37
1 Bi kwe' zedlo' ni'a che da' žongak benne' ka' bi zej nake' chawe',
na' bi ge'elo' ni'a che da' zej nape benne' wen da' ẕinnj ka',
2 dan' te chegak benne' ka' ka žak che yix̱e' biž,
na' gak chégake' ka žak che yix̱e' da' nžogen.
3 Bx̱en ḻaže' X̱anžo Dios, na' ben da' chawe',
na' soakzo' nbano', na' si'kzo' yeḻa' ba nez.
4 Wyáz ḻaže' X̱anžon',
na' Ḻe' gonnkze' chio' da' ẕdan ḻažo'o.
5 Bzoa kwino' ḻo na' X̱anžon',
na' bx̱en ḻaže'e Ḻe', na' Ḻe' gone' da' ẕnnablo'.
6 Wḻoe'ele' da' chawe' da' nako' ka to da' žsa'ní',
na' da' ḻi ḻaže' chio' ka ḻawe' ža.
7 Wzóa žize ḻaw X̱anžon', na' bẕen ḻaže'e Ḻe'.
Bi kwe' zedlo' ni'a che no benne' ẕzi'e yeḻa' ba nez, bennen' žonkze' da' bi nak chawe'.
8 Bzoa cheḻa'ale yeḻa' yichj ža'a, na' bi žo'o.
Bi gak ḻažo'o yebi'o che bennen' bi nake' chawe',
9 dan' wžía yi' Dios benne' wen da' ẕinnj ka',
san benne' ka' žx̱en ḻáže'gake' X̱anžon', gata' chégake' yežlyó.
10 Yextído'ze biž soa bennen' bi nake' chawe'.
Ḻe'elo' liže latje bennen' san biž soe' ga na',
11 san benne' gax̱jw ḻaže' ka' gata' chégake' yežlyó,
na' sí'gake' yeḻa' ba nez che yeḻa' ẕga'n chawe'.
12 Benne' wen da' ẕinnj žénele' bi da' gone' che benne' chawe'.
Ḻo yeḻa' ẕža'a chie' bi ẕḻe'ele' ḻe' chawe'.
13 X̱anžo Dios wẕížekze' chegak benne' wen da' ẕinnj ka'
dan' ẕḻe'ele' za' gawze ža kwia yí'gake'.
14 Benne' wen da' ẕinnj ka' ẕbéjgake' ya ntoche' ka',
na' ba nzégake' yag ntóche'do' chégake' ka'
nich wžía yí'gake' benne' yache' ka', na' benne' ka' žiážjegekle',
nich gótgake' benne' ka' žóngake' da' naken chawe'.
15 Ya ntoche' chégake' chazen ḻaẕdo' kwíngakkze',
na' gáchjwgak yag ntóche'do' chégake' ka'.
16 Záka'že da' do' da' nape benne' chawe'
ka yeḻa' wnni'a ẕen da' zej nape benne' wen da' ẕinnj ka',
17 dan' gátgakkze ni'a na'gak benne' wen da' ẕinnj ka',
san X̱anžo na'kze ẕwíakze' benne' chawe' ka'.
18 Nonbia' X̱anžon' baḻ ža sóagake' nbángake'.
Da' zej nape benne' chawe' ka' soan to chi'ize.
19 Bi yedoé'egekle benne' ka' kate' bi žak chégake',
na' ḻo ža kate' žak wbín gata' da' gáwgake',
20 san kwia yi'gak benne' wen da' ẕinnj ka',
na' benne' ka' ẕží'igake' che X̱anžon', gak chégake' ka žak chegak yeje yix̱e' ka'.
Te chégake', na' nítgekle' ka ẕnit žen che yi'.
21 Benne' ka' bi zej nake' chawe' to da' ẕnnábgake' to chí'ido'ze, san bi ženéẕjwgaken',
san benne' chawe' žeyache' ḻáže'le' lježe' ka', na' ẕneẕjwe' bi da' žiážjele'.
22 Benne' ka' ẕḻe'el X̱anžon' ḻégake' chawe', gata' chégake' yežlyó,
san benne' ka' bi ẕḻe'ele' chawe', kwia yí'gakkze'.
23 Da' žongak benne' chawe' ka' naken da' bḻoe'el X̱anžon' ḻégake',
na' ẕḻe'ele' chawe' yógo'te da' žóngake'.
24 Kate' chejchégwgak benne' chawe' ka',
bi chejchégwgake' to chi'ize dan' nox̱w X̱anžon' ná'gake'.
25 Goka' x̱kwide', na' na'a naka' benne' gole,
na' batkle bḻe'ela' to benne' chawe' wsán Dios ḻe',
na' bi ẕdagak ẕa'sógake' ka' ẕnnábgakbe' bi da' gonn no benne' chégakbe'.
26 Benne' chawe' ki žeyache' ḻáže'tezle',
na' ẕneẕjwe' bi da' žiážjele no benne',
na' ẕa'sóe' ka' žak yeḻa' ba nez chégake'.
27 Biž gono' da' bi nak chawe', san ben da' chawe',
na' so' nbankzo' to chi'ize,
28 dan' nži'il X̱anžon' da' nak ḻi ḻaže', na' bi žsane' benne' chie' ka'.
To chi'ize gape chi'ikze' ḻégake',
san wžía yi'e lježgak benne' ka' bi zej nake' chawe'.
29 Benne' chawe' ka' gata' chégake' yežlyó nga,
na' nníta'gake' to chi'ize ḻo yežlyón'.
30 Benne' chawe' ẕchaḻjze' da' žejni'ile',
na' ka ẕchi'a ḻaže'e naken chawe'.
31 Da' bchi'le Dios ḻe' yo'on yichj ḻáẕda'we'.
Che ḻen bi chejchegwe'.
32 Benne' wen da' ẕinnj ẕḻe'ele' benne' chawen', na' žon byene' gote' ḻe'.
33 Bi wsán X̱anžon' ḻe' ḻo na' bennen' bi nake' chawe',
na' bi wžía yi'e ḻe' kate' wchi'a ḻaže'e ḻe'.
34 Bx̱en ḻaže' X̱anžon', na' ben ka ẕnna x̱tiže'e,
na' Ḻe' wchiskze' le' nich gata' chio' yežlyó nga.
Kate' kwia yi'gak benne' doḻa' ka', na' ḻe'elon'.
35 Bḻe'ela' to benne' wen da' ẕinnj, benne' ẕente,
na' góta'ḻe'e da' nape' ka da' ẕneẕjw to yag ẕente,
36 san wdé chie', na' biž zoe' na'a.
Bejdilja' ḻe', san bi bežeḻ-la'-ne'.
37 Blab ḻaže' ka nak che benne' ḻi ḻaže',
na' bwia bennen' nake' chawe',
dan' ga ze ḻawte gak to yeḻa' ba nez ẕen che bennen' zoe' ḻo yeḻa' ẕga'n chawe',
38 san benne' wen da' ẕinnj ka' kwia yí'gakkze'.
Bi soa no lježgak benne' wen da' ẕinnj ka',
39 san X̱anžo Dios yeslé' benne' chawe' ka',
na' Ḻe' gon choche' benne' ka' kate' bi gak chégake'.
40 X̱anžo Dios gákḻene' ḻégake', na' yeslé' ḻégake'
ḻo na'gak benne' ka' bi zej nake' chawe',
na' gon chawe'e ḻégake', dan' žx̱en ḻáže'gake' Ḻe'.