39
1 Neda' wnnía': “Gon chi'a binlo kwina' nich bi gona' doḻa' ḻo da' wchaḻja'.
Gon chi'a binlo da' wchaḻja', x̱ak zoa benne' wen da' ẕinnj gan zoa' neda'.”
2 Wzóa' žize ka to benne' bi žak nnie' na' bi be wnnía',
na' bi bchaḻja' da' naken chawe' da' žaḻa' nnia', na' bgolže da' ẕzaka'a.
3 Gok ḻáẕda'wa' ka to da' žeyen,
na' x̱ak blab ḻaža'a chen, goken ka to yi',
na' wnnabla' X̱anžon', wnnía':
4 “X̱ana' Dios, bḻoe'el neda' da' gak chia',
na' baḻ ža soa' nbana'.
Bzejní'il neda' bayén batx̱ gata'.
5 Beno' chia' soa' nbabze ža,
na' yiz chia' bi be zej naken ḻawo' Le'.
Da' likze bi be zej nak ža chegak benách ka'.
6 “Da' li zej nak benne' ka' ka to ẕóḻdo'ze.
Da' likze dáche'ze zej že' benne' ka' wnné yoe ni'a che yeḻa' nban chégake'.
Ẕdan ḻáže'gake' yeḻa' wnni'a, na' bi zej nnezle' no benne' gaken chie'.
7 Na'a, X̱ana' Dios, ¿biẕkze wx̱én ḻaža'a?
Toze Le' žaḻa' wx̱én ḻaža'a.
8 Beslá neda' ḻo yógo'te da' ẕinnj da' bena'.
Bi go'o latje benne' yaḻ ḻaže' ka' gon dítjgekle' neda'.
9 Wzóa' žize, na' bi be wnnía' dan' beno' Le' goken ki chia'.
10 Beká'a yižwé' da' bzo' ḻo beḻa' žen chia'.
Za' gata' ḻo da' žsako'o neda'.
11 Žsako'o no benne' doḻa' nich wzejni'ilo'-ne',
na' ka žon beldon' ẕteba' laže', Le' ẕchinnjo' da' nží'ižele bennen'.
Da' likze bi be zej nak ža chegak benách ka'.
12 “Benle da' ẕnnabla' Le', X̱ana' Dios, na' bze nag da' žḻiža' Le'.
Bi so' žize kate' zoa' ẕbeža' ḻawo' Le'
dan' naka' neda' ḻawo' Le' ka to benne' ẕdaze' yežlyó.
Naka' ka to byinne ẕdezba' kan gokgak x̱a x̱na' wdé chia' ka'.
13 Bi be gono' chia' to chi'ize
nich gata' latje yezí' ḻaža'a,
dan' ḻa' yeza'tia' yežlyó nga, na' biž soa'.”