31
1 Žx̱en ḻaža'a Le', X̱ana' Dios. Bi gono' ga yedoe'ela'.
Ni'a che da' chawe' da' nako' Le', beslá neda'.
2 Bze nag chi'a, na' gokḻen neda'.
Bze choch neda', na' wdape chi'i neda' nich yelá'.
3 Le' ẕzoa chochkzo' neda', na' žape chi'o neda'.
Dan' nako' ḻi ḻaže' wḻoe'elo' neda' nez, na' wgó'o neda' nezen'.
4 Bebéj neda' ḻo do yeḻj dan' bkwézgake' nich séngake' neda'.
Le', X̱an, ẕwíakzo' neda'.
5 Ẕdia' be' da' nakkza' ḻo no'o Le', X̱ana' Dios.
Le' beya'wo' neda', Dios ḻi ḻaže'.
6 Bi de chawa'a benne' ka' ẕka'n ẕéngake' lo'a ka',
san neda' žx̱en ḻaža'a Le', X̱ana' Dios.
7 Yebéḻe'ela', na' soa' chawe' dan' nži'ilo' neda' na' ẕḻe'ekzlo' ẕzáka'ḻi'a.
Nnezlo' ka ẕdia' ḻo da' žsáka'ḻe'egake' neda'.
8 Bi bdio' neda' ḻo na'gak benne' ka' ẕžá'agake' neda'.
Bzoa chocho' neda' to latje chawe'.
9 Beyache' ḻaže'l neda', X̱ana' Dios, dan' ẕzáka'ḻi'a.
Ba bebíž nis da' yožen yej ḻawa',
na' žak nyache' ḻaža'a ḻo be' da' nakkza', na' ḻo beḻa' žen chia'.
10 Dan' ẕde yeḻa' nban chia' ḻo da' ẕzáka'ḻi'a, ẕdia' yiz chia' ka' ẕbeže ḻaža'a,
na' žedó ḻaža'a dan' nbaga'a ẕia, na' ẕlagak žit yoa'a.
11 Benne' ka' ẕžá'agake' neda' gon dítjgekle' neda',
na' benne' ẕjo'o ḻi'a chia' ka' žon dítjgekle' neda'.
Benne' ka' zej nónbi'e neda' ẕkwásgake' gan zoa',
na' benne' ka' ẕḻé'egekle' neda' ḻo nez žẕónnjgake'.
12 Goḻ ḻáže'gake' neda' ka žóngake' che to benne' gat.
Naka' neda' ka to ye'n yo da' nla'an.
13 Ženla' da' ẕnnegak benne' zante chia',
na' gáte'teze zoa da' ẕcheben neda' dan' žóngake' toze diža' bi da' góngake' chia',
na' žak ḻáže'gake' gótgake' neda',
14 san neda' žx̱en ḻaža'a Le', X̱ana' Dios.
Ẕnnia' nako' Le' Dios chia'.
15 Ḻo no'o Le' žape chi'o ža chia' ka'.
Beslá neda' ḻo na'gak benne' ka' ẕžá'agake' neda', na' ḻo na'gak benne' ka' ẕbia ḻáže'gake' neda'.
16 Ḻo yeḻa' ẕen chio' bwia neda', wen žin chio'.
Ḻo yeḻa' žeyache' ḻaže' chio' beslá neda'.
17 Bi go'o latje yedoe'ela', X̱ana' Dios, dan' žḻiža' Le'.
Ben ga yedoé'egekle benne' ka' ẕbej yíchjgake' Le'.
Ben ga soa žígake' ḻo yi' gabíl.
18 Bnnita' ži benne' ka' žon ḻáže'gake', benne' ka' ẕnnégake' chegak benne' chawe' ka',
dan' ẕnnágake' ḻo yeḻa' ẕka'n ẕen kwin, na' ḻo yeḻa' žon ditjle.
19 Ẕente nak yeḻa' ži'i ḻaže' chio' dan' napo'
nich bi da' gono' chegak benne' ka' žápegake' Le' ba la'ne,
dan' žonno' chegak benne' ka' žx̱en ḻáže'gake' Le' ḻawgak yógo'te benne' ka'.
20 Ḻo da' bagáche'ze gan zo' Le' ẕkache' chawo'o benne' chio' ka'
nich bi be gongak benne' ka' chégake'.
Ẕnnito' benne' ka' to ḻo yo'o ngache'
nich bi be gongak chégake' benne' ka' ẕdiḻ diže'e.
21 ¡Ga'n ẕen X̱anžo Dios!
Ḻo yeḻa' žeyache' ḻaže' chie' bene' da' ẕen
nich gókḻene' neda' to ḻo yež gan gok wdiḻe.
22 Kate' gok da' bcheben neda' wnnía':
“Zoa' gan bi ẕḻe'ele X̱ana' neda'”,
san Le' benlo' chi'a katen' góta'yoela' Le', na' bḻiža' Le'.
23 Le ži'il X̱anžon', ḻe'e nakle benne' chekze' Ḻe'.
X̱anžon' žape chi'e benne' ka' bi ẕbej yíchjgake' Ḻe',
na' žebí'iḻi'e da' ẕia dan' žaḻa' yezí'gak benne' ka' ẕka'n ẕen kwíngake'.
24 Le gon choch ḻáže'le, ḻe'e žx̱en ḻáže'le X̱anžo Dios,
na' Ḻe' wzé choche' ḻe'e.