la'y chio' Le'.
50 Žono' ga žon to benne' da' ẕen ka',
bennen' ẕnna bi'e ḻo wlazo' Le',
na' žeyache' ḻáže'lo' bennen' wžío' Le',
bennen' nake' Dabí, na' ẕa'sóe' ka', to chi'ize.