76
1 Zej nonbia' benne' Judá ka' Dios,
na' La la'y chie' nga'nen ẕen ladjw benne' Israel ka'.
2 Ḻo yež Salem zoa latje la'y chie'.
Ḻo yež Sión zoa gan zoakze'.
3 Ḻo latjen' wdíchj Dios yag ntoche' ka' che wdiḻe, na' yag ntóche'do' ka',
na' ya da' žape chi'in benne' ka' ḻo wdiḻe,
na' ya ntoche' ka', da' ka' ẕkóngekle' žin ḻo wdiḻe.
4 ¡Benne' ẕenḻe'e nako' Le'!
¡Nako' waḻže ka ya'a ẕen ka'!
5 Chejchégwgak benne' waḻe ka', na' gásḻasgake'.
Nitó benne' waḻe bi yechís ne'e nich tíḻ-ḻene' Le'.
6 Dios chegak benne' Israel ka', kate' wtiḻo' benne' ka'
besḻaso' ḻégake', na' bia ka' žíagake'.
7 Le' nako' Bennen' žaḻa' žébežo.
¿Noẕ benne' gak sie' ḻawo' Le' kate' ẕžo'o?
8 Wnnó' wchi'a ḻažo'o benne' ka' ne zo' ya'abá.
Ẕžébegak benne' ka' ḻo yežlyó, dan' ẕbézgake'
9 ža so žo'o Le', Dios, nich wchi'a ḻažo'o benách ka',
na' nich yesló' yógo'te benne' gax̱jw ḻaže' ka'.
10 Da' likze yeḻa' ẕža'a chegak benne' ka' gaken to da' gon ga ga'n ẕeno' Le'.
Wlék žio' yeḻa' ẕža'a chegak benne' ka' zej nga'ne'.
11 Le wchebe ḻaže' da' gonnle che Dios,
na' le wneẕjwn' che X̱anžon', Dios chele.
Benne' ka' nníta'gake' do ẕente ḻá'gake' zej noe'e da' wnéẕjwgake' che Dios, Bennen' ẕžébežo.
12 Ẕži'i Dios che da' yo'o ḻo yichj ḻáẕdo'gak benne' blo ka'.
Ḻe' ẕchebe' benne' wnná bia' ka' nníta'gake' yežlyó.